ခိဆၧၩ့ချံၪ့အၪ့လဲၩ့ထၪ့ၥၭ ဆၧဘၪထဲးဘၪဎဲးလဖၪ
ခိဆၧၩ့ချံၪ့ အၪ့လဲၩ့ထၪ့အၥၭနီၪ လၩ့ဘၪစိၩလၧ ၡၩခရၧၫ့ဖၧၩ့ ဖၧၩ့ၥၭအမံၩ့မံၩ့နီၪလီၫႉ ဆၧခိဆီၪ့ႇ ထံၫဎိၩလၩ့ႇ လံၩမုလဖုၬဂဲၫဒဲ ၡါလဲအကၠီၩ့ ခီၫၡၩအနိၫ့ႇ ၡၩခံးဂးအနိၫ့ဒဲ ဘၪထံၭဆၫနဲၩ့ဎီၩ့နီၪ အထီဘဲၫယီၩ ပကဒၪဘၪ ပကနါဂၧၫ့ဘၪ ခိၪမၪခိၪမၪနီၪလီၫႉ ဆၧဆၧၩ့အ့ၬ ဆၧခိဆီၪ့ထၪ့နီၪ ဆၧထူၭထၪ့ဆၧအၪ့ဆၧအီၩ့လဖၪဒဲ ဘၪထံၭဆၫ ၡၩခမျၧးအဆၧဆီၪ့ဆၧချဲၫ့နီၪလီၫႉ ထံၫဎိၩလၩ့နီၪ ဆၧဆၫဂုထၪ့အၪထၪ့ႇ ၦၡၩဒဲ ဆၧဖိၪဆၧဎါၥံၪ ဘၪၥံၫဒဲ နဲၩ့ဎီၩ့ဒဲ ဆၧၥုၪ့ဆၧဒီၩ့လဖၪ ကဲၪထၪ့ ဆၧဂၭဂီၩ့ဂၭစၪနီၪလီၫႉ ဆၧလၧခိဆၧၩ့ချံၪ့အၪ့လဲၩ့ထၪ့ၥၭနီၪ ဆၧဖိၪဆၧဎါၥံၪ လၧအၥၭအီၪလဖၪဒဲ အဝ့ၫၥံၪအီၪၥၭမၧၫ့နဲၩ့ဎီၩ့ ဆၧဘၪထံၭဆၫအီၪနီၪလီၫႉ
ပခးပယၩ့ယီၩ ဘၪထွ့ၫလၧခိဆၧၩ့ချံၪ့ဆၧမၩၥၭမဲၪဆၧဒဲ ဆုးကျိၭအၥၭ ဆၧ ဘၪထဲး ဘၪဎဲးလဖၪနီၪ ဂၪ့ခိၪချိၫ့ယီၩ မွဲဂဲၫကဲၪထၪ့ ခးကခးနီၪလီၫႉ ဂၪ့ခိၪထၧၫ့ ဘံၪ့ယၫ ကဲၪထၪ့ၥ့ၪအနါထုၬ ခိဆၧၩ့ချံၪ့ ဆၧလၩ့အၪ့ယိၫလဖၪ ဆၧဆၧၩ့နၬထၪ့ဂီၩ့ ထံၫဎိၩလၩ့ႇ ဆၧခိဆီၪ့ထၪ့ဂီၩ့ ဆၧခိဎဲၪ့ထၬထၪ့အကၠီၩ့ ဂဲၫကဲၪထၪ့ဝ့ၫဒၪ ထံၫဎိၩလၩ့ လမွဲ ဘၪ ထံၫၡၩၥံၪနီၪလီၫႉ လၧခဲၫဆံၫနံၪ့ အဖၧၩ့ ထံၫခးဖၧၩ့ ခိဆၧၩ့ချံၪ့ ကအၪ့လဲၩ့ထၪ့အၥၭ အၪမၬအကၠီၩ့ ပၥ့ၪယၪ ဘၪလၧ ဆဲၩ့ယၫ့ကိၪ့ၥ့ၪလဖၪ အဆၧလီၩ့ဎွါအၪ့ဎၬထၬ အဖၧၩ့နီၪလီၫႉ နံၪ့ ၁၉၈၁ ထီးထီၩ့စိၩ နံၪ့ ၂၀၁၀ အဖၧၩ့ ခးပယၩ့ယီၩ လၩက ဘံၪ့ယီၩ ပကဒၪ ဘၪ ဆၧခိ ဖိၭ ဘိၭ ကၥၫ့နီၪလီၫႉ လါနၫ့ ထီလၧယၫအဂး ဆၧလီၩ့ဎွါအၪ့ဎၬအဖၧၩ့ ပခးပယၩ့ယီၩ လၩက ဘံၪ့နီၪ ဆၧခိကဆီၪ့ထၪ့ ၄ ၥၫ့ဒဲ ထီးထီၩ့စိၩ ၁၇ၥၫ့ အဆၧၫ့အထီၥ့ၪအကၠီၩ့ ပကိၪ့ၥ့ၪလၧ အလီၩ့ဎွါအၪ့ဎၬဆၧလဖၪ ထယၬထၬဝ့ၫဒၪနီၪလီၫႉ ဆၧဆၧၩ့အဒီၩ့ လဖၪနးဆ့ လးကျဲၩ့ဒဲ ခိဆၧၩ့ချံၪ့အဖၧၩ့ ဆၧဆၧၩ့ကနၬထၪ့ၥ့ၪအကၠီၩ့ဆ့ ပကဒၪ ဘၪလၧ ဆၧလီၩ့ဎွါအၪ့ဎၬ အဖၧၩ့နီၪလီၫႉ
