ပကဘၪယိထွ့ၫ ပဂၪ့ခိၪဂံၪ့

ပၫပၩ ဖရၫ့စ့ၭဖ့ၪလၫ့ထၬပၧၩ ဆၧထုၪ့ၥုၪ့ထုၪ့ၥၭအဖၧၩ့ ပထီးအလူၬအဂံၪ့မွဲဝ့ၫ ဂၪ့ခိၪချိၫ့ယီၩ မီၪ့ဎီၩ့ဒၪ ပဆၧၥၭမၧၫ့ဖၧၩ့ ခၪ့ဖျီၫ့ဝ့ၫဒၪ လၧပၧၩကၠၧၫ့ကၠၧၫ့ ပဝဲမုၪကဂၩဒဲ ထိးဆၧၫ့ပဒၩ့ထၬပၧၩ ဎံၫလၩဝ့ၫဒၪ မိမိလဂၩဒံၭနီၪလီၫႉ ပစံၭထၪ့အၪ့အူၭဘၪ ပကဆါ အၪမၬနီၪလီၫႉ အဝ့ၫ ယိထွ့ၫပဒၩ့ပၧၩဂီၩ့ အလွ့လၧၫ့ဎွ့ၩဝ့ၫဒၪ ဖီၫလဖၪႇ ဆၧအထံၭၥံၪလၧ အဂ့ၩၥံၪ့ဎွံၪလဖၪဒဲ ဆၧၥူၪဆၧၥၪအမံၩ့မံၩ့ ဖ့ၪလၫ့အ့ၪပၧၩအကၠီၩ့နီၪလီၫႉ

            ယွၩဖ့ၪလၫ့ထၬပၧၩ နဲၩ့ဎီၩ့အခၪ့ထံၭခၪ့ဎၧၩ့လဖၪယီၩ လၧၥနိၫ့လအီၪဘၪအဖၧၩ့ ပၥိၩ့ထၪ့ ဘၪဒၪပၥၭအကၠီၩ့ ဂဲၫကဲၪထၪ့ဝ့ၫဒၪ ဆၧနိၫ့ဆၧနၭလဖၪ ဂၪ့ခိၪချိၫ့နီၪ အထီဘဲၫယီၩ ကိၭၡါထၪ့အလူလၧပအီၪဂီၩ့ အၪ့ကံၩ့ပၧၩ ဆၧမၩဆၧၩ့ယူၭနီၪလီၫႉ  ဆၧဒဲၩဘၭအကၠီၩ့ အဖၧၩ့လးအီၪထၬ လၧပၥုၪ့ၥၭဖၧၩ့ ဆၧမၩနၧၩ့မၩစၪဆၧလဖၪနီၪ ဖံၬအထၧၫ့ႇ ထံၫႇ လံၩအထၧၫ့ဒဲ ဆၧဖိၪဆၧဎါၥံၪ လၧအၥၭအီၪလဖၪ ထီးအလူၬ ဂၭဂီၩ့ဂၭစၪထၪ့ဆၧနဲၪ့လဖၪ ဂဲၫဖျီၪ့ထၪ့ယူၭနီၪလီၫႉ မွဲဆၧဘဲၫနီၪ ဂဲၫဂၭဂီၩ့ဂၭစၪထၪ့ဝ့ၫဒၪ ပဂၪ့ခိၪချိၫ့ယီၩ ဘၪထိးဆၧဆၫ ဎိၩဒိၪယူၭနီၪလီၫႉ

            ၥၫ့ဎွၩ Paul ဎူၫဂၩလဂၩ လီၩထးဝ့ၫဒၪ ဘၪထွ့ၫလၧ နဲၩ့ဎီၩ့ဆၧလၩ့အၪ့ယိၫအဂဲးနီၪ ၡၩခမျၧးၥံၪလဖၪ အဆၧဖီၪ့ထၪ့ဖံၭထၪ့ အကၠီၩ့ ဆုးဂဲၫကဲၪထၪ့ဝ့ၫဒၪ ဆၧနိၪ့ဆၧနၭကမံၩ့အကၠီၩ့ လီၩ့ဖျီၪ့ထၪ့ထၬဝ့ၫဒၪနီၪလီၫႉ ၡၩခမျၧၥံၪလဖၪ ၥိၩ့ထၪ့နဲၩ့ဎီၩ့ဂ့ၩဘၪစဲၪ့ အကၠီၩ့ ၡၩခမျၧးၥံၪလဖၪ ဘၪဒၪဎီၩ့ဆၧၫ့ယၫ နဲၩ့ဎီၩ့ဆၧလၩ့အၪ့ယိၫယူၭနီၪလီၫႉ လကၭဒံၭဘၪ ကုလၭၥၭမကၭ  အဆၧအၪ့ဆၧအီၩ ဒဲ ဆၧၥုၪ့ဆၧဖျါဆၧခရၧၫ့ (FAO) ဆ့လီၩဝ့ၫဒၪ ဘၪထွ့ၫလၧ စဲၭဒူၭဆၧမၩ ဆၧးဎံၫဆၧးလၩ လ့ၩထၪ့ထီၪ့ဖျဲၪ အကၠီၩ့ ကဲၪထၪ့ဝ့ၫဒၪ နဲၩ့ဎီၩ့ဆၧလၩ့အၪ့ယိၫဖၭဒိၪနီၪ ၡၩခမျၧးၥံၪလဖၪ ကဘၪအၪ့လဲၩ့ထၪ့ အဆၧအီၪ ဆၧအၪ့နီၪလီၫႉ ဘၪနီၫလဲၪစွါဘဲၫ လၩ့ဆၫ့ဂ့ၩ ဒိၪဝ့ၫ ဆဲၩ့ယၫ့ကိၪ့ၥ့ၪ ဆၧလ့ၩထီၪ့လဖၪႇ ခီၫ့ၡၩအနိၪ့ ဆၧလ့ၩထၪ့ထီၪ့လဖၪ အီၪဝ့ၫအၪမၬလါနၫ့ဂ့ၩ လၧအဝ့ၫၥံၪ ကၠၧၫ့ကၠၧၫ့ ၡၩခံးဂး အတီၩဒဲ ဘၪထွ့ၫလၧ တခ့ၭဖဝၭ ဆၧလ့ၩထၪ့ထီၪ့လအီၪဘၪနီၪ ဆၧလ့ၩထၪ့ထီၪ့အနီၭ လၧၦၡၩၥံၪအဖၫ့ခိၪ ကကဲၪထၪ့ ထဲၩ့အအၧၩ့နီၪလီၫႉ