ၡၩခမျၧးအဆၧရွံထၪ့ဒဲ ခိဆၧၩ့ချံၪ့ အၪ့လဲၩ့ထၪ့ၥၭ
စၭထၪ့လၧ စဲၭအဆၧပိၩ့ထၪ့ဂဲၫအီၪထၪ့ နံၪ့၁၈၅၀အထီအိၩ ၡၩခမျၧးလဖၪ အဆၧမၩအကၠီၩ့ ခိဆၧၩ့ချံၪ့ အၪ့လဲၩ့ထၪ့အၥၭအဖၫ့ခိၪ လၩ့ ဘၪဝ့ၫအၪမၬနီၪလီၫႉ ခီၫ့ၡၩအနိၫ့ လ့ၩထၪ့ထီၫ့နီၪ ဆုးကျိၭအၥၭလၧ ဆၧၥိၩ့ထၪ့စီၩ့ဂဲးဂီၩ့ ဆၧအဂဲးအဖးယီၩ ခိဆၧၩ့ချံၪ့အၪ့လဲၩ့ထၪ့အၥၭအဂး အရ့ၩဒိၪထုၬအဂဲးအဖး ကမံၩ့နီၪလီၫႉ ထံၫခးအၪဒၪဆၧနီၪ ဘဲၫခီၫ့ၡၩအနိၫ့ လ့ၩထၪ့လ့ၩထီၫ့အၥိၭ အဝ့ၫၥံၪ ၥိၩ့ထၪ့စီၩ့ဂဲး ဂဲၫနၭထၪ့ နီၪလီၫႉ
ခီၫ့ၡၩအနိၪ့ လ့ၩထၪ့ထီၫ့နီၪ ကကၠၪကၠၪ ဘ ၪထံၭဆၫ နဲၩ့ဎီၩ့ကဆုးအီၪဂုးခၧၫ့လဆိၩၡၩအဂး ဆၧထိစိၩလဖၪနီၪလီၫႉ လါနၫ့ လၧပခံးပဂးအဂးမွဲဂ့ၩ ဆၧအဂ့ၩ လဂ့ၩ ဘၪနီၪ ပအၪ့ဎၬၥ့ၪမွဲဂ့ၩႇ ယိဝ့ၫန့အဂးလီၫဂီၩ့ မွဲလယိ ဘၪ ဆၧၫ့ထီ အထီၫ့အဂးအ့ၬၥံၪနီၪလီၫႉ
လၧထံၫခးအနိၫ့ ထံၫခးၥံၪအၪဒၪဆၧ ဖီၩ့ထၪ့ဖံၭထၪ့ ဘၪထွ့ၫလၧ ခိဆၧၩ့ချံၪ့အၪ့လဲၩ့ထၪ့အၥၭအနိၫ့လါနၫ့ ထီမုဆၫကနံၩယီၩ မွဲမၩထၪ့ဝ့ၫ ဂ့ၩဂ့ၩလန့ဒံၭ ဘၪနီၪလီၫႉ ဘၪနီၪလဲၪစွါ ဘဲၫ ထံၫခးအၪဒၪဆၧနီၪ စီၪဝ့ၫ နဲၩ့ဎီၩ့ဆၧလၩ့အၪ့ယိၫနီၪ အခံၫ့အီၪအၪဒံၭအကၠီၩ့နီၪလီၫႉ
ပကဲၪၦၡၩၥံၪလဖၪဆ့ ဘၪထွ့ၫလၧ ခိဆၧၩ့ချံၪ့အၪ့လဲၩ့ထၪ့အၥၭနီၪ ပယိဆၧၫ့ထီအထီၫ့အ့ၬဂီၩ့ ပအဲၪဒိၭမွဲ ဆၧၫ့ထီ ဘဲၫယီၩ ကန့ပဂးလဖၪနီၪလီၫႉ ထံၫခးလၧ အလ့ၩထၪ့လ့ၩထီၫ့ၡၩဒံၭလဖၪနီၪ ဘၪထွ့ၫလၧ ခိဆၧၩ့ချံၪ့အၪ့လဲၩ့ထၪ့အၥၭ အဂဲးအဖးလဖၪနီၪ မၩထၪ့ဝ့ၫန့ ဖိၭဘိၭဒံၭအ့ၬနီၪလီၫႉ ဘၪနီၫလဲၪစွါ ဘဲၫ ဆၧအၪ့ဆၧအီၩႇ ထံၫႇ ဆၧဆီၪ့ဆၧချဲၫ့ဒဲ ဆၧကိၪ့ ဘၪကိၪ့ၥ့ၪ ဆၧအလိၫဝ့ၫ အခၪ့ထံၭခၪ့ဎၧၩ့လဖၪ အရ့ၩဒိၪဝ့ၫအကၠီၩ့နီၪလီၫႉ ခိဆၧၩ့ချံၪ့အၪ့လဲၩ့ထၪ့အၥၭနီၪ ကပဒၩ့ထၬဝ့ၫအဂး မွဲခီၫၡၩအနိၫ့ ဆၧလၧၫ့ဆၧဎွ့ၩ လအီၪဒံၭ ဘၪနီၪလီၫႉ
