အဲၪဒိၭနဲၩ့ဎီၩ့ဂီၩ့ ဆုးပၧၩ့ထၬဝ့ၫ ဂၪ့ခိၪယီၩအဂ့ၩထုၬမွဲဝ့ၫ ခးSwitzerland အဂဲး – ၂
ခးဆွံဇလၫ့နီၪ ဘဲၫအဝ့ၫၥံၪအခး ကဆုးအီၪဂုးခၧၫ့လၧ နဲၩ့ဎီၩ့အဆီၪ့အချဲၪ့အဂး ဖီၪ့ထၪ့ဖံၭထၪ့ ဆၧလဖၪအဖၧၩ့ ၥၧၫ့ထံၪကထံၪနီၪဘိၭ မွဲ ဆၧမၩလၩ့ၡၩ ကၫဘိၫဒဲ ၦခမျၧးဆၧၥိၪ့ထုၭၥိၪ့လၩ့နီၪလီၫႉ အီၪဝ့ၫလၧ အဲလ်ပ် (Alps) ခိၪလီၩ့ လဖၪအကျၩ ထံၫယဲၩ့ခးယဲၩ့ၦမွံၩၥံၪ ဂဲၫဂၭဝ့ၫ ဎံၫလၩဝ့ၫဒၪ ဝံးလဖၪနီၪ စီၩ့ၥိၪအွံၩႇ လဲၪ့စဲၭလၧ ဘၪၥိၩ့ထၪ့လၧ ဒံၫဇဲလဖၪနီၪ မွဲလထိးဆၧၫ့ဘၪဝ့ၫနမံၩ့လီၫႉ ၥိၩ့ထၪ့ဝ့ၫမွဲ စီၩ့လဲၪ့ၥိၪအဆံၭဖိၪလဖၪဒဲ ကၥ့ၪလဲၪ့ၥံၪနီၪလီၫႉ လကၭဒံၭဘၪ အီၪထၧၫ့ခးယၫ လဲၪ့မ့ၪႇ ၦခမျၧးၥံၪအဂး လဲၪ့ၥိၪၥံၪနီၪ မၩထၬဝ့ၫ မငါအၪမၬအကၠီၩ့ ၦခမျၧးၥံၪလဖၪ ၥိၩ့ထၪ့အဝ့ၫၥံၪအလဲၪ့ၥိၪ ဖိၭဘိၭအ့ၬဂီၩ့ အၪဒၪ ဆၧနီၪ ၥိၩ့ထၪ့ လ့ၩထဲၩ့ဒၪလၧ ဆၧထူၭထၪ့ ကၫဘိၫၡၩဝ့ၫဒၪ ၦအၪဂၩအဂး ဆၧထူၭထၪ့ထၬ ဆၧၥိၪ့ထုၭၥိၪ့လၩ့လဲၪ့ၥိၪၥံၪနီၪလီၫႉ
လံထံၪကထံၪနီၪဘိၭ ဆိၫ့ကၩ စီၩ့ဂဲးအလၧၫ့အဎွ့ၩ Renewable Energy နီၪလီၫႉ ခးဆွံဇလၫ့နီၪ အဝ့ၫၥံၪအခး စဲၪ့ထၪ့ စီၩ့ဂဲး ၆၀ ယၩဒူၩဘျဲၪနီၪ ထုၭထၪ့ဝ့ၫဒၪလၧ နဲၩ့ဎီၩ့ထံၫစီၩ့ဂဲးဂီၩ့ အီၪထးလဖၪနီၪ မုမ့ၬစီၩ့ဂဲးဒဲ ဆံၪ့ဖျံၪဝ့ၫဒၪစီၩ့ဂဲး အဂူၫဂၩလဖၪ အရ့ၩဒိၪထုၬ အၪ့လဲၩ့ၥိၩ့ထၪ့ဝ့ၫဒၪအကၠီၩ့ မၩလၩ့ၡၩထၪ့ လံၩၥၭလိၪၥၭလံၬန့ အၪမၬနီၪလီၫႉ
လၧခဲၫ့ထုၬကထံၪနီၪဘိၭ ဆံၪ့ဖျ့ၪဝ့ၫဒၪ ထံၫအခၪ့ထံၭခၪ့ဎၧၩ့နီၪလီၫႉ ခးဆွံဇလၫ့ ကမၫလဖၪဒဲ ထံၫဖိၪချိၬလဖၪ ထံၫၥံၪနီၪ ဆံၫ့ဖျ့ၪဝ့ၫဒၪ ဎွ့ပၥ့ၪလဲၪနီၪ လၧဝံးဖၧၩ့ ၦအၪဂၩဆိၫ့ကၩ ထံၫဖီၫၥံၪ လၩ့ယွၩဝ့ၫဒၪ ထံၫနီၪ ပအီၩၥ့ၪအကၠီၩ့ ပၧၩ့ထၬ ထံၫၥၭလိၪၥၭလံၬန့နီၪလီၫႉ
ခးဆွံဇလၫ့ယီၩ ပၧၩ့ထၬနဲၩ့ဎီၩ့အဎံၫအလၩန့ဝ့ၫ ဘဲၫယီၩၥိၭနီၪ မွဲပဒိၪအၥနိၫလီၫ လကၭဘၪဒဲ ထံၫဖိၪခးဆါ ကဂၩဒဲ ကဂၩ ၥ့ၪယၫမူၩဒၩဒဲ အၥနိၫအီၪအကၠီၩ့နီၪ ဖျီၪ့ထၪ့ဝ့ၫဒၪ တၡါနီၪလီၫႉ မွဲဆၧဘဲၫနီၪ ခးဆွံဇလၫ့ဒဲ အထံၫဖိၪခးဆါလဖၪ ကျ့ၭ ပအၪ့န့ အဒီၩ့အထ့ၬဒဲ မွဲပကကျ့ၭစၨၭ ၦလၧအအဲၪထၪ့နဲၩ့ဎီၩ့ၥ့ၪ ကိၭဂ့ၩဒ့ၭလါဆံၭႉ
