ဒံၫဂၠ့ၭတၧၫ့ဆၩ့ ဖိၭဘံၭထၬဖၧၩ့ၥၭ

ဟာ… Facebook ဖၧၩ့ယီၩ Video အၥၫ့ထၪ့ဒီၭႉ ယကယိစိၩ နးဆိဖိၪဒံၭႉ

နးနး – စဖၩ့ ကနံၩယီၩ ဘၪမနီၫလဲၪ နလ့ၩဆၧမၩလိၪလးအ့ၬႉ

စဖၩ့ –    (ခေါင်းကို နှိပ်ရင်း ညည်းတွားသံဖြင့်) ယခိၪဎွံၪယံၩ့ ယမိအီၪမုၬအ့ၬဧၪ ၥ့ၪယၪအ့ၬနးဧ့ႇ လဂီၩအိၩ ယဂၭထၪ့န့အ့ၬဘိၭ

          ယလ့ၩဆၧမၩလိၪလး နၧၩ့လၧၩ့အ့ၬႉ

နးနး – (သက်ပြင်းချကာ စဖန်းဘေးတွင် ဝင်ထိုင်သည်)

           နခိၪဎွံၪယံၩ့ဧၪ ခွ့ၩဒိၭနါအဲၪ့နၧၩဧၪ စဖၩ့ႇ နကွ့ၩ Game ထီးထီၩ့ ဆၧမိဖၩ့ထၪ့ထီ ယၥ့ၪယၪအီႉ

စဖၩ့ –    (မျက်နှာငယ်လေးဖြင့်) ယကွ့ၩ ကဆိဖိၪလီၫ နးဧ့ႇ လၧခဲၫ့ ယလ့ၩနုၬလၩ့ယိ Facebookတၭ အခံၫ့လူၬဝ့ၫဒၪႉ

နးနး – အ့ၩ နလီၩကဆိဖိၪလီၫနီၪ အလူဒိၪဎွ့ၩဒိၪဝ့ၫဒၪ နဆၧကိၪ့ဘၪကိၪ့ၥ့ၪအခံၫ့ၥံၪႇ ဆၧဆီၪ့ဆၧချဲၫ့ၥံၪ ဆိၫ့ခွံၬဝ့ၫယူၭဘီၪႉ    

        နခွ့ၩဒိၭနါ Game ဒဲ Social Media ၥံၪနီၪ ၥၭဘုၭထၭထၪ့ Dopamine စီၩ့ၥံၪ စဲၪ့ထၪ့ဘီၪႉ မွဲဆၧဘဲၫနီၪ နဘၪဖ့ၬထ့ၬကၪဘီၪႉ

စဖၩ့ –    မွဲ နးဧ့ႇ လၧယၥဲၫဘၪ Game ခိၭယဘၪအီၪကၪအၥိၭလီၫႉ လါနၫ့ဂ့ၩ ဘဲၫယီၩ ယမံၫဘျဲၩအ့ၬ ယဘဲၩထၧၫ့ဂၩယၫႉ

နးနး – ဆိၫ့ကၩ ခွ့ၩဒိၭနါလဂ့ၩ ယလီၩနၧၩအ့ၬႉ လါနၫ့ ဆိၫ့ကၩလၧအခံၫ့အခၫ ကဘၪအီၪလီၫႉ လၧမုနၩခီၫ နမံၫအခၫ အီၪက့ၪထၬ နခွ့ၩဒိၭနါ လၧနၧၩ ယဲၩ့ယဲၩ့လီၫႉ ဘဲၫယီၩ နၥၭဘုၭထၬလၧ Game တၭ နဒၪနထံၩနၥိၭၥံၪ ကဲၪ့လၫ့လၧၩ့အ့ၬႇ နမၩလံၬ ကဲၪလၫ့လၧၩ့အ့ၬႉ အနီၫ မီၪ့ဎီၩ့ နမၩဂၭဂီၩ့ နအထီလၧယၫလီၫႉ

စဖၩ့ –    (နောင်တရသော မျက်နှာဖြင့်) ယထၪ့ဘၪကၠီးအ့ၬ ယလီၫ့ကီၩ့တၡါလီၫႉ ယဆၧမၩလိၪအဆၫ့လဖၪ ကအီၪထးလၧ

ၦၡၩအလးခဲၫ့ဧၪ ၥ့ၪယၫအ့ၬနးဧ့ႉ

နးနး – အ့ၪပၥ့ၪယၪယူၭနီၪ ပကဘၪ မၩဂ့ၩထၪ့ထဲၩ့ ဒ့ၩဧ့ႇ စၭထၪ့လၧ ကနံၩယီၩ ပကမၩနဲၪ့ထၬ နဆိၫ့ကၩ ခွ့ၩဒိၭနါအခံၫ့နဲၪႉ 

ကနံၩနီၪ အီၪက့ၪထၬအခံၫ့ ကွ့ၩGame  ကနၩရံၩႇ အီၪထးအခံၫ့လဖၪနီၪ မၩလံၬႇ ကွ့ၩၥဲၫ ဆၧစဲၪ့ဆၧကွ့ၩ နမၩကနၧၩ့ဧၪႉ

စဖၩ့ –    (ပြတ်သားသော လေသံဖြင့်) မွဲ နးနးႇ ယကကျ့ၭစၨၭ အၪ့လဲၩ့ထၪ့ယၥၭႉ လၧခဲၫ့ လၧမုနၩခီၫ ယဖီၪ့ ခွ့ၩဒိၭနါ နးဆံၭလၧၩ့အ့ၬႉ

နးနး – နလီၩအၡါမၪနဲၪႉ

စဖၩ့ – အၡါမၪဘိၭႉ နၧၩဝ့ၫ နနဲၩ့ယၧၩအ့ၬႉ ယီၭ  အၪ့န့ထၬ ယခွ့ၩဒိၭနါႉ

နးနး – မွဲယူၭႉ