Charity မံၭထၬမုၪလဖၪ မးၥံၫဝ့ၫဒၪအဂဲး#

ကက်သုန်လးဝၩ့ဖၧၩ့ အီၪဝ့ၫဒၪ မံၭထၬမုၪလဖၪနီၪ လၩ၃ဘံၪ့ကကၠၪ စူၭကီၪ့မးၥံၫဝ့ၫဒၪအကၠီၩ့ အဖီၩ့ခွံၬလၩအီဂၧၭ၂၈ၥၫ့ဒၪအိၩ မးၥံၫကၠၭဝ့ၫဒၪလၧ ကက်သုန်းဝံး စိန့်မေရီမာစီကွန်ဗင့်ဖၧၩ့ ကၥၫ့နီၪလီၫႉ ဆၧအလးနီၪ Sisters of Charity အီၪဝ့ၫဒၪနီၪလီၫႉ
လၧမးၥံၫကနံၩနီၪအဖၧၩ့ မံၭထၬမုၪလဖၪ ဂဲၫထၪ့မးၥံၫဝ့ၫဒၪ ဖိၭဘိၭ၃၁ဂၩဂီၩ့ ကျိုင်းတုံ ဆၧအီၪကီၪ့ ၥၫ့ခိၪဒိၪ John Saw Yaw Han နီၪ လီၩလၩ့လၬလၩ့ဝ့ၫဒၪ ဆၧၥၭထိၬပရၧၫ့ အဘၪဆဲၪ့လၧ စလုကၫ ၄:၃၈-၄၄နီၪလီၫႉ
“မံၭထၬမုၪလဖၪအဂး လၧဆၧကယုကစုၩဖၧၩ့ ကၥ့ၪယၫလၩ့ထဲၩ့ အၥၭခံဖၧၩ့ ဒဲ အဂဲးအဖးလဖၪဂ့ၩဂ့ၩဘၪဘၪဂီၩ့ လၧနးၥၭ ဆၧၥၭမၧၫ့အဂး မွဲကဂဲၩထၪ့ဝၭထၪ့အဂး ၥၫ့ခိၪဒိၪယီၩ ဆၫ့ထွ့ၫဘၪ မံၭထၬမုၪၥံၪဘဲၫယီၩအၥိၭနီၪလီၫႉ ဂီၩ့နီၪ အၪ့မၧၫ့မံၭထၬမုၪလဖၪ အီၪကယုကစုၩဖိၭဘိၭ ၂မံန့ဂီၩ့ ဖ့ၪမၩၥ့ၪယၫလၩ့ထဲၩ့အဝ့ၫၥံၪအၥၭနီၪလီၫႉ
လကၭဘၪ ၡၩအၥၭနီၪ လၩ့ဂၬ ဎ့ၬလၧ အနုၬဝ့ၫဒၪဂီၩ့ အခံၫ့နီၪ လၩ့ဂၬ လိးကျဲၩ့တၭ အၪ့ဎၬဆီၫ့မီၪ့လၩ့ထဲၩ့ ပဆၧအၪ့ဎၬ ပဆၧထိၪတွၭ ပဆၧထိးၥၭလဖၪနီၪ ဂ့ၩဂ့ၩဘၪဘၪဂီၩ့ ပကၥ့ၪယၫလၩ့ထဲၩ့ပၥၭ ဂ့ၩဂ့ၩဘၪဘၪအဂး လိၪဝ့ၫဒၪအဂဲး ၥၫ့ခိၪဒိၪယီၩ လီၩလၩ့လါလၩ့ဝ့ၫဒၪနီၪလီၫႉ
မံၭထၬမုၪလဖၪနီၪ မွဲၦလၧအမၩဂၧၫ့ထၪ့ၥၩလၩ့ ကဆါဎြံၬအဆၧပရၧၫ့လဖၪ လၧအဆၧၥၭမၧၫ့ဖၧၩ့အဂဲးဆုးထဲၩ့စံၭဝ့ၫဒၪလီၫႉ ၦၥၭၡါလဖၪႇ ၦအဘၪထိးခွံၬၡိၬထၬၥၭလဖၪႇ နးခီၫ့မိၡါလလၧၫ့ဎွ့ၩဘၪလဖၪႇ ၦဘၪထိးထၬၥၭဆၧဆၫလဖၪ ဒဲ ၦၡၪ့ၦယၬဖိၪအီၪလၧ ခိၪလီၩ့ခိၪမွဲဂ့ၩ အီၪလၧဖံၬဒၩလးမွဲဂ့ၩ ဖိၪၥၪဆံၭဖိၪလဖၪအဂး ကျ့ၭစၨၭမၩဆၧၩ့ဝ့ၫဒၪ လူၬဂဲးလူၬဘၭ မံၭထၬမုၪလဖၪယီၩ ကအၪ့ကံၩ့ဘၩဆိၪဖၪဆၧဒဲ ကဘိၪ့ထၪ့ဘၩထၪ့ၡီၩ့ ကိၪ့ဘိၪ့ဆံၫ့ဎံၪဂီၩ့ ကဘၪအၪ့န့ထၪ့ထဲၩ့ အဂဲးအဘၭကလိၪဝ့ၫဒၪအဂဲးႇ လကၭဘၪ ပဆၧဖံၭဆၧမၩအၪတၭ ပအၪ့ကံၩ့ဘၩဆိၪဖၪဆၧချူၭအ့ၬႉ ပလ့ၩလၧ ကိၪဘိၪ့ဆံၫ့ဎံၪအီၪ ထီၩ့အ့ၬစွါဘဲၫ ဆၧအယီၩနီၪ ပဂး မွဲကကဲၪထၪ့ ဆၧလၩ့အၪ့ယိၫဖၭဒိၪတၭ ဆၧမၩအခံၫ့ဒဲ ယွၩအဂးအခံၫ့နီၪ အီၪက့ၪထၬထဲၩ့ လၧကၠီၪ့ဖျီၩ့ဘၪဘၪဖၧၩ့အဂးနီၪဆ့ ၥၫ့ခိၪဒိၪယီၩ ဆုးထဲၩ့လီၩဝ့ၫဒၪနီၪလီၫႉ

စပ့ၫတရုအမံၩ့ၡါနီၪ ကဆါဎြံၬမၩဘျၪထဲၩ့အ့ၪ အဆၧဆၫဂီၩ့ကထံၪဎး ဘဲၫလီၩၥ့ၪယၫထဲၩ့ၦဂူၫဂၩအၥိၭ လၧကဆါယွၩအအီၪ ၦအဒိၭန့ဘၪ ဂဲးဘၭဒဲ ဆၧဘၠၩ့လဖၪနီၪ ဘၪထိးကိၭထဲၩ့အၥၭလၧ ၦဂူၫဂၩကန့ထၪ့ ဆၧမုၬဆၧၡူၪဒဲ ဆၧထိးထဲၩ့တၩ့ထဲၩ့ အဂးနီၪလီၫႉ လခဲၫ့ထုၬ ၥၫ့ခိၪဒိၪ လီၩဘၪ ဂၪ့ခိၪအဆၧၥၭမၧၫ့နီၪ အခံၫအခၪ့ထံၭ အီၪဝ့ၫဒၪတၭ ထုၪ့ၥုၪ့ထုၪ့ၥၭဂီၩ့ လီၩ့ဎွါထၪ့ ဆၧကိၪ့အဂ့ၩထုၬလဖၪတၭ ဆၧအုၩ့လၩ့ စကရမဲၫ့တူၩဒဲ မံဆၩဆၧလုထၪ့နီၪ ကျ့ၭစၨၭထၪ့ကၠၭအဂး ဆၫ့ထွ့ၫဘၪ မံၭထၬမုၪလဖၪ ဘဲၫနီၪအၥိၭနီၪလီၫႉ အ့ၪမွဲပကအီၪလၧယွၩ ဘူၭဘူၭထံးထံးနီၪ ပဆၧဖံၭဆၧမၩလဖၪ လၧယၫခီၫမွဲကကဲၪထၪ့ အချံၫအၥၪအၪအၪလ့ၬအဂဲး ၥၫ့ခိၪဒိၪယီၩ ဆုးထဲၩ့စံၭဝ့ၫလီၫႉ
ၥၫ့ခိၪဒိၪ အဆၧလီၩလၩ့လၬလၩ့ဂီၩ့ဝ့ၫဒၪကကၠၪ မံၭထၬမုၪလဖၪ လ့ၩအၪ့န့ ဆၧအုၩ့လၩ့ စကရမဲၫ့တူၩလၧ ၥၫ့ခိၪဒိၪအအီၪဂီၩ့ လုထၪ့လၩ့ဎိၭကၠၭ မံဆၩဆၧလုထၪ့ကၠၧၫ့ကၠၧၫ့နီၪလီၫႉ ဂီၩ့နီၪ အၪ့လၩ့ဎိၭကၠၭ မုဆၫဆၧအၪ့ဂီၩ့ ထဲၩ့ထဲၩ့လၧ ပဆၧအီၪကီၪ့ ယဆၧအီၪကီၪ့အလးလဖၪနီၪလီၫႉ
ဆၧပရၧၫ့ယီၩ ပန့ထၬဘၪလၧ RVA ဖျိၩ့ၡၩ့အအီၪနီၪလီၫႉ
31.8.2026
နးအဲၪဖီၫဘွၩ