ၦၡၪ့ဖိၪၥံၪအဂး ဆၧဘၪလိၬဎွ့ၪဎီၩ့ – ၂

စမၭၥုၫ အဆၧၫ့ဒိၪ ၂၂ အဆၧၫ့ဖိၪ ၃၉ အဖၧၩ့ ကဆါဎရံၬ လီၩ့ထၬဝ့ၫဒၪ အဲၪပၧၩလၧနနဲၩ့ထံၭ ဘဲၫနနၫ့ဆါဒၪ နဝ့ၫအၥိၭနီၪဆံၭ ဆၧလီၩလၩ့လါလၩ့ယီၩ အရ့ၩဒိၪဝ့ၫဒၪ တၡါလီၫႉ ဘၪနီၪလဲၪစွါ ဘဲၫ ခိဆၧၩ့ချဲၫ့ အၪ့လဲၩ့ထၪ့အၥၭနီၪ ထံၫခးလၧ အကဲၪဒိၪကဲၪမုလဖၪ လၧနဲၩ့ဎီၩ့အဖၫ့ခိၪ အၥၭလိဖၭအဆၧဖီၪ့ထၪ့ဖံၭထၪ့အကၠီၩ့ ၦၡၪ့ဖိၪယါဖိၪၥံၪလဖၪ ဘၪထိးခိဆၧၩ့ချံၪ့အၪ့လဲၩ့ထၪ့အၥၭ ဆၧလၩ့အၪ့ယိၫ အဆၧၫ့အထီနၬမၬ အကၠီၩ့ ၦၡၪ့ဖိၪယါဖိၪၥံၪအဂး ဘဲၫဆၧလိၬဎွ့ၪဎီၩ့အၪ့ဎၬထၪ့ထဲၩ့အ့ၪကန့အဂး ဆၧအီၪကီၪ့ၥံၪလဖၪ အမူၩဒၩအီၪနီၪလီၫႉ ဂၪ့ခိၪဘး အဆၧအၪ့ဎါထယါအဖၧၩ့ နံၪ့ ၂၀၅၀ခိၬနီၪ ခိဆၧၩ့ချံၪ့အဆၧအၪ့လဲၩ့ထၪ့အၥၭအကၠီၩ့ ၡၩခမျၧးအခွး ဖိၭ ဘိၭ ၂၀၀ ဘျဲၪနီၪ အထီ ဘဲၫယီၩ အဝ့ၫၥံၪအီၪအထံၫအခးနီၪ က ဘၪၥုၭအီၪအၥၭလၧ လးကျဲၩ့အဂူၫဂၩဒဲ ၡၩခးမျၧးအခွး ဖိၭ ဘိၭ ၁၃၀နီၪ ကထီၩ့လၩ့လၧ ဆၧၡၪ့ဆၧနၭဖၧၩ့ၥ့ၪနီၪလီၫႉ

လၧလံၬဆံၫ့ဎံၪဖၧၩ့ ဆၧအီၪကီၪ့အဆၧၥီၪ့ဆၧၥၫ့အဖၧၩ့ ကဆါယွၩနီၪ အီၪလၧ ၦၡၪ့ဖိၪၥံၪအအီၪနီၪလီၫႉ ပၫပၩ ၥၫ့ဎွၩ ဖရၫ့စ့ၭလီၩဝ့ၫ ဆၧအီၪကီၪ့နီၪ မွဲၦၡၪ့ဖိၪၡၪ့ဖိၪၥံၪအဂး ဆၧအီၪကီၪ့အကၠီၩ့ အခီၫပယီၫ ဝဲထၪ့ထၬဝ့ၫ လံထံၪနီၪလီၫႉ အဆိၪထုၬကထံၪနီၪ ဆၧအီၪကီၪ့နီၪ အီၪလၧဆၧယံၩဆၧၡီၩ့ ပက ဘၪအီၪဂုးခၧၫ့လၧ ၦၡၪ့ဖိၪၥံၪအဆၧၥၭမၧၫ့ဖၧၩ့အဂးႇ(၂) ကဆါဎရံၬ ဘၪထိးဆၧၡၪ့ဆၧယါနီၪ ဆၧအီၪကီၪ့နီၪ မၩလိၪဂီၩ့ ဆၧကဲၪထၪ့အထံၪအဖျဲအဂးႇ (၃)  ၦၡၪ့ဖိၪၥံၪလဖၪ ပက ဘၪနဲၪအၪ့ ဆၧယၫ့ၥၭ ဆၧအဲၪဆၧကွံၩ ၦလၧအဆံၭထုၬနီၪ ပက ဘၪမၩဆၧၩ့အဂးႇ (၄) ၦၡၪ့ဖိၪၥံၪ ဖိၬလိၬထၪ့ထၬ ဆၧအီၪကီၪ့ယီၩ ပက ဘၪအီၪၥၭမၧၫ့လၧ ၦခမျၧးၥံၪအဂးနီၪလီၫႉ လၧဆၧအီၪကီၪ့ ဆၧၥီၪ့ဆၧၥၫ့ အခၪ့ထံၭခၪ့ဎၧၩ့လဖၪ ၦၡၪ့ဖိၪၡါဖိၪၥံၪ အဆၧအီၪၥၭမၧၫ့ ကဂုးခၧၫ့အဂး ဆၧအီၪကီၪ့နီၪ ဘၪထွ့ၫလၧ ခိးဆၧၩ့ချံၪ့အၪ့လဲၩ့ထၪ့ အၥၭအဖၫ့ခိၪ အအၪ့ဎၬထၪ့အ့ၪအဂး မူၩဒၩအီၪနီၪလီၫႉ