ၦၡၪ့ဖိၪၥံၪအဂး ဆၧဘၪလိၬဎွ့ၪဎီၩ့ – ၁

ခိဆၧၩ့ချံၪ့အၪ့လဲၩ့ထၪ့အၥၭအကၠီၩ့ ၦၡၪ့ဖိၪၥံၪလဖၪ ဘၪဒၪဎီၩ့ဆၧၫ့ယၫ ဆၧကၪဆၧဂဲၩအနၬထုၬနီၪလီၫႉ  ဆၧလၧ ခိဆၧၩ့ချံၪ့ အၪ့လဲၩ့ ထၪ့အၥၭနီၪ မွဲဂၪ့ခိၪထၧၫ့ဘံၪ့ယၫ ကၪဂဲၩဝ့ၫဒၪ လါနၫ့ဂ့ၩ ဆၧ ဘၪထိးဆၧၫ့ဆၧ မွဲလမီၪ့ဎီၩ့ ဘၪနီၪလီၫႉ ဘၪထွ့ၫလၧ ဂၪ့ခိၪထၧၫ့ ဘံၪ့ယၫ ဆၧမၩထၪ့ ဖၫ့လိၫ့အံၫ့စီၩ့ဂဲးအၡၩထုၬ ဂဲးဆီၪ့ဝ့ၫဒၪ ထံၫခးလဖၪနီၪ မၩဆၧၩ့ဝ့ၫလါနၫ့ဂ့ၩ ၦၡၪ့ဖိၪၥံၪအဂး အၪဒၪဆၧ ဆုးလ့ၩထၪ့ထီၪ့ဝ့ၫဒၪ ထံၫခးလဖၪနီၪ ခိဆၧၩ့ချံၪ့အၪ့လဲၩ့ထၪ့အၥၭ ဆၧလၩ့အၪ့ယိၪ အီၪအနၬထုၬ ဘဲၫဒံၭနီၪလီၫႉ

ခိဆၧၩ့ချံၪ့အၪ့လဲၩ့ထၪ့အၥၭအကၠီၩ့ ၦၡၪ့ဖိၪၥံၪလဖၪ အၥၭႇ အဂံၪ့အဎၪ့ ကဲၪထၪ့ဆၧမၩၥၭမဲၪဒဲ အဝ့ၫၥံၪ အဆၧၥုၪ့ဆၧဖျါဆၧမၩႇ ဂၭဂီၩ့ဂၭဂီၩ့ႇ အဂံၪ့အဎၫ့ၥံၪ ဂၭဂီၩ့ဒဲ ဘၪထွ့ၫလၧ ဆၧဆီၪ့ဆၧချဲၫ့ ဂဲၫကဲၪ့ထၪ့ဆၧကၪဆၧဂဲၩနီၪလီၫႉ ဂၪ့ခိၪကုလၭၥၭမဂၭ အဆၧအၪ့ဎၬထယါအဖၧၩ့ နံၪ့ ၂၀၃၀ နဲၩ့ဎီၩ့ ခိဆၧၩ့ချံၪ့အဆၧအၪ့လဲၩ့ထၪ့အၥၭအကၠီၩ့ ၡၩခမျၧး အခွး ၁၂၀ ဘျဲၪ ကထီၩ့လၩ့လၧ ဆၧၡၪ့ဆၧနၭအဖၧၩ့ လီၩ့ထၬဝ့ၫဒၪနီၪလီၫႉ ခိဆၧၩ့ချံၪ့ကိၪ့ၥ့ၪ ဆရၫဒိၪ အူၩထိၩ့လွ့ၫလီၩဝ့ၫ  ဆၧၡၪ့ဆၧယါဒဲ ခိဆၧၩ့ချဲၪ့အၪ့လဲၩ့ထၪ့အၥၭနီၪ ယၩဒူၩ ၂၁ အၥၭမၧၫ့ဝ့ၫဒၪ ၦခမျၧးလဖၪအဂး ကဲၪထၪ့ ဆၧအၪ့ထၩဖၭဒိၪကမံၩ့နီၪလီၫႉ ထီးနီၪ ဆုးလီၩဝ့ၫ ဆၧလၧဆၧၡၪ့ဆၧနၭဒဲ ခိဆၧၩ့ချံၪ့အၪ့လဲၩ့ထၪ့အၥၭ နံၫမံၩ့လူၬနီၪ ၦခပယၩ့ဖိၪၥံၪ ဘၪဒၪဎီၩ့ဆၧၫ့ယၫဝ့ၫတၡါ ဆၧကၪဆၧဂဲၩဖၭဒိၪအကၠီၩ့ ထိးဆၧၫ့ထၬဝ့ၫဒၪနီၪလီၫႉ

ၦဎရံၬဖိၪၥံၪဆူၩနဲၩဝ့ၫဒၪ ဆၧထိးထဲၩ့တၩ့ထဲၩ့ဆၧလီၩ့လၩ့လါလၩ့နီၪ ၦၡၪ့ဖိၪၥံၪလဖၪအဂး က ဘၪကဲၪဝ့ၫဒၪ ဆၧၥၭထိၬဆၧလီၩ့လၩ့ လါလၩ့နီၪလီၫႉ ခိဆၧၩ့ချံၪ့အၪ့လဲၩ့ထၪ့အၥၭအကၠီၩ့ ၦလၧ ဘၪဒၪဎီၩ့ဆၧၫ့ယၫဆၧကၪဆၧဂဲၩလဖၪႇ ၦၡၪ့ဖိၪယါဖိၪၥံၪလဖၪအအီၪ ၦဎရံၬဖိၪၥံၪ လဖၪ ပကဘၪလ့ၩလၧအဝ့ၫၥံၪအီၪဂီၩ့ ပကဘၪဖ့ၪအၪ့အဝ့ၫၥံၪဂဲးဘၭ ၦၡၪ့ဖိၪၥံၪအဂး အခီၫပယီၫလၧၫ့ဎွ့ၩဝ့ၫဒၪ ဎရံၬဖိၪဆၧလီၩ့ လၩ့လါလၩ့နီၪလီၫႉ