ဂဲၫခိထၪ့ယူၭ ပဂၪ့ခိၪချိၫ့

နးဎံၫး                ဟ့ၭ နးဘွၩ နဖီ မနီၪလဲၪႉ

နးဘွၩး               အီၩ ယဖီ ပၫပၩ ဖရၫ့စ့ၭ အလံၬစီၩ့ ပကဘၪယိထွ့ၫ ပဂၪ့ခိၪဂံၪ့ အဂဲးနီၪဘီၪႉ အထီဘဲၫယီၩ ပဘၪဒၪဎီၩ့ဆၧၫ့ယၫ ဂၪ့ခိၪ ထၧၫ့ဘံၪ့ယၫ နဲၩ့ဎီၩ့ ဂဲၫဂၭဂီၩ့ဂၭစၪထၪ့ႇ ပအီၪအလး ဂံၪ့ႇ ဂၪ့ခိၪချိၫ့ယီၩ မွဲထီၩ့ဝ့ၫယူၭလၧ ဆၧလၩ့အၪ့ယိၫ အဖၧၩ့ယူၭလီၫ အကၠီၩ့တၭ ဆၧယီၩ ပကဘၪယိထွ့ၫပဒၩ့ထၬ စွါဘဲၫႉ

နးဎံၫး                မွဲဘၪနီၪ နးဘွၩဧ့ႇ အဆိၪထုၬ ဒုၭအီၩပၧၩ ထံၫချံၪ့ချံၪ့ခလူၬႉ လၧခီၫအိၩ မုမ့ၬနီၪ မီၪ့ဎီၩ့ အၪ့ဎိၪထၬပၧၩအၥိၭႉ ပဂဲၫဂၭဖၭနီၪ မီၪ့ဎီၩ့ ပဘၪဂဲၫဂၭဖၭလၧ ရၬမ့ၪကျၩလီၫႉ

အဲၪဆၨၩး            မွဲ ခိထဲနီၪ ပဂဲၫထီၩ့လၧ နဂံၪ့ဖၧၩ့မၬ ပၥၪဎွ့ၩဒၪမၬဆံၭ နးဘွၩဧ့ႉ

နးဘွၩး               ကဲ ယီၭ အီၩထံၫႇ အထီဘဲၫယီၩ လၩမ့ၫဘီၪႉ ဆၧခိဆီၪ့ထုၬ လၩလၥၨၩ လါနၫ့ ခိန့ ကိၭနံၪ့နံၪ့အိၩနီၪ အၡါမၪဒ့ၭႉ

အဲၪဆၨၩး            အယီၩမွဲ ဂၪ့ခိၪဂၭဂီၩ့အ့ၬ ထံၩၥိၭၥံၪဧ့ႇ ဆၧယီၩ ကိၭဝ့ၫလၧ ခိဆၧၩ့ချံၪ့ အၪ့လဲၩ့ထၪ့ၥၭ (Climate Change) လီၫႉ ပဂၪ့ခိၪချိၫ့ယီၩ ဂဲၫခိထၪ့ကဆံၭဆံၭ ဘဲၫယီၩ ထီၩ့လၧ လၩမ့ၫအခၫ ခိဘဲၫၥိၭ ပလၩ့လၧရၬမ့ၪဖၧၩ့ၥိၭလီၫႉ

နးဎံၫး                အနီၪစွါဘဲၫ (Climate Change) နီၪ ဘၪကဲၪထၪ့ ဘၪနီၪလဲၪႉ မုမ့ၬနီၪ လၩ့ဘူၭထၪ့လၧ ဂၪ့ခိၪနီၪဧၪႉ

နးဘွၩး               မွဲအ့ၬႉ ဆၧလဖၪၥံၪယီၩနီၪ မွဲဒၪ ၦၡၩၥံၪအဆၧဖီၪ့ထၪ့ဖံၭထၪ့အကၠီၩ့လီၫႉ ပကဲၪၦၡၩၥံၪလဖၪယီၩ ပဖ့ၬၥံၪ့ႇ စဲၭဒူၭႇ လဲၪ့ၥိၪၥံၪနီၪ ထူၭထၪ့ Carbon dioxide အၪမၬလီၫႉ စီၩ့အခူၪလဖၪနီၪ အီၪထးလၧ လံၩအထုၪ့ဖၧၩ့ဂီၩ့ လၩ့ဂၬဒၪ ပမၩဘံၭထၬလၧ ၡၫ့လုၬအၥိၭတၭ ဆၧအခိၥံၪ အီၪဂဲၫလၧ မုမ့ၬနီၪ စဲၪ့လၫ့လၧခီၫ့ န့လၧၩ့အ့ၬဂီၩ့ ပဂၪ့ခိၪချိၫ့ယီၩ အီၪမုၬလၧၩ့အ့ၬလၥၨၩႉ

နးဎံၫး                အနီၪစွါဘဲၫ ပမံၭကၭၥံၪအထံၫဖံလၫ့နီၪ ဂၪ့ခိၪအီၪမုၬအ့ၬနီၪလၥၨၩႉ ပကမၩပၥ့ၪလဲၪႉ ပကဘၪထိးအၪ့ဎိၪဒၪပၥၭ ပယီၩလီၫဧၪႉ

နးဘွၩး               စီၪခိလဂ့ၩ ထံၭၥိၭၥံၪဧ့ႇ ပစၭထၪ့ အၪ့လဲၩ့ထၪ့ လၧပၧၩန့ဘီၪႉ

                  ၁ႉ ၥုၪ့လၩ့ၥံၪ့ထံၭး                         လၧနဂံၪ့မ့ၬယၫနီၪ ၥုၪ့လၩ့ထၬၥံၪ့ထံၭ အနီၪ နဂံၪ့ဖၧၩ့ကချံၪ့လီၫႉ

၂ႉ ဆိၫ့ကၩ လၩ့ၡၩ ပလၭစတ့ၭး     ဆၧလၧပလၭစတ့ၭနီၪ ဂၪ့ခိၪဘၪခိထၪ့ဝ့ၫဒၪ အခၪ့ထံၭခၪ့ဎၧၩ့ကမံၩ့လီၫႉ

၃ႉ ဆိၫ့ကၩ မ့ၪစီၩ့ဂဲး ၥ့ၪၥ့ၪဘၪဘၪဆံၭး        မ့ၪႇ နိၪကၠၪလံၩ လၧလလိၫဘၪလဖၪ လၧပဝဲထၪ့ထၭဘၪနီၪ မီၪ့ဎီၩ့ ပမၩလၩ့ၡၩ ဂၪ့ခိၪ ဂဲၫခိထၪ့ စီၩ့အဆၧထုၭထၪ့ဆၧၥံၪလီၫႉ

နးဎံၫး                မွဲ လၧခဲၫ့ အ့ၪမွဲ ယလ့ၩလၧခီၫ ယကလ့ၩန့ဒၪ ယထံၫဖီၩ့ႇ ပအၪ့ဎွ့ၩအီၩ့ ပလၭစတ့ၭထံၫဖီၩ့ ခိၪမၪခိၪမၪလၧၩ့အ့ၬႉ

အဲၪဆၨၩး            ယၧၩဆ့ ယထဲၩ့ဂံၪ့ခိၭနီၪ ယကလ့ၩအၪ့ဎွ့ၩ ဆၧအထံၭၥံၪဒံၭႉ

နးဘွၩး               မငါလၥၨၩႉ အ့ၪပယိထွ့ၫပနဲၩ့ဎီၩ့စွါဘဲၫ ပဂၪ့ခိၪချိၫ့ယီၩ မွဲကဂဲၫချံၪ့လၫ့ထဲၩ့လီၫႉ ပဂၪ့ခိၪချိၫ့ အီၪမုၬမၬ ပထီးအလူၬ ပကအီၪမုၬ မွဲအ့ၬဧၪႉ

အဲၪ- ဎံၫး            မွဲဘၪနီၪႉ

အဲၪဆၨၩး            ကဲ ပချဲၩ့နီၪမုၬ ထံၩၥိၭဧ့ႇ ပကထဲၩ့ဒံၭႉ

နးဘွၩး               မွဲယူၭႇ ဆၧခိးဆၧတၩ အၪမၬလီၫ ဆၧခိလါနၫ့ နၥံၪဂဲၫအီၪကွ့ၩယၧၩႉ ယကဖ့ၪလၫ့အ့ၪနၥံၪ လၭဆီၪ့ ဆၧအထံၭ ကဂၩကထံၭနဲၪႉ ပၫပၩ ဖရၫ့စ့ၭ လီၩထၬ ဆၧယိထွ့ၫ ပဂၪ့ခိၪနဲၩ့ဎီၩ့အဂး ပကဘၪၥုၪ့ ၥံၪ့ထံၭ အၪအၪစွါဘဲၫႉ

နးဘွၩး               အိၩ ဆၧခိးဆၧတၩနဲၪႉ