ၦဆံၫ့ဎံၪ Benedict & Scholastica အဂဲး
လၧဎြံၬဆၧအဲၪဆၧကွံၩဖၧၩ့ ထၧၫ့ဖုဝဲထံၩၥိၭထီးအလူၬၥံၪဧ့ႇ မံၩ့ဎိၩၥၪဖျီၪ မုခွၫလၧအအီၪအနိၪ့ အဆၧရၩလၩ့ဖၧၩ့ မုကနံၩယီၩ ယအဲၪဒိၭ ရၩလၩ့န့အ့ၪဘၪနၥံၪနီၪ မွဲဝ့ၫဒၪ ၦဆံၫ့ဎံၪ Benedict ဒဲ scholastica အဂဲးအကၠီၩ့နီၪလီၫႉ ၦဆံၫ့ဎံၪ နံၫဂၩယီၩမွဲဝ့ၫ ဆၧၫ့ဖုဝဲ အဎဲၩ့နီၪလီၫႉအဝ့ၫၥံၪ အမိမိဖါဖါၥံၫဖီၩ့ခွံၬဂီၩ့ ၦဆံၫ့ဎံၪ Benedict စ့ၪထၪ့လၧအဂံၪ့ဂီၩ့ ၥုၪ့ကၠီးဂီၩ့ ကၧၩ့ထၪ့ အဲၩ့ၥဲၭခရၧၫ့နီၪလီၫႉခရၧၫ့အမံၩ့နီၪမွဲဝ့ၫ Benedict နီၪလီၫႉ လကၭဒ့ၭဘၪ အဝ့ၫအဖုမုၪ ဒဲ ၦမုၪဂူၫၥံၪ ကကဲၪထၪ့အဲၩ့ၥဲၭ မံၩ့ထၭမုၪအဂး အၥၭလူၬအီၪအကၠီၩ့ၥ့ၪယၫဝ့ၫတၭ ၥုၪ့ထၪ့ထဲၩ့ကၠီးလၧခဲၫ့ကကၠီးနီၪဘူၭထဲးနီၪလီၫႉ ၦဆံၫ့ဎံၪ scholastica နီၪအီၪလၧကၠဲၬလူၬကၠဲၬထၫ အၪမၬဒ့ၭနီၪလီၫႉ ၦဆံၫ့ဎံၪ Benedict ယီၩ ကနံၪ့ကကၠၪလ့ၩဂၬလၧ အဖုမုၪ scholastica အီၪနီၪလီၫႉ
ကနံၩနီၪတၭ အထၧၫ့ဖုဝဲနံၫဂၩချဲၩ့ဂီၩ့ ၦဆံၫ့ဎံၪ Benedict ကထဲၩ့ထီကၠီးအခံၫနီၪ အဖုမုၪကိၭထၬအဝ့ၫ လၧခဲၫ့ကနံၩ့လန့ဘၪအကၠီၩ့ အဖုမုၪ scholastica ဘၩဆိၪဖၪဆၧလၧ ကဆါယွၩအီၪတၭ လံၩလဖုၬၥံၪ ဆၧဆၧၩ့ဂဲၫလၩ့ဂီၩ့ အဝဲခွၫ Benedict ထဲၩ့လန့လၧဘၪနီၪလီၫႉ ဆၧနီၪအကၠီၩ့ အထၧၫ့ဖုဝဲနံၫဂၩဘၪထွၫလၧ နးၥၭအဂဲးဂီၩ့ ကၩ့ကၩဎိၭလၩ့ဆၧနီၪလီၫႉ အဝဲခွၫ Benedict ထဲၩ့လၧကၠီးလၩ့မၬယံၬ ၥၧၫ့ၥၫ့ဂီၩ့ အဖုမုၪ scholastica ၥံၪဖီၩ့ခွံၬဝ့ၫဒၪနီၪလီၫႉ ဆၧနီၪအကၠီၩ့ ၦဆံၫ့ဎံၪ scholastica ယီၩ လံၩလဖုၬလၩ့အခံၫ့ ၦဘၪဒိၭနဲၩ့ၥၭမွဲဝ့ၫ ၦဆံၫ့ဎံၪ နီၪလီၫႉ အဲၪကွံၩဘၪထၧၫ့ဖုဝဲထံၩၥိၭ ထီးအလူၬ မွဲနၥံၪလၧၫ့ဎွ့ၩဝ့ၫ ဒၪလၧ ကဆါဎြံၬအဆၧအဲၪဆၧကွံၩ လါဆံၭႉ
