ဒိၩ့ပၥံၫ့အဂဲး -၂

လၧဖျိၩ့ဖျိၩ့အိၩ ဖျိၩ့ဆၨၩလဖၪနီၪ အီၪလၧ စကီၫဝံးဒီၪ့ ဝံးၥၫ့တွဲနီၪလီၫႉ ဖျိၩ့ၡိ ဖျိၩ့ၡၩ့ ဒဲ ခၠ့ၩဆၨၩဆၬလဖၪ ကဲၪယံၫယါ ဖျိၩ့ၡိဝံးနီၪလီၫႉ အထီနီၪ ၦဖျိၩ့ဖိၪၥံၪလဖၪ မွဲအခိၪနါၥံၪ အီၪဝ့ၫဆ့နီၪလီၫႉ လၧခဲၫ့ မိၫဒဲပယၩ့ ဂဲၫအၪ့ဂိၫလိၬ ၦဖျိၩ့ဆၨၩဖိၪၥံၪအီၪအလးယီၩနီၪလီၫႉ မွဲဆၧဘဲၫနီၪ ၦဖျိၩ့လနၩ့နၩ့ထီၩ့လၧ ရခဲၫ့ခိၪလီၩ့ခၪ့ထံၭမွဲဂ့ၩႇ လနၩ့နၩ့ ထီၩ့လၧ မံၩ့လၬကျၩမွဲဂ့ၩႇ လနၩ့နၩ့နီၪဘိၭ အီၪထးလၧ ဖံၬဒၩလး ထီၩ့ဎံၩ့လးနီၪလီၫႉ အၪဒၪဆၧ ခၠ့ၩဆၨၩဆၬ လဖၪနီၪ ကဲၪထၪ့ကၠၭ မိၫ ဒိၩ့ဝိၩၥံၪနီၪလီၫႉ လၧခိၪလီၩ့ခိၪမွဲဂ့ၩႇ ခိၪလီၩ့ခၪ့ထံၭမွဲဂ့ၩႇ ၦလၧအဘၪစဲၪ့လဖၪနီၪ ခိၪလၩဘွၩၥံၪဂဲၫနုၬလၫ့ဂီၩ့ ပၧၩ့ထၪ့ ဆၧလးယီၩအခၫ AD 1825 နီၪ အဝ့ၫၥံၪ ဂဲၫထဲၩ့ထဲၩ့လၧ ခးဆၧၫ့ဂီၩ့ ဆုးအီၪဝ့ၫ ထီးထီၩ့မုဆၫကနံၩ ယီၩနီၪလီၫႉ မွဲဆၧဘဲၫနီၪ ထီးမုဆၫကနံၩယီၩ ထံၫထၪကျိၩ့ ခးဒီၪ့လးဝၩ့ဖၭဒိၪနီၪ ပကဒၪဘၪ ဖျိၩ့ဆၨၩဖိၪၥံၪ အီၪအၪမၬနီၪလီၫႉ

ပၥံၫ့ႇ မၠီၩ့မၠၭ ဒဲ မအူၪပ့ၫဝံးၥံၪ ခိၪလၩဘွၩ ဂဲၫပၧၩ့ၥၫ့အထီနီၪ မိၫ ဒီၩ့ဝိၩလဖၪ ထၪ့ဒုၪဒၩဆၧ အၪမၬနီၪလီၫႉ အဝ့ၫၥံၪ လီၩ့ထမျါဆၧ လီၩ့အၪ့ဂိၫလိၬဆၧနီၪလီၫႉ အထီနီၪ ဖျိၩ့ဆၨၩဖိၪၥံၪလဖၪ မၩဆၧၩ့ထၪ့  ခိၪလၩဘွၩ ပဒိၪနီၪလီၫႉ AD 1900နီၪ လၧဒိၩ့ပၥံၫ့ဖၧၩ့ ၦဖျိၩ့ အဆၧဝံ ဆၧနၬအီၪဝ့ၫ ၈၅၃၀၀ နီၪလီၫႉ ထီး ၁၉၁၁နံၪ့နီၪ ၦဖျိၩ့ဂဲၫအီၪထၪ့ဝ့ၫ ၉၇၉၀၆ ဂၩနီၪလီၫႉ ဖျိၩ့ဆၨၩလနၩ့နၩ့နီၪ ကဘၪလီၩ့လၩ့အၥၭ လၧဖျိၩ့ မွဲၥၭမဲၪဝ့ၫလီၫႉ မ့ၬမဲကၠၭလီၫႉ လါနၫ့ လၧခဲၫ့ ခိၭလိၪဘယီၩ ဘဲၫၥိၭ လအီၪလၧၩ့ဘၪဒဲ ပကဲၪဖျိၩ့အကၠီၩ့ ပလီၩ့လၩ့ပၥၭလၧဖျိၩ့ ကဘၧၫ့ ဂ့ၩဂ့ၩအကၠီၩ့ ဖံၫဖူၫၥံၪ အဆၧယိလါအီၪနီၪလီၫႉ

ၦဖျိၩ့ဆၨၩဖိၪၥံၪ လၧအအီၪ ဝံးပၥံၫ့ႇ မၠီၩ့မၠၭႇ ဟ့ၩၥတၭႇ မအူၪပ့ၫ ဒဲ ဖၠၫပိၫၥံၪ အဆၧဆူၩနဲၩနီၪ အၪဒၪဆၧ ဆၧအၪ့ဎဲၩ့လုၫလါထူၪရူၪဒဲ ဖျိၩ့ဘုၭဒၭၥံၪနီၪလီၫႉ ဎရံၬဖိၪၥံၪနီၪ အီၪဝ့ၫၡၩခိၬဒံၭနီၪလီၫႉ ပထံၫခးယီၩ မွဲဘုၭဒၭ ဆၧဘိၪ့ဆၧဘၩ ဂဲၫထီၩ့ဂု အဆိၪထုၬနီၪလီၫႉ ဆၧဘိၪ့ဆၧဘၩယီၩ ၦလၧဟီၩတရၩႇ ၦလၧဖီၪ့ထၪ့ဖံၭထၪ့ ဆၧဘိၪ့ဆၧဘၩအီၪအကၠီၩ့ စဎွၩၥံၪႇ ထံၫဖိၪခးဆါၥံၪလဖၪ ဆူၩနဲၩ ကၠဲၬဂီၩတမါ နီၪလီၫႉ လၧခဲၫ့ ဎရံၬ ဆၧဘိၪ့ဆၧဘၩ ဂဲၫထီၩ့လၧ ခးပယၩ့ဖၧၩ့ယီၩနီၪလီၫႉ