**ၦဆူနဲၩဖိၪၥံၪအဂၩ၁၀၀ဘျဲၪ လ့ၩဘိၪ့ထၪ့ဘၩထၪ့ ထုၪ့စူၪယၫလၧ အလမ် ထုၪ့စူၪယၫဆံၫ့ဎံၪခိၪလီၩ့ဖၫ့ခိၪ **

ခီၩခီၩအိၩ ဆၧလ့ၩဘိၪ့ဘၩထၪ့ၡီၩ့လၩ့ အီၪလၧမြစ်ကြီးနားဆၧအီၪကီၪ့ဖၧၩ့ အလမ် ထုၪ့စူၪယၫဆံၫ့ဎံၪ ဆၧထံၪလၩ့ဒီၪလၩ့ အီၪကိနံၪ့ဒ့ၭလါနၫ့ မွဲလၧထံၪဂဲးခးဂဲးအကၠီၩ့ ဘၪထိးဖျါထုၬထၬၥၭ အၪနံၪ့အၪလၩဂီၩ့တၭ ကနံၪ့ယီၩနီၪ လၩ့ဆၫ့ဒၪဆၧ ၦၡၩမၩလၩမၩဖၩ့ထဲၩ့န့ဝ့ၫဒၪယူၭအကၠီၩ့ ၦၡၩလ့ၩဝ့ၫဒၪ ကအီၪဖိၭဘိၭအဂၩ ၁၀၀၀ဘျဲၪနီၪလီၫႉ
၂၀၂၆နံၪ့ လၩစဲၭတံၫ့ဘၧၫ ၁၄ၥၫ့ လဂီၩ၁၁နၩရံၫ မံဆၩဆၧလုထၪ့ဆံၫ့ဎံၪနီၪ ကၫဒံၫနဲၫ ခၠၩစဘိၫ လ့ၩခိၪလ့ၩနါဝ့ၫဒၪလီၫႉ ၦအလ့ၩဘိၪ့ထၪ့ဘၩထၪ့ၡီၩ့ ထုၪ့စူၪယၫလဖၪနီၪ အၪ့ကံၩ့ဘၩဆိၪဖၪကၠၭ အဂံၪ့ဒီၪ့ဖိၪၥံၪအဂးႇ အဆၧဆီၪ့ဆၧချဲၫ့အဂးႇ ဆၧကိၪ့ဘၪကိၪ့ၥ့ၪအဂး ဒဲ ထံၪခးအဂး လၧထုၪ့စူၪယၫခၪ့ထံၭနီၪလီၫႉ

ဆၧၥၭထိၬပရၧၫ့ဖၧၩ့ “လၧဆၧဒုၭဆၧခၭႇ ဆၧၡၪ့ဆၧယၬ ဒဲ ဆၧလထံၪဆၭဘၪနးမံၩ့အကျၩ ထုၪ့စူၪယၫယီၩ မွဲဝ့ၫဒၪ ဆၧယိလါဒဲ ဆၧမၩမုၬၥၭ အခၪ့ထံၭခၪ့ဎၧၩ့လီၫႉ ထုၪ့စူၪယၫနီၪ ယိၭဆၧၩ့အ့ၪပၧၩ ပဆၧၥၭအုၭလဖၪလီၫႉ ၦဆူနဲၩဖိၪၥံၪ အဆၧၥုၪ့အုၭၥၭအုၭလဖၪနီၪ ကဘၪဂဲၫဆိၬန့ဝ့ၫလၧ ကဆါယ့ၫၡူၬဎြံၬအီၪဂီၩ့ ကဘၪဒိၭနဲၩ့ၥၭလၧယွၩအဂးႇ ၥၭဘၪ့လဖၪအဂး မုဆၫကနံၩယီၩ ကဲၪထၪ့ဝ့ၫဒၪ ဆၧကၪဆၧဂဲၩ ဆၧၡၪ့ဆၧယၬ ဒဲ ဆၧနိၫ့ဆၧနၭလဖၪနီၪ စ့ၩရၫ့အ့ၪပၧၩ ပထီလၧယၫလန့ဘၪအဂဲးႇ ၥၭဘၪ့လဖၪနီၪ ဘဲၫမွဲၦအဘၪၥုၪ့ထၪ့ ခးပယၩ့ထံၪခးအထီလၧယၫအၥိၭ မွဲဒံၭလၧ မိဆၧအီၪကီၪ့အဂးအရ့ၩဒိၪဝ့ၫၦလဖၪအဂဲး” ကၫဒံၫနဲၫယီၩ လီၩလၩ့လၬလၩ့ဝ့ၫ ဘဲၫနီၪအၥိၭလီၫႉ

ၦဆူနဲၩဖိၪၥံၪလဖၪနီၪ အဂံၪ့ဒီၪ့ဖိၪၥံၪ အဆၧဆီၪ့ဆၧချဲၫ့အဂးႇ ဆၧကိၪ့ဘၪကိၪ့ၥ့ၪအဂးႇ အဂံၪ့အဎၫ့အဂး ဒဲ ကိနံၩဒ့ၭကအၪ့ဘၪအီၩဘၪအဂးနီၪ အၪ့ကံၩ့ဘၩဆိၪဖၪကၠၭဝ့ၫဒၪနီၪလီၫႉ
အလမ် ထုၪ့စူၪယၫဆံၫ့ဎံၪယီၩ လၧအဖီၩ့ခွံၬ ၁၉၈၃နံၪ့ဒၪအိၩ Fr. Paul Lasang La လ့ၩခိၪလ့ၩနါ မၩကဲၪထၪ့ဝ့ၫဂီၩ့ ကဲၪထၪ့ ကၭၥလံၬ ၦဆူနဲၩဖိၪၥံၪအဂး ဆၧလ့ၩအၪ့ကံၩ့ဘၩဆိၪဖၪဆၧ အလးအကျဲၩ့နီၪလီၫႉ လၧလးကျဲၩ့ဖၧၩ့ ဆၧကၪဆၧဂဲၩလဖၪအကၠီၩ့ ဘၪထိးဖျါထုၬခွံၬၥၭအၪနံၪ့အၪလၩလါနၫ့ ကနံၪ့ယီၩ ၂၀၂၆နံၪ့နီၪ စၭထၪ့မၩကဲၪထၪ့ထဲၩ့ ဆၧထံၪလၩ့ဒီၪလၩ့ယီၩန့နီၪ ၦဆူနဲၩဖိၪၥံၪအဂး မွဲအခီၫပယီၫအီၪဝ့ၫဒၪဒိၪမၬ ဆၧထံၪလၩ့ဒီၪလၩ့ကမံၩ့နီၪလီၫႉ
ၦဆူနဲၩဖိၪၥံၪလဖၪ အၪ့ကံၩ့ဘၩဆိၪဖၪကၠၭ ကၠၧၫ့အဝ့ၫၥံၪအဂးလီၫ လကၭဘၪတၭ ဆၧဎူၫဆၧဎၩ့အဂးႇ ဆၧဘၠၩ့ဘျၪထဲၩ့ၥၭဆၧဆၫအဂးႇ ဆၧယိလါကအီၪထၪ့အဂး ဒဲ ထံၪခးထီလၧယၫအဂးဆ့ စူၭကီၪ့အၪ့ကံၩ့ဘၩဆိၪဖၪကၠၭဝ့ၫဆ့အဂဲး ပန့ဘၪဆၧပရၧၫ့ယီၩလၧ RVA Lisu Service အအီၪနီၪလီၫႉ