ပအီၪၥၭမၧၫ့ ဂံၪ့
ပအီၪၥၭမၧၫ့ဂံၪ့ မွဲဝ့ၫ ဂၪ့ခိၪယီၩ အီၪဝ့ၫဖိၭဘိၭအနံၪ့ ၄ႉ၅၄ ဘံၫလံၫယၫ့အကၠီၩ့ ဆၧအၪ့ဎၬထယါထၬအီၪနီၪလီၫႉ ဆၧဖိၪဆၧဎါၥံၪ ဂဲၫမၧၫ့ထၪ့အီၪထၪ့ မွဲပရွံဎီၩ့ကန့အ့ၬနီၪလီၫႉ ၦခမျၧးဖိၪၥံၪလဖၪ လၧဂၪ့ခိၪၦမွံၩလဖၪအဖၧၩ့ ပဂဲၫကဲၪထၪ့ လၧခဲၫ့ထုၬနီၪလီၫႉ ဆၧလၧၦၡၩနီၪ မွဲဂၪ့ခိၪယီၩ ဆၧထီးအလူၬ အဆၧထိၪဆၧဒီၩ့နီၪလီၫႉ နဲၩ့ဎီၩ့အဂး ဂၪ့ခိၪထၧၫ့ဘံၪ့ယၫ ထံၫခးလၧအၥ့ၪယၫမူၩဒၩလဖၪ ဖီၪ့ထၪ့ဖံၭထၪ့ဝ့ၫ ခိဆၧၩ့ချံၪ့အၪ့လဲၩ့ထၪ့အၥၭ ဘဲၫကလၩ့ၡၩအဂး မၩထၪ့ဝ့ၫနီၪ ပထိးဆၧၫ့ဂ့ၩဂ့ၩနီၪလီၫႉ
ဆၧခိဂဲၫဆီၪ့ထၪ့ဒဲ ပၫ့လဲၫ့ထံၫအမ့ၬပၫအထီၫ့ႇ ဆၧဆၧၩ့အဒီၩ့ဂဲၫအၪ့လဲၩ့ထၪ့အၥၭဒဲ ဂဲၫနၭထၪ့ ခိဆၧၩ့ချံၪ့အဆၧၫ့အထီလဖၪ ၡၩခမျၧးအဆၧဆီၪ့ဆၧချဲၫ့ဒဲ အစုၪလအီၪဘၪ ဆၧအၪ့ဆၧအီၩလဖၪႇ ထံၫအလၧၫ့အဎွ့ၩကအီၪအဂးဒဲ လၧအၫဖရံကၭ ၡၩခံးဂးခီၫၡၩ ဆၧလ့ၩထၪ့လ့ၩထီၪ့နီၪ မၩၥၭမဲၪဝ့ၫအကၠီၩ့ ဘၪထွ့ၫလၧ ဂၪ့ခိၪခိဆၧၩ့ချံၪ့ခရၧၫ့ အီၪကီၪ့ဎိၭလၩ့ နဲၪထၪ့ဝ့ၫနီၪလီၫႉ ၂၀၂၁ နံၪ့ လၩ အီဂဲၭ ၉ၥၫ့ ဘၪထွ့ၫလၧ ခိဆၧၩ့ချံၪ့အၪ့လဲၩ့ထၪ့အၥၭ ပဒိၪအဆၫ့ခရၧၫ့ (Intergovermental Panel on Climate Change (IPCC) နီၪ ဆၧလီၩ့ဎွါအၪ့ဎၬ အၪမၬအဖၫ့ခိၪ ဆဲၩ့ယၫ့ကိၪ့ၥ့ၪလဖၪ ကွ့ၭထၬထဲၩ့ဂီၩ့ အခံၫ့ဎိၭနံၪ့အဖၧၩ့ ကျ့ၭစၨၭကွ့ၭထၪ့ဝ့ၫဂီၩ့ ထုၭထၪ့ဝ့ၫနီၪလီၫႉ လါနၫ့ လံၬဘျံၭယီၩ အီၪပထုၬဝ့ၫဒၪ ဆၧလီၩ့လၩ့လၬလၩ့ကဒုၩလီၫမွဲဝ့ၫ ပအခံၫ့လၧၫ့လၧၩ့အ့ၬ နီၪလီၫႉ
မွဲဆၧဘဲၫနီၪ ပအီၪၥၭမၧၫ့ အီၪဝ့ၫကဖျိၪ့ယီၩ ဂၪ့ခိၪဂံၪ့ယီၩ လၧပမၩန့အနိၪ့ ပကကျ့ၭစၨၭဖီၪ့ထၪ့ဖံၭထၪ့ကၠၭကိၭဂၩအကၠီၩ့ဒဲ မွဲနၥံၪကဖီၩ့ဖျ့ၭဝ့ၫဒၪလၧ နဲၩ့ဎီၩ့အဆၧလၩ့အၪ့ယိၫကိၭဂၩဒ့ၭလါဆံၭႉ
