ၦဆံၫ့ဎံၪ Joseph De Anchieta, SJ အဂဲး
လၧဎြံၬဆၧအဲၪဆၧကွံၩဖၧၩ့ ထၧၫ့ဖုဝဲထံၩၥိၭထီးအလူၬၥံၪဧ့ႇ မံၩ့ဎိၩၥၪဖျီၪ မုခွၫလၧအအီၪအနိၪ့ အဆၧရၩလၩ့ဖၧၩ့ မုကနံၩယီၩ ယအဲၪဒိၭ ရၩလၩ့န့အ့ၪဘၪနၥံၪနီၪ မွဲဝ့ၫဒၪ ၦဆံၫ့ဎံၪ Joseph De Anchieta, SJ အဂဲး အကၠီၩ့နီၪလီၫႉ ၦဆံၫ့ဎံၪ Joseph De Anchieta ယီၩ အီၪဖျဲၪလၧ နံၪ့ ၁၅၃၄ နံၪ့ လၧခး ၦ့ၫၥ့ၭနီၪလီၫႉ ၦဆံၫ့ဎံၪ Joseph ယီၩ မၩၥၫထနၫ ဆၧမၩ ၥၭဆီၪ့အီၪအၪမၬဒ့ၭအကၠီၩ့နီၪ နုၬလၩ့လၧ ခး Potugi Jesuit ခရၧၩ့ဖၧၩ့ဂီၩ ဘၪမၩၥၫထနၧဆၧမၩလၧ ခး Brazee နီၪလီၫႉ လၧခး Brazee နီၪ အဝ့ၫ မၩၥၫထနၫအဆၧမၩ ကဖျီၪ့အဂး ဘၪစၭထၪ့ၥီၪ့လိၪၥၭ တဝၫ့ဖိၪၥံၪ အဆၧချဲၩ့နီၪလီၫႉ
အခံၫ့ယံၬထၪ့ကကၠၪ ချဲၩ့ တဝၫ့ဖိၪၥံၪအဆၧချဲၩ့ ၥ့ၪ ဂ့ၩဂ့ၩဘၪဘၪ အကၠီၩ့နီၪ လၧ တဝၫ့ဖိၪၥံၪဒဲ တဝၫ့ခိၪနါၥံၪ အကျၩ ဆၧဖ့ၭထံၩဖံၭၥိၭ ဂ့ၩထၪ့အၬမၬဒ့ၭနီၪလီၫႉ အခီၩ့ဒၪအိၩ တဝၫ့ဖိၪၥံၪနီၪ အီၪအလး အဂုးအခၧၫ့အီၪအ့ၬႉ လီၩ့အီၪလၧ ၡိၭဖၧၩ့နီၪလီၫႉ လၧခဲၫ့နီၪ ၦဆံၫ့ဎံၪ Joseph ယီၩ အဝံၫၥံၪအီၪအလး အဂုးအခၧၫ့ကၥ့ၪအဂးႇ မၩအၪ့ဆၧမၩ အမံၩ့မံၩ့ကၥ့ၪအဂး ၥီၪ့အ့ၪအဝ့ၫၥံၪနီၪလီၫႉ ဘၪမနီၪလဲၪ စွါဘဲၫ အဝ့ၫၥံၪယီၩ မၩဆၧမၩၥ့ၪအ့ၪ ႇလီၩ့အီၪလၧၡိၭဖၧၩ့ဂီၩ့ မၩၥံၫအၪ့လိၬၥၭနီၪလီၫႉ အခံၫ့ယံၬထၪ့ကကၠၪ ၦဆံၫ့ဎံၪ Joseph ယီၩ အၥၭဎိၩထၪ့ႇ မၩၥၫထနၫအဆၧမၩ စပွံၩၥၭဂီၩ့ နံၪ့ ၁၅၉၇နံၪ့ နီၪၥံၫဖီၩ့ခွံၬဝံၫဒၪနီၪလီၫႉ နံၪ့ ၂၀၁၄ နံၪ့ လၩအ့ၫပျံၫ ၃ ၥၫ့နီၪ ၥၫ့ဎွၩ John Paul ၂ ဂၩလဂၩ ရွံထၪ့အဝ့ၫၦဆံၫ့ဎံၪနီၪလီၫႉ
