ဘၪဆၧၥိၫ့ထၪ့ မိမၫရံၫလၧမူၭခိၪဘၩ့မုး အဘိၪ့မုနံၩ
စံၫ့ပံၫတၧၫ ကၥံၫဒရဲၫ
၁၆.၈.၂၀၂၆
လၩအီဂၧၭ၁၅ၥၫ့နီၪ မွဲဝ့ၫဒၪလၧ ဘၪဆၧၥိၫ့ထၪ့ မိမၫရံၫလၧ မူၭခိၪဘၩ့မုး အဘိၪ့မုနံၩတၭ ကၭၥလံၬဆၧအီၪကီၪ့ အၪဒၪဆၧနီၪ ၥုၭထဲၩ့ဝ့ၫလၧ လၩအီဂၧၭ၁၆ၥၫ့ အတုၬမုနံၩဂီၩ့ မၩလၩမၩဖၩ့ဝ့ၫဒၪ ဘိၪ့မုနံၩယီၩနီၪလီၫႉ
လၧဒိၩ့ပၥံၫ့ဆၧအီၪကီၪ့ယီၩဆ့ မၩလၩမၩဖၩ့ဝ့ၫဒၪလၧ လၩအီဂၧၭ၁၆ၥၫ့နီၪလီၫႉ ၦလၧအလ့ၩခိၪလ့ၩနါ မံဆၩဆၧလုထၪ့နီၪ မွဲဝ့ၫဒၪလၧ ဖာသာရ်ဖီဒဲလစ်နီၪလီၫႉ
“ၦဆူနဲၩထိးဆၧၫ့ထၬ မိမၫရံၫလၧ ဆၧအဂဲး ၄မံၩ့ယီၩလီၫႉ အဆိၪထုၬကမံၩ့နီၪ အဝ့ၫနီၪ မွဲယွၩအမိမိအကၠီၩ့ႇ , နံၫထံၪကထံၪနီၪ မွဲလၧ ၦမုနၩ့ၥံၫ့ဆ့ၬထံၫဎးလဂၩအကၠီၩ့ႇ ၃ထံၪကထံၪနီၪ ဖီၩ့ဖျ့ၭလၧဆၧဒဲၩဘၭအကၠီၩ့ႇ ဒဲ လခဲၫ့ထုၬကထံၪနီၪ မွဲၦမုၪလၧအဘၪဆၧၥိၫ့ထၪ့လၧမူၭခိၪဘၩ့မုးနးခီၫ့ဒဲနးၥၭ နံၫမံၩ့လူၬအကၠီၩ့နီၪလီၫႉ ဆၧအယီၩနီၪ လၧကၭၥလံၬ မိဆၧအီၪကီၪ့အဂး ဘၪထွ့ၫလၧ မိမၫရံၫအဂဲး ဆၧဆူနဲၩ ၄ထံၪနီၪလီၫႉ ကၭၥလံၬဆၧအီၪကီၪ့ဖိၪၥံၪကိၭဂၩဒ့ၭ မွဲကဘၪ ဆူနဲၩယူၭယၪ့မိမၫရံၫဂီၩ့ မွဲကဘၪအၪ့န့အဒီၩ့အထ့ၬလၧ မိမၫရံၫအဆၧအီၪမၧၫ့အီၪဂဲၩလီၫႉ မိမၫရံၫနီၪ မွဲလၧယွၩအလိၪအီၪထၬဝဲၩၦမုၪလဂၩနီၪလီၫႉ ၡၩထီးလူၬအဆၧထိးထဲၩ့တၩ့ထဲၩ့ကန့အဂး ဘၪထိးရွံထၪ့ထၬအၥၭၦမုၪလဂၩလီၫႉ အဝ့ၫယီၩ လီၩ့ဖိၬခိၪနၪ ယွၩအလူအထၫဂ့ၩဘၪစဲၪနီၪလီၫႉ ကဘၪဒၧၩ့ထၪ့န့ ကဆါဎြံၬအဂး အၥီၫ့ဂဲၫလီၩအဝ့ၫကကၠၪ စၭထၪ့လၧအဝ့ၫ အုၩ့လၩ့ထိးဆၧၫ့ဆၧဂီၩ့အခံၫ့နီၪ အဝ့ၫအဆၧၥၭမၧၫ့ယီၩ ဎွ့ၩလၩ့ဝ့ၫဒၪလၧ ဆၧနိၫ့ဆၧနၭ ဆၧၥုၪ့အုၭၥၭအုၭလဖၪလီၫႉ လၧအဝ့ၫအဆၧၥၭမၧၫ့ ထီးဖျီၩ့ယၫဖၧၩ့ ပဒၪဘၪ မိမၫရံၫ အၥၭဘၪထ့ဖၭ ၇မံၩ့နီၪလီၫႉ လၧခဲၫ့ထုၬ လၧထုၪ့စူၪယၫဖၫ့ခိၪ အဖိၪခွၫကဆါယ့ၫၡူၬဎြံၬ ဘၪထိးမၩၥံၫၥၭနီၪ အဝ့ၫဒၪဘၪလၧအမ့ၬၥၪဖၧၩ့ အၥၭဘၪထ့ဖၭဝ့ၫဒၪလီၫႉ လါနၫ့ အဝ့ၫယီၩ လၧကဆါယွၩအဖၫ့ခိၪ အဆၧဆူနဲၩလၩ့ၡၩနးဆိၭအ့ၬႉ စီၪဘၪမၪယွၩနးဆိၭအ့ၬႉ အဝ့ၫယီၩ စံၭခိးစံၭတၩယွၩဒဲ စံၭထၪ့အၪ့အူၭယွၩကိၭဆၧၫ့ထီဒ့ၭနီၪလီၫႉ ဆၧနီၪအကၠီၩ့ ပဝ့ၫၥံၪလဖၪယီၩဆ့ လၧပဆၧၥၭမၧၫ့ဖၧၩ့ ပဘၪဒၪဆၧၫ့ယၫလၧ ဆၧကၪဆၧဂဲၩမွဲဂ့ၩ ဆၧမုၬဆၧၡူၪမွဲဂ့ၩ မွဲပကဘၪ စံၭခိးစံၭတၩထဲၩ့ယွၩ မွဲပကဘၪ စံၭထၪ့အၪ့အူၭထဲၩ့ယွၩ အဆိၩအကၠၪ ဘဲၫမိမၫရံၫအၥိၭလီၫႉ လကၭဘၪမွဲပကဒိၭနဲၩ့ကၠၭပၥၭလၧ မိမၫရံၫအအီၪလါဆံၭ” အဂဲး ၥၫ့ခၫဖံၫဒဲလံယီၩ လီၩလၩ့လၬလၩ့ ဆၧၥၭထိၬပရၧၫ့ ဘဲၫနီၪအၥိၭနီၪလီၫႉ
