(Pekhon ဖယ်ခုံ) ဆၧအီၪကီၪ့ဖၧၩ့ ကမၩပျၩ့ခွံၬ ဆရၫ ဆရၫမုၪလၩ့ၡၩဆၧကၪဆၧဂဲၩအဂး ဝဲထၪ့ စေတမန် ၁ဖၠး**
မွဲလၧ ဆၧတုၩ့ထၪ့တုၩ့လၩ့အကၠီၩ့ ဆရၫ ဆရၫမုၪ လၩ့ၡၩဝ့ၫဒၪ ဆၧကၪဆၧဂဲၩလဖၪ အီၪထၪ့လၧ ဖယ်ခုံဆၧအီၪကီၪ့ဖၧၩ့နီၪလီၫႉ ဆၧနီၪအကၠီၩ့ ဘဲၫၥိၭ ကမၩပျၩ့ခွံၬ ဆၧကၪဆၧဂဲၩယီၩ ကန့ကနၩ့နၩ့အဂးနီၪ လၧအဖီၩ့ခွံၬ လၩယူၫလဲၫ့ ၅ၥၫ့ဒၪအိၩ ၥၫ့ခိၪဒိၪ ဖိလစ် ဘာထူး နီၪ ဝဲထၪ့ဘၪ စေတမန် ၁ဖၠး ၃၄ဘျၩ့လဘျၩ့နီၪလီၫႉ ၥဖၠးနီၪ ဝဲထၪ့ဝ့ၫဒၪလၧ ဟန်အိုဆၧအီၪကီၪ့ ၊ တီခူတဝၫ့ဖၧၩ့နီၪလီၫႉ
၁ဖၠးဝဲထၪ့မံဆၩဆၧလုထၪ့နီၪ ၥၫ့ခိၪဒိၪ ဖံလံလ့ၩခိၪလ့ၩနါဂီၩ့ လၧၥၫ့မုၥၫ့ခၫ ၄ဂၩဒဲ ၦဆူနဲၩဖိၪ အဂၩ ကအီၪဖိၭဘိၭ၂၀၀နီၪ ဂဲၫထၪ့ဝ့ၫဒၪလီၫႉ
“ကဆါယွၩဖ့ၪလၫ့ထၬပၧၩဆၧမၩနီၪ မွဲလၧၦမူၩဒၩလီၫႉ ၥၭဘၪ့လဖၪယီၩ လၧဆၧဆၪ့လၩ့ၥၭဖၧၩ့ လၧဆၧအဲၪဆၧကွံၩဖၧၩ့ လၧဆၧဖ့ၪဆၧၫ့လၩ့ၥၭအဖၧၩ့ မွဲကဘၪမၩဆၧမၩလၧယွၩအဆၨၩဖိၪၥံၪအဂးလီၫ” အဂဲး ၥၫ့ခိၪဒိၪယီၩ စံၭဝ့ၫဒၪ ဘဲၫနီၪအၥိၭလီၫႉ
ၥဖၠးယီၩ ကဝဲထၪ့ဝ့ၫဒၪ ဖိၭဘိၭလၩကဘံၪ့ဂီၩ့ ဖိၪၥၪဆံၭဖိၪၥံၪအဂးလိၪဝ့ၫဒၪ ဆၧကိၪ့ဘၪကိၪ့ၥ့ၪလဖၪနီၪ ကမၩလၧၫ့ဎွ့ၩထၪ့ထဲၩ့ဝ့ၫအဂး ထိစိၩဝ့ၫဂီၩ့ ၥီၪ့အ့ၪၥၭဘၪ့ဖိၪၥံၪယီၩ ဆၧကိၪ့ဘၪကိၪ့ၥ့ၪလဖၪလီၫႉ
ၦမူၩဒၩအီၪ ၥၫ့ခၫ ယောဟန်ပေါလု လွယ် နးဆ့ ၥၭဘၪ့ၥံၪယီၩ ၦလၧအဆၧယိလါလၩ့မါလဖၪအဂး မွဲ ကဘၪကဲၪထၪ့ ထံၫလၪဒဲ ဆၧဖၩ့ အဂး လၧဆၧဆၪ့လၩ့ၥၭဖၧၩ့ ကဖ့ၪဆၧၫ့လၩ့ကၠၭၥၭအဂး နီၪ အဝ့ၫယီၩ ဖ့ၪဂဲးဖ့ၪဘၭ ၥၭဘၪ့ဖိၪၥံၪနီၪလီၫႉ
အခံၫ့ယံၭနး၆နံၪ့ဘျဲၪဆၧတုၩ့ထၪ့တုၩ့လၩ့အကၠီၩ့ လၧဖယ်ခုံဆၧအီၪကီၪ့ဖၧၩ့ ဂံၪ့ဒီၪ့ဖိၪအီၪလၧအထီၫ ဘၪခွံၬၡိၬထးဂံၪ့လးဎုၬလးလဖၪဂီၩ့ ဘၪစဲၪ့မံၩ့ဂၭဖျိၭကၠၭအကၠီၩ့ ဆၧကိၪ့ဘၪကိၪ့ၥ့ၪအနိၫ့နးဆ့ လၩ့ဆ့ၭလၩ့ယွၩထးအၪမၬလ့ၬနီၪလီၫႉ စေတမန် ၥဖၠးယီၩ မၩဎွ့ၩထၪ့ထဲၩ့ ဆရၫ ဆရၫမုၪလဖၪ န့ဝ့ၫဒၪ လကၭဘၪ လၧၡၩခံးဂး အဂး ဘဲၫအီၪဖျဲၪထၪ့ ၥၭဘၪ့ခိၪနါလဖၪ ကန့ဝ့ၫဒၪအဂး ယိလါထၬဝ့ၫနီၪလီၫႉ
