**ဝံးတခိၩ့ၥၭဘၪ့ ကီၫမၡ့ၫ မၩကဲၪထၪ့ (သံစဉ်စမ်းရေ)ဆၧၥၭအွံၪပြၧၩ့ဆၧ ၄ဘျၩ့လဘျၩ့အဂဲး **
ဝံးတခိၩ့၊ လၩယူၫ ၂၈ၥၫ့
ဝံးတခိၩ့ ၥၭဘၪ့ကီၫမၡ့ၫ လ့ၩခိၪလ့ၩနါဂီၩ့ မၩကဲၪထၪ့ (သံစဉ်စမ်းရေ)ဆၧၥၭအွံၪပြၧၩ့ဆၧ ၄ဘျၩ့လဘျၩ့ တၭ ဆၧၥၭအွံၪပြၧၩ့ဆၧ အဆိၫ(ပဏာမအဆင့်)နီၪ ဖ့ၪပြၧၩ့ဝ့ၫလၧ လၩယူၫ ၂၈ၥၫ့ဒၪအိၩ လၧဝံးတခိၩ့ စိန့်ဩဂတ်စတင်း ၥရိၬလးဝၩ့ဖၧၩ့နီၪလီၫႉ
ကဒုၭဒိၪထၪ့ထီၫထၪ့ ဆၧၥၭအွံၪၥၭဆၧၫ့လဖၪအဂးဒဲ စံၭထၪ့အၪ့အူၭယွၩဆၧၥၭအွံၪအနိၫ့လဖၪ ကလ့ၩထၪ့လ့ၩထီၫအဂး ထိစိၩဝ့ၫဂီၩ့ မၩကဲၪထၪ့ဆၧပြၧၩ့ယီၩ အီၪ၄နံၪ့ယူၭနီၪလီၫႉ
“လၧကၭၥလံၬဆၧအီၪကီၪ့ဖၧၩ့ ၥၭဘၪ့လၧအလူမုၬ အီၪဝ့ၫဒၪအၪမၬလါနၫ့ ကဒုၭဖျီၪထၪ့ကၠၭၥၭအဂးခီၫ အခွးအယၬၡၩဝ့ၫဒၪတၭ ကမိဒုၭဒိၪထၪ့ထီၫထၪ့အ့ၪ ၥၭဘၪ့ဖိၪၥံၪအကၠီၩ့ မၩကဲၪထၪ့အ့ၪဝ့ၫ (သံစဉ်စမ်းရေ) ဆၧပြၧၩ့ယီၩအဂဲး” ဝံးတခိၩ့ဆၧအီၪကီၪ့ ၥၭဘၪ့ကီၫမၡ့ၫခိၪနါ ဖာသာမာရ်စီအန်သက်ကျော် စံၭဝ့ၫဒၪနီၪလီၫႉ
လကၭဘၪ လၧအဖီၩ့ခွံၬနံၪ့လဖၪအဖၧၩ့ ၦၡၩဂဲၫထဲၩ့ပြၧၩ့ထၬဆၧလဖၪနီၪ မုဆၫကနံၩယီၩ ကဲၪထၪ့ ပရော်ဖက်ရှင်နယ် ၦၥၭအွံၪဆၧလဖၪအဂဲးႇ ဆၧမၩနၧၫ့ခၫ့ဖျိၫ့ဘဲၫနီၪၥိၭလဖၪအီၪဝ့ၫဒၪနီၪ ကဆုးထဲၩ့မၩကဲၪထၪ့ ဆၧၥၭအွံၪပြၧၩ့ဆၧယီၩအဂး န့ထၪ့ဂဲးဘၭဒိၪဒိၪလ့ၬအဂဲး အဝ့ၫ ဆုးထဲၩ့စံၭဝ့ၫလီၫႉ
လၩ့ဆၫ့ဒၪဆၧ ကနံၪ့ယီၩ ကၠၧၩ့ဒၪကၭၥလံၬၥၭဘၪ့ဖိၪၥံၪ လကၭဘၪဒဲ ဘၧၩ့ထံၫႇ ၥံၭၥီၫမုနံၩၦဆူနဲၩဖိၪၥံၪႇ မက်သဒစ် ဒဲ အင်္ဂလီကန် ဆၧဘိၪ့ဆၧဘၩဖိၪၥံၪဆ့ မွဲကိၭဖံၭၥိၭဝ့ၫဆ့တၭ အဝ့ၫၥံၪဆ့ ဂဲၫနုၬလၩ့ပြၧၩ့ဝ့ၫဆ့နီၪလီၫႉ
ဘၪကိၭဖံၭၥိၭဝ့ၫ ဘဲၫယီၩနီၪ ဘၪန့လဲၪစွါဘဲၫ ထိစိၩဝ့ၫဒၪ လၧဆၧစံၭထၪ့အၪ့အူၭယွၩအဖၧၩ့ ၦဎြံၬဖိၪၥံၪအကျၩ ဆၧဖံၭထံၩဖံၭၥိၭ ဘဲၫကဂုးခၧၫ့ထၪ့အၪနဲၪ့ဘဲၫယီၩအဂးနီၪလီၫႉ
ကနံၪ့ယီၩ ၦဂဲၫပြၧၩ့ဆၧလဖၪ အီၪဝ့ၫဒၪ ၇၅ဂၩတၭ ဆၧပြၧၩ့အဆိၫနီၪ ကဆုးထဲၩ့ဒုၭပြၧၩ့ဝ့ၫ မု၃နွ့ၫနီၪလီၫႉ အ့ၪဂီၩ့နီၪ ၇၅ဂၩအဖၧၩ့ ဖျီၪဝ့ၫဒၪ အဂၩ ၄၀ နီၪ ကဆုးထဲၩ့ ဒုၭပြၧၩ့ဝ့ၫ နံၫဆၫ့လဆၫ့နီၪလီၫႉ လၧအဂၩ ၄၀ဖၧၩ့ ကရွံထၪ့ဝ့ၫအဂၩ၂၀ နီၪလီၫႉ အဂၩ၂၀အကျၩ ဖျီၪဝ့ၫဒၪ ၁၀ဂၩနီၪ ကဘၪဆုးပြၧၩ့ဝ့ၫ လခဲၫ့ထုၬအဆၫ့နီၪလီၫႉ လၧၦပြၧၩ့ဆၧ ၁၀ဂၩနီၪအကျၩ ကရွံထၪ့ဝ့ၫ ၦမၩန့ခိၪဖၭ အဆၫ့(၁) ႇ အဆၫ့ (၂) ဒဲ အဆၫ့ (၃) လဖၪဂီၩ့ ကဖ့ၪလၫ့ဝ့ၫ ခိၪဖၭလဖၪနီၪလီၫႉ
ကနံၪ့ယီၩ ဆၧပြၧၩ့ဆၧအဂး ခိၪနါကဘဲၩ့ဖၭဆၧလဖၪနီၪ မွဲ ၦၥၭအွံၪဆၧ နွဲ့ရီဝင်း၊ သံသာဝင်း ဒဲ နေနေ ၥံၪနီၪလီၫႉ
လၧဆၧၥၭအွံၪၥၭဆၧၫ့ဖၧၩ့ ၥၭဘၪ့ဖိၪၥံၪ ဘဲၫကမၩဒိၪထၪ့ထီၫထၪ့ထဲၩ့ စံၭထၪ့အၪ့အူၭယွၩဆၧၥၭအွံၪလဖၪအဂး ဒဲ ယွၩဖ့ၪလၫ့ထၬအဝ့ၫၥံၪအဆၧၥ့ၪဆၧဘၪလဖၪနီၪ လၧယွၩအဂးႇ ဆၧအီၪကီၪ့အဂး ဒဲ ၡၩခရၧၫ့အဂး မွဲကဆိၫ့ကၩထၪ့ဝ့ၫဒၪ ဂ့ၩဂ့ၩဘၪဘၪအဂးနီၪ “သံစဉ်စမ်းရေ”ဆၧၥၭအွံၪပြၧၩ့ဆၧယီၩ ဖ့ၪဂဲးဖ့ၭဘၭဝ့ၫဒၪနီၪလီၫႉ ဆၧပရၧၫ့ယီၩနီၪ မွဲပန့ထၬဘၪလၧ RVA ဖျိၩ့ၡၩ့ဆၧရၩလၩ့ဆၧအဖၧၩ့လီၫႉ
