ဆၧထိးဆၧၫ့ဒိၭန့ထဲၩ့ ၥၫ့ခိၪဒိၪအလးအလၩအဂဲး

၂၀၂၆နံၪ့ လၩမၫၡါ ၂၆ၥၫ့ဒၪအိၩ ၥၫ့ဎွၩဘိၭဘၪ၁့ၪယၫထၪ့ ဝံးထအၫ့ၥၫ့ခိၪဒိၪ Bp.ဂျက်စတင်းစောမင်းသိုက်ကအီၪပွံၩဂီၩ့ ၥၫ့ခိၪဒိၪအၥၫ့ Bishop Stanislausမင်းကို ကအၪ့န့ထဲၩ့ ၥၫ့ခိၪဒိၪမူၩဒၩအဂဲးနီၪလီၫႉ လၩမၫၡါ ၂၈ၥၫ့ လဂီၩ၉နၩရံၫအခံၫ့နီၪ ဘၪဆၧဖ့ၪလၫ့ထဲၩ့ ၥၫ့ခိၪဒိၪအလးအလၩ လၧၥၫ့ခိၪဒိၪ Bishop Stanislaus မင်းကို အစူၪဖၧၩ့ ဆၧထံၪလၩ့ဒီၪလၩ့ မံဆၩဆၧလုထၪ့အီၪဝ့ၫဒၪလၧ ဝံးထအၫ့ St. Francis Xavier Cathedralနီၪလီၫႉ လၧမံဆၩဆၧလုထၪ့နီၪအဖၧၩ့ ၦၡၩအၪ့ကံၩ့ဘၩဆိၪဖၪထဲးလၧ ဆၧဎူၫဆၧဎၩ့ကအီၪထၪ့လၧဂၪ့ခိၪထၧၫ့ဖျိၪ့ယၫဖၧၩ့အဂးဒံၭနီၪလီၫႉ ၥၫ့ခိၪဒိၪ Bishop Stanislausမင်းကို စံၭဝ့ၫဒၪ”ဖီၪ့ထၪ့ဖံၭထၪ့ ဆၧအီၪကီၪ့ဆၧဖံၭဆၧမၩအထီ ဆၧလ့ၩဆၧထဲၩ့အဂး ဆၧကၪဆၧဂဲၩအီၪ ဒဲ ၥၫ့မုၥၫ့ခၫ ၡၩဝ့ၫဒၪႇ ဆၧအၪ့ထၩဘဲၫယီၩၥိၭလၧဆၧအီၪကီၪ့ဖၧၩ့ယီၩ အီၪလါနၫ့ မွဲလၧကဆါယွၩအဆၧမၩဆၧၩ့ ဒဲ ၦဆူနဲၩဖိၪၥံၪလဖၪ အဆၧမၩဆၧၩ့ အဆၧအၪ့ကံၩ့ဘၩဆိၪဖၪအကၠီၩ့ ယကဆုးထဲၩ့ ဖီၪ့ထၪ့ဖံၭထၪ့ ယွၩအဆၧမၩ ဆၧအီၪကီၪ့အဆၧဖံၭဆၧမၩလီၫႉ” မုဆၫကနံၩယီၩ လၧဝံးထအၫ့ ဆၧအီၪကီၪ့ဖၧၩ့ ၥၫ့ခၫအီၪဝ့ၫဒၪ ၂၃ဂၩႇ မံၭထၭမုၪ မံၭထၭခွၫလဖၪ အီၪဝ့ၫဒၪ ဖိၭဘိၭ အဂၩ၄၀ဒဲ ဆၧအီၪကီၪ့ဆရၫ ဆရၫမုၪ အီၪဝ့ၫဒၪ ဖိၭဘိၭ အဂၩ၇၀ဂီၩ့ ဖီၪ့ထၪ့ဖံၭထၪ့ကၠၭ ဆၧအီၪကီၪ့ အဆၧဖံၭဆၧမၩကၠၧၫ့ကၠၧၫ့နီၪလီၫႉ