မြစ်ကြီးနားဝံး ဧဒင်ဆၧအီၪကီၪ့ စိန့်လုကာကောလိပ် (St. Luke’s College) ဆၧမၩလိၪဖျါ

၂၀၂၆နံၪ့ လၩမၫၡါ ၂၆ၥၫ့ဒၪအိၩ ဆၧမၩလၩမၩဖၩ့ၡီၩ့ အီၪလၧမြစ်ကြီးနားဝံးဖၧၩ့ စိန့်လုကာခီၩလ့ၫ ဆၧမၩလိၪ ၂နံၪ့ဂီၩ့ခွံၬ ၁ဖၠးစဲၪ့လၩ့ ဆၧထံၪလၩ့ဒီၪလၩ့နီၪလီၫႉ ဆၧမၩလိၪဖျါကဘျၩ့ယီၩ မွဲ (၈)ဘျၩ့ လဘျၩ့နီၪလီၫႉ ၂နံၪ့ အထးဖၧၩ့ ဆၧမၩလိၪ မုၪခွၫလဖၪ အီၪဝ့ၫဒၪ ၈၉ဂၩလါနၫ့ ၦအဖျီၫ့ဆၧဒိၭစ့ၭနီၪ အီၪဒၪ၅၄ဂၩနီၪလီၫႉ ၦ၅၄ဂၩအဖၧၩ့ မြစ်ကြီးနားဆၧအီၪကီၪ့ဖိၪပၪ ၄၂ဂၩႇ လားရှိုးဆၧအီၪကီၪ့ဖိၪပၪ ၆ ဂၩဒဲ ဗန်းမော်ဆၧအီၪကီၪ့ဖိၪပၪ ၆ ဂၩနီၪလီၫႉ ၁ဖၠးဖျါလၩ့ ဆၧထံၪလၩ့ဒီၪလၩ့ယီၩ စၭထၪ့ဂုဝ့ၫလၧ မံဆၩဆၧလုထၪ့နီၪလီၫႉ မံဆၩဆၧလုထၪ့နီၪ ၥၫ့ခိၪဒိၪ ဂျွန်မုံငေါန်လဆမ်၊ ၥၫ့ခိၪဒိၪ ရေမွန်ဆွမ်လွတ်ဂမ် ဒဲ ၥၫ့ခိၪဒိၪ ဖရန်စစ်ဒေါသန်းၥံၪ လ့ၩခိၪလ့ၩနါဝ့ၫဒၪနီၪလီၫႉ ၥၫ့ခိၪဒိၪ လဖၪစံၭဘၪဝ့ၫ “ကနံၩယီၩ ၦအဒိၭန့ဘၪ ဆၧနဲၪ့လၩဖၩ့ဆၧအီၪကီၪ့ဆရၫ ဆရၫမုၪလဖၪ နၥံၪကဘၪလီၩ့ဖိၬခိၭနၪ ယွၩအဆၧၥီၪ့ဆၧၥၫ့လဖၪဂီၩ့မၬ နၥံၪကဘၪလီၩ့ၥီၪ့ၥၫ့ထဲၩ့ၦၡၩႇ ဒဲ နၥံၪယီၩ ကဘၪမွဲဒံၭလၧ ဂၪ့ခိၪအဆၧဖၩ့ဒံၭအဂဲး ၥၫ့ခိၪဒိၪလဖၪ ဆၫ့ထွ့ၫဝ့ၫ ဘဲၫယီၩအၥိၭနီၪလီၫႉ စိန့်လုကာ ခီၩလ့ၫယီၩနီၪ ဆုးကျိၭထၬၥၭလၧ ခးအ့ၩၡၩ ဆၧအီၪကီၪ့ခရၧၫ့ (EAPI)ဂီၩ့တၭ မိဆၧအီၪကီၪ့အဂး ၦလၧ ကမိဖီၪ့ထၪ့ဖံၭထၪ့ဆၧမၩ ၦလဖၪအဂး ၥီၪ့ၥၫ့အ့ၪဝ့ၫ ယွၩလူယွၩထၫ ၂နံၪ့ ခရၧၫ့ကခရၧၫ့နီၪလီၫႉ ဆၧပရၧၫ့ယီၩ မွဲပန့ထၬဘၪလၧ (RVA) လီဆူ ဆၧပရၧၫ့အဖၧၩ့နီၪလီၫႉ