ဆၧၥုၪ့ဆၧဖျၭဆၧမၩဒဲ စီၩ့ဒိၪဆၧပိၭဆၧလၫ့လဖၪ အဆၧလၩ့အၪ့ယိၫ (၂)

မွဲဆၧဘဲၫနီၪ ၦၡၩမွဲဂ့ၩႇ ဆၧဖိၪဆၧဎါမွဲဂ့ၩႇ နဲၩ့ဎီၩ့မွဲဂ့ၩႇ ဆၧလၩ့အၪ့ယိၫအီၪဝ့ၫဒၪ ဆၧပိၭဆၧလၫ့လဖၪ ပကဘၪအီၪက့ၪထၬအလး ဂ့ၩဂ့ၩဘၪဘၪနီၪလီၫႉ အနီၪမၬ ဖိၪဆံၫဂူႇ လံၩမုလဖုၬဂဲၫ မွဲဝ့ၫနဲၩ့ဎီၩ့ဆၧလၩ့အၪ့ယိၫ လဖၪ ဂဲၫကဲၪထၪ့အခၫ ဘဲၫလလၩ့ဎုၬ လၩ့ယွၩဘၪအဂး ပကဒၩ့ထၬကန့နီၪလီၫႉ စီၩ့ဂဲးၥံၪ့ဎွံၪလဖၪနီၪ ထၧၩ့ထံၭလၩ့ဘၪလၧ ထံၫပလၫ့အလံၩဖၧၩ့လဂ့ၩႉ ဘၪန့လဲၪစွါဘဲၫ အ့ၪပစီၪဘၪလၧထံၫဂီၩ့ ပအီၪဘၪမၪ ဘၪစွါဘဲၫ ဆၧလၩ့အၪ့ယိၫကအီၪဎိၩဒိၪနီၪလီၫႉစီၩ့ဒိၪဂဲးဆီၪ့ၥံၪ့ဎွံၪလဖၪနီၪ ထီးအီၪက့ၪဎုၬထဲးဘၪလၧ ဆၧအၪ့ဆၧအီၩ့နးဆံၭ လဂ့ၩႉ

စီၩ့ဒိၪဂဲးဆီၪ့လဖၪနီၪ အီၪက့ၪထၬ ဂ့ၩဂ့ၩဘၪဘၪလၧ လ့ၩနုၬလၩ့စဲၪ့လၫ့ဂ့ၩအလးႇ ချံၫ့ဂီၩ့ ဎဲၪ့ထၬဝ့ၫဒၪႇ ယဲၩ့ဝ့ၫလၧမ့ၪႇ ဖိၪၥၪဆံၭလဖၪ ဖီၪ့လထူၭဘၪအလးနီၪလီၫႉ အ့ၪမွဲၥံၪ့ဎွံၪအၪစွါဘဲၫ အီၪက့ၪထၬလၧ ဂိၫဒီၫ့ဖၧၩ့ဂီၩ့ ကၭဘံၭထၬလၧ နိၪဝံၬလီၫႉစီၩ့ဒိၪဂဲးဆီၪ့ၥံၪဎွံၪလဖၪယီၩ အ့ၪပၥိၩ့ထၪ့ဂီၩ့အခၫ ပကဘၪအၪ့ၥိၪဝၬပစူၪလၧ ချၪ ဆံၫ့ဆံၫ့ဖျ့ၪဖျ့ၪနီၪလီၫႉ အ့ၪပမၩဆၧမၩဂီၩ့အခၫဆ့ ပကဘၪအၪ့လုထံၫအၪအၪနီၪလီၫႉ ပဖီၪ့ထၬၥံၪ့ဎွံၪပစူၪၥံၪနီၪ ထီးလဘၪထဲးဘၪ ပနိၬႇ ပနၫဖူၫႇ ပမ့ၬၥၪၥံၪအဂး ပကဘၪထုၪ့ပၥၭနီၪလီၫႉ လမွဲဘၪစွါဘဲၫ အ့ၪမွဲအနံၪ့ယံၬ ထၪ့အခၫ ကဲၪထၪ့ ဆၧဆၫ က့ၫဆၫ ၥ့ၪနီၪလီၫႉ