ၦခမျၧးၥံၪနီၪ မွဲဘၪဒိၭနဲၩ့အီၪၥၭမၧၫ့အၥၭလၧ ဂၪ့ခိၪနဲၩ့ဎီၩ့
ၦခမျၧးၥံၪနီၪ မွဲဘၪဒိၭနဲၩ့အီၪၥၭမၧၫ့အၥၭလၧ ဂၪ့ခိၪနဲၩ့ဎီၩ့အဖၫ့ခိၪနီၪလီၫႉ ဘဲၫၦၡၩၥံၪ အၥၭကမၧၫ့အၪ့အီၪကန့အဂးဒဲ ကလ့ၩထၪ့လ့ၩထီၪ့အဂး လိၫဝ့ၫဒၪ ဆၧထီးအလူၬနီၪ မွဲဂၪ့ခိၪချိၫ့ဖ့ၪလၫ့ထၬအ့ၪ အလၧၫ့အဎွ့ၩနီၪလီၫႉ ဂၪ့ခိၪနဲၩ့ဎီၩ့နီၪ ၦၡၩၥံၪအဂး တဲၩ့လၩ့ထၬအ့ၪဝ့ၫ ထံၫႇ ဖံၭႇ လံၩႇ ဆၧအၪ့ဆၧအီၩဒဲ ဆၧအခၪ့ထံၭခၪ့ဎၧၩ့လဖၪ ထီးအလူၬနီၪလီၫႉ လၧဆၧတဲၩ့လၩ့ထၬဆၧနီၪအဖၧၩ့ ပၥိၩ့ထၪ့လူၬန့ဝ့ၫဒၪ ဆၧအခၪ့ထံၭခၪ့ဎၧၩ့လဖၪႇ လၧၫ့ဎွ့ၩထၪ့ထဲၩ့န့ဝ့ၫ စီၩ့ဂဲးလဖၪႇ ပအၪ့လဲၩ့ထၪ့ထဲၩ့အလးလန့ဘၪ ဆၧအၥၭအီၪႇ လအီၪဘၪလဖၪ ွမဲပၫဝ့ၫဆ့နီၪလီၫႉ ဖံၭဖၫ့ခိၪ ဖံၭဖၫ့လၬ နဲၩ့ဎီၩ့ အခၪ့ထံၭခၪ့ဎၧၩ့လဖၪ မွဲဝ့ၫ ကျဲၩ့တံၭ နဲၩ့ဎီၩ့စီၩ့ဂဲးအခၪ့ထံၭခၪ့ဎၧၩ့လဖၪ အ့ၪမွဲလူၭနီၪ ကလၩ့မါလီၩ့ လဆိၩၡၩနီၪလီၫႉ ဘဲၫနီၪအၥိၭ နဲၩ့ဎီၩ့ၥံၪကျိၭလဖၪ လၩ့ၡၩထၪ့ႇ လၩ့မါထၪ့အကၠီၩ့ မွဲဒၪလၧ ၥံၪ့ကျိၭလအီၪလၧၩ့ဘၪလီၫ လကၭဘၪဒဲ ဆၧဖိၪဆၧဎါၥံၪလၧ ဘၪအီၪၥၭမၧၫ့လၧ ၡိၬကျၩလဖၪ အၥၭဘၪၥံၫဎုၬထဲးနီၪလီၫႉ
ၥံၪ့ကျိၭလဖၪ ပၥုၪ့လၩ့ထဲၩ့န့လါနၫ့ဂ့ၩ ဆၧဖိၪဆၧဎါလနၩ့နၩ့နီၪဘိၭ ကလၩ့မါခွံၬလီၩ့တၡါနီၪလီၫႉ လကၭဒံၭဘၪ ၦၡၩၥံၪအဆၧမၩအကၠီၩ့ ထံၫအထၧၫ့ဂဲၫၥၭလိၪၥၭလံၬထၪ့ဂီၩ့ ဆၧဖိၪဆၧဎါလၧ အီၪထံၫကျၩလဖၪ ကၥံၫဂီၩ့ၥံၫစၪဂီၩ့ ဆၧဖိၪဆၧဎါလၧအအီၪထံၫကျၩလဖၪ ကဂဲၫလၩ့ၡၩထၪ့ဝ့ၫဒၪနီၪလီၫႉ ဆၧလဖၪၥံၪယီၩ မွဲဒၪလၧ နဲၩ့ဎီၩ့ဂၭဂီၩ့ဂၭစၪထၪ့ အခိးတၩနီၪလီၫႉ
မွဲဆၧဘဲၫနီၪ ပဘၪဆုးအီၪၥၭမၧၫ့ ဒိၭနဲၩ့လိၬၥၭ လၭခီၫလၭဘၭမွဲဝ့ၫ လၧဂၪ့ခိၪချိၫ့ယီၩ ဆၧအၥၭအီၪ လအီၪဘၪလဖၪ ကဆုးအီၪဂုးခၧၫ့ လဆိၩၡၩအဂးနီၪ ပကဲၪၦၡၩၥံၪလဖၪ ပကဘၪအဲၪပနဲၩ့ဎီၩ့နီၪလီၫႉ ပကဘၪယိထွ့ၫပဒၩ့ ပဂၪ့ခိၪချိၫ့နီၪလီၫႉ ဂၪ့ခိၪနဲၩ့ဎီၩ့ ဘၪကဲၪထၪ့ဘဲၫယီၩၥိၭနီၪ မွဲဒၪၦၡၩၥံၪအဆၧဖီၪ့ထၪ့ဖံၭထၪ့ အကၠီၩ့တၭ ပကဲၪၦၡၩၥံၪလဖၪ ပကဘၪအၪ့လဲၩ့ထၪ့ ပၥၭလိၫဝ့ၫဒၪနီၪလီၫႉ မွဲနၥံၪကဖီၩ့ဖျ့ၭဝ့ၫဒၪလၧ ဂၪ့ခိၪအဆၧလၩ့အၪ့ယိၫ ကိၭဂၩဒ့ၭလါဆံၭႉ
