ဂၪ့ခိၪချိၫ့နီၪ ၦခမျၧးၥံၪအဂး မွဲအီၪဝ့ၫကဒုၩလီၫ ဂံၪ့

ထၧၫ့ဖုဝဲမုၪခွၫၥံၪဧ့ႇ ၦခမျၧးၥံၪအီၪအလး မွဲဝ့ၫဂၪ့ခိၪချိၫ့ယီၩ ထီးမုဆၫကနံၩယီၩ အီၪဝ့ၫကဒုၩလီၫဒဲ ပအီၪအလး အဂူၫဂၩ မွဲလအီၪဒံၭဘၪနီၪလီၫႉ ပဂၪ့ခိၪချိၫ့ယီၩ အ့ၪမွဲနဲၩ့ဎီၩ့ဂၭဂီၩ့ဂၭစၪထၪ့ဂီၩ့ နဲၩ့ဎီၩ့ဆၧလၩ့အၪ့ယိၫအ့ၪကဲၪ့ထၪ့စွါဘဲၫ ၦခမျၧးၥံၪလဖၪ ကလ့ၩအီၪကၠၭအလးခလဲၪႉ ဆၧအၪ့စၪ့အယီၩအဂး မွဲဆၧစံၭဆၧၫ့ လအီၪဒံၭဘၪလီၫႉ မွဲဆၧဘဲၫနီၪ ဆၧကိၭဒံၭလၧ အီၪဝ့ၫကဒုၩလီၫ ဂၪ့ခိၪချိၫ့ (တစ်ခုတည်းသော ကမ္ဘာမြေ ) ဒံၭနီၪလီၫႉ

လါနၫ့ဂ့ၩ ထီမုဆၫကနံၩယီၩ နဲၩ့ဎီၩ့ဂၭဂီၩ့ဂၭစၪထၪ့ အခိးတၩလဖၪနီၪ မွဲပဘၪဒၪဎီၩ့ဆၧၫ့ယၫယူၭနီၪလီၫႉ အ့ၪပအၪ့ဎၬယိ ထံၪထံၪနီၪ ပကဲၪၦၡၩလဖၪ ပမိမီၪ့ဎီၩ့ဒၪလၧ အီၩ့ဆၧဖိၪဆၧဎါနီၪလီၫႉ ဘၪန့လဲၪစွါဘဲၫ ဆၧလၧအီၩ့နီၪ အဝ့ၫၥံၪကအီၪအဂး မၩဂၭဂီၩ့ဂၭစၪ အနဲၩ့ဎီၩ့နီၪလီၫႉ အရ့ၩဒိၪထုၬဒၪလၧ အဝ့ၫၥံၪကအီၪအဂးဒဲ နဲၩ့ဎီၩ့ဂၭဂီၩ့ဂၭစၪထၪ့နီၪ မွဲလခိဘၪဝ့ၫနးမံၩ့လီၫႉ ပကဲၪၦၡၩၥံၪလဖၪနးဆ့ ပကအၪ့ ပကအီၪဘၪ ဂ့ၩဂ့ၩအဂး ပယိဆၧ ဖုၪ့ဖုၪ့လီၫ ဂၪ့ခိၪချိၫ့ယီၩ ဘဲၫပဆုးအီၪကန့လဆိၩၡၩအဂး ပကဘၪယိအၪ့ဎၬဆၧ ထီၪ့ထီၪ့နီၪလီၫႉ

ၡၩခမျၧးလဖၪ ထီးအလူၬအထီလၧယၫဒဲ နဲၩ့ဎီၩ့အကျၩ ပကဘၪယိထွ့ၫ မၩဂ့ၩထၪ့ထဲၩ့ လိၫဝ့ၫတၡါယူၭနီၪလီၫႉ အထီဘဲၫယီၩဒဲ အထီလၧယၫ ကလ့ၩထၪ့လ့ၩထီၫ့အဂး ဘဲၫထီၩ့အၥိၭမွဲဝ့ၫ နဲၩ့ဎီၩ့လဂၩဂီၩ့ဂၭစၪထၪ့ဘၪအဂးဒဲ ဆၧယိထွ့ၫပဒၩ့ထၬ ဆၧဖံၭဆၧမၩလဖၪ မွဲလိၫဝ့ၫဒၪတၡါယူၭနီၪလီၫႉ