ထံၫနွ့ၫၦမုၪ – ၁ (ရေသူမ)

လၧဖျိၩ့ဖျိၩ့အိၩ ၦမုၪမဲၪအီၪကဂၩစွါဘဲၫႉ ၦမုၪမဲၪနီၪ ဘၪအဲၪဝ့ၫနၭဒ့ၭ အဖိၪခွၫၥၭဘီၩ့အီၪဝ့ၫလဂၩလီၫႉ ၦမုၪမဲၪနီၪ ၡါယါဝ့ၫနၭဒ့ၭအကၠီၩ့ ဒုၭထၪ့အဖိၪ ဆၧမၩလိၪလး ဘၬအ့ၬလီၫႉ ၦမုၪမဲၪအဂံၪ့ဒဲ ဆၧမၩလိၪလးနီၪ အီၪဝ့ၫ ဘုၭဘုၭလီၫစွါဘဲၫႉ လါနၫ့ဂ့ၩ ဖိၪခွၫနီၪ ထၪ့ဘၪကၠီးအ့ၬႉ လကၭဒံၭဘၪ လၧကၠီးအနဲၩ့အဎီၩ့နီၪ လ့ၩဘၪဝ့ၫထၧၫ့ယၫအ့ၬနီၪလီၫႉ ဖိၪခွၫနီၪ ကမိ မၩလိၪလံၬအကၠီၩ့ ကိၭနံၩဒ့ၭ လ့ၩဆၧၫ့နၧၩ့အီၪလၧ ကၠီးအချိၫ့ဂီၩ့ ၦၡၩၥံၪမၩလိၬလံၬနီၪ အဝ့ၫလ့ၩခိၭနၪဝ့ၫလီၫႉ အမိမိ ဒိၪထးအဝ့ၫ လါနၫ့ မွဲအဝ့ၫလခိၭနၪဘၪလီၫႉ

ဖိၪခွၫယီၩ ကိၭနံၩဒ့ၭ ဆရၫၥီၪ့လိၪလံၬလဖၪနီၪ ခိၭနၪဂူၪဝ့ၫအကၠီၩ့ လၧခဲၫ့ အဝ့ၫ ကွ့ၭလံၬ ဖီလံၬ ဘၪထၪ့နီၪလီၫႉ ကနံၩနီၪ တၭ စဎွၩဂဲၫဂၭလၧ ကၠီးနီၪလီၫႉ စဎွၩနီၪ ဆၧမၩလိၪဖိၪၥံၪအဂး မၩထၪ့ဆၧပြၧၩ့ ဆၧကၠူၭဆၧဂၩ့နီၪလီၫႉ ဆၧမၩလိၪဖိၪၥံၪ ကၠူၭဆၧဂၩ့အထီ စဎွၩအဎီးလဂၩနီၪ ထုၪ့အၥၭ လၧခီၫအိၩ ဖိၪၥၪကဂၩနီၪလီၫႉ လၧခဲၫ့ ဂဲၫထဲၩ့ကိၭန့ဝ့ၫလၧ ကၠီးဖၧၩ့ဂီၩ့ အၧၫ့မၧၫ့ဝ့ၫနုၬ လၩ့ပြၧၩ့ထဲးဎုၬနီၪလီၫႉ ဖိၪခွၫယီၩ န့ဘၪအခွးအရ့ၩ ဘဲၫယီၩအၥိၭ အဝ့ၫအၥၭဎွံၪအၪမၬလီၫႉ ဖိၪခွၫယီၩ ထၪ့ယံၫယါ ဆၧကၠူၭ ဆၧဂၩ့ၥဖျးနးကၠၪအ့ၬလါနၫ့ ကၠူၭဆၧဂၩ့ဂ့ၩ တၡါလီၫႉ လၧဆၧပြၧၩ့ယီၩ အဝ့ၫကၠူၭ ထံၫနွ့ၫၦမုၪအဂၩ့လီၫႉ စဎွၩဒိၪနီၪ ဒၪဖိၪၥၪခွၫနီၪ ကၠူၭထၬ ၦမုၪနၩ့ဖိၪအဂၩ့နီၪ ဘၪအၥၭဝ့ၫအၪမၬလီၫႉ

စဎွၩဒိၪနီၪ ခွံၬလၩ့အလူ အၪ့မၧၫ့ဖိၪၥၪခွၫနီၪ လီၩ့ဎွါအ့ၪၦမုၪလၧ အလၩ့ဂၬ အဝ့ၫကၠူၭထၬအဂၩ့နီၪလီၫႉ အနီၪတၭ ဖိၪၥၪခွၫနီၪ အၥၭၡၪ့လါနၫ့ စဎွၩအလူအကၠီၩ့ အဝ့ၫဘၪလီၩ့ဎွါနီၪလီၫႉ အဝ့ၫလီၩ့ဎွါၦမုၪနီၪ နံၪ့ဆံၫလၩယံၬထၪ့အခၫ ဒၪၦမုၪနီၪ လၧပၫ့လဲၫ့ထံၫနဲၩ့အလးကလးနီၪလီၫႉ ၦမုၪနီၪ ဒၪဖိၪၥၪခွၫနီၪ ကထံၪဎး ဘၪအၥၭဖိၪၥၪခွၫနီၪလီၫႉ ဖိၪၥၪခွၫနးဆ့ ကအီၪဎုၬလၧ ၦမုၪဎံၫလၩနီၪအကၠီၩ့ထဲၩ့အၪ့ကံၩ့အမိမိအခွးနီၪလီၫႉ

ၥၭဘၪ့ဖိၪနီၪ ထၪ့အီၪဎုၬလၧ ထံၫနွ့ၫၦမုၪနီၪ  စဎွၩဒိၪနါဂၧၫ့ ဆၧပရၧၫ့နီၪလီၫႉ ကနံၩနီၪတၭ ၥၭဘၪ့နီၪ လ့ၩလီၩ့ခၬ ဆၧဖိၪ ဆၧဎါလၧၡိၬကျၩအခံၫ့ လံၬပရၧၫ့ဂဲၫထီၩ့ကဘံၪ့နီၪလီၫႉ