မုကိနံၩဆၧၥၭထိၬပရၧၫ့
ၦမုၪလဂၩ,ဆၧဖီၪ့န့ဝ့ၫလၧအအဲၪဘိၩ့ဆၧအခၫ. ယ့ၫၡုၬလ့ၩစိၩဝ့ၫလၧခိၪလီၩ့အလဲအိၫ့နီၪလီၫ. လၧဂီၩနၪခုၬနီၪ ဂဲၫဒီၭဝ့ၫ လၧဆၧလုအဂံၪ့ဖၧၩ့တၭ, ၦခမျၧးဂဲၫလၧအအီၪထီးအလူၬတၭ, အဝ့ၫဒၪဆၧၫ့နၩ့ၥီၪ့ထဲၩ့ၥၫ့ထဲၩ့အဝ့ၫၥံၪလီၫ. ၦကွ့ၭလံၬၥံၪ, ဒဲၦဖၫရစံၫၥံၪဂဲၫၥိၫ့ ၦမုၪလၧၦဖီၪ့န့ဝ့ၫ လၧအအဲၪဘိၩ့ဆၧအဘိၩ့ဘၭနီၪ, အီၪက့ၪဝ့ၫလၧအၥၭကျၩ, စံၭဝ့ၫ, ဆရၫဧ့, ၦမုၪလဂၩယီၩ, ၦဖီၪ့န့ဝ့ၫလၧအအဲၪဘိၩ့ဆၧအဘိၩ့ဘၭလီၫ.- စမိစ့ၭမၪလူၬဝ့ၫလၧဆၧမၪလူၬအဖၧၩ့, ၦဘဲၫနီၪလဖၪမိဘၪဆၧခွံၬဝ့ၫလၧလိးလီၫ. မၩအၥၭဘဲၫနီၪတၭ, မွဲနမိစံၭနဝ့ၫဘဲၫၥ့ၪလဲၪ.- အဝ့ၫၥံၪ ကျဲၩ့ဖစီၩ့အဝ့ၫနီၪ, စံၭဆၧနီဘဲၫၥိၭအမိအီၪက့ၪဆၧမၪလၧအလီၩ့ အလးမိအီၪဝ့ၫလီၫ. ယ့ၫၡုၬၡီၫ့လၩ့အၥၭတၭ, ကွ့ၭလၩ့ဆၧလၧဂၪ့ခိၪအလီၩ့ လၧအစူၪနိၩ့လီၫ. ၦလဖၪနီၪအၪ့စၪ့ဒီၭဝ့ၫတၭ, အဝ့ၫဘိၭထၪ့အၥၭနီၪ, စံၭအဝ့ၫၥံၪ, ၦလၧနၥံၪအကျၩလၧအဆၧဒဲၩဘၭလအီၪဘၪ လဂၩနီၪခွံၬဆိၫအဝ့ၫ လၧလိးလဖျိၪ့ဆံၭ.- ၡီၫ့လၩ့ဒီၭအၥၭတၭ, ကွ့ၭလၩ့ထဲၩ့ဆၧ လၧဂၪ့ခိၪအလီၩ့နီၪလီၫ. ၦလၧအနါဂၧၫ့ဆၧလဖၪနီၪ, အကၪ့ၡၧၫ့အီၪက့ၪဆၧမၪလၧအလီၩ့တၭ, လၧအၥၭၡါထုၬလဂၩ, ထီၩ့လၩ့လၧအၥၭဘၪ့ထုၬလဂၩနီၪ, စဲၪ့ထၪ့ခွံၬဝ့ၫ လဂၩဘၪလဂၩ, လဂၩဘၪလဂၩလီၫ.ယ့ၫၡုၬအီၪလၩ့ထးလဂၩဎး, ဒဲၦမုၪနီၪဆၧၫ့ထုၪ့လၧဆၧၥၭကျၩလီၫ. ယ့ၫၡုၬဘိၭထၪ့ဒီၭအၥၭတၭ, ဒၪဘၪၦနးဂၩအ့ၬ. ဒၪန့ၫၦမုၪလဂၩနီၪ, စံၭအဝ့ၫ, ၦမုၪဧ့, ၦလၧအအီၪက့ၪဆၧမၪလၧနလီၩ့လဖၪနီၪ, မွဲအအီၪခီၫခီၫလဲၪ. မွဲအစ့ၩရၫ့စၪနၧၩနးဂၩအ့ၬဧၪ.- အဝ့ၫဒၪစံၭဝ့ၫ,နးဂၩအ့ၬ, ကဆါဧ့, တၭယ့ၫၡုၬစံၭဝ့ၫ, ယဝ့ၫဒၪယီၩ ယစ့ၩရၫ့စၪနၧၩဆ့အ့ၬ.ထဲၩ့ထဲၩ့တၭထီးမၩလၧၩ့ဆၧဒဲၩဘၭလၧခဲၫ့လဂ့ၩ.
