ၥၭဘၪ့ဒဲ ဂၪ့ခိၪနဲၩ့ဎီၩ့ (၃) 

ထၧၫ့ဖုဝဲမုၪခွၫၥံၪဧ့ႇ ဆၧခိခၫအထီ ဆၧခိနၭလၧၫ့ဂီၩ့ ဘဲၫထံၩၡၩနီၫ့ၡၩဝ့ၫအၥိၭ ဆၧဆၧၩ့ လံၩဂဲၫ လၫ့ဝဲဒံၩ့ လၫ့ဖျၭဆၧ မွဲဝ့ၫ ဆၧလၩ့အၪ့ယိၫလဖၪ ကဲၪထၪ့ဝ့ၫဒၪလီၫႉ ဆၧဆၧၩ့ခၫအထီ ဆၧဆၧၩ့နၭလၧၫ့ ကဲၪထၪ့ထံၫဎိၩလၩ့ဂီၩ့ ဘၪဒၪဎီၩ့ဆၧၫ့ယၫ ဆၧနိၪ့ဆၧနၭအၥိၭ ဆၧဆၧၩ့အ့ၬတၭ ဆၧဆၧၩ့ထံၫလန့ဘၪအကၠီၩ့ ထံၫလၧပအီၩအဂး ဒဲ ဆၧၥုၪ့ဆၧဖျါဆၧအဂး ဘၪဒၪဎီၩ့ဆၧၫ့ယၫ ဆၧကၪဆၧဂဲၩနီၪလီၫႉ ဆၧဂီးခၫအထီဆ့ ဆၧချံၪ့အ့ၬ ဆၩ့လၩ့အ့ၬ ဆၧခိအၥိၭ ဘၪဒၪဎီၩ့ဆၧၫ့ယၫယံၩယါၥ့ၪဒံၭလၧ ဆၧချံၫ့နၭလၨၪဒဲ ဆၩ့လၩ့နၭလၨၪၥံၪနီၪလီၫႉ ခိဆၧၩ့ချံၪ့ အၪ့လဲၩ့ထၪ့အၥၭ ဘဲၫယီၩၥိၭအကၠီၩ့ ခးပယၩ့ယီၩ ပဘၪဒၪဎီၩ့ဆၧၫ့ယၫ ဆၧဘၪထံၭဆၫဒဲ ဆၧဂၭဂီၩ့ဂၭစၪ အၪ့မၬယူၭနီၪလီၫႉ

ဆၧအဆၧၫ့အထီယီၩ အခံၫ့ယံၬထၪ့ ဒံၩဂဲၫနၬထၪ့နီၪလီၫႉ ကနံၪ့ဒဲ ကနံၪ့ ဆၧဂၭဂီၩ့ဂၭစၪ ဂဲၫအၪ့ထၪ့တၭ ဆၧအယီၩ ဘဲၫအခံၫ့အီၪဒံၭယီၩ ပပဒၩ့ထၬကန့အဂး ၦကိၪ့ၥ့ၪလဖၪ ဖ့ၪလၫ့ထၬ ဆၧထုၪ့ၥုၪ့ထုၪ့ၥၭခီၫလၧ ၁၉၈၀အိၩယူၭနီၪလီၫႉ ဂၪ့ခိၪထံၫခးၥံၪအဂူၫဂၩဆ့ ဆၧဆုးဖီၪ့ဂုးထၬ ဂၪ့ခိၪနဲၩ့ဎီၩ့အနိၪ့နီၪ မၩထၪ့ဝ့ၫအမံၩ့မံၩ့လါနၫ့ ထီးအထီဘဲၫယီၩ မွဲမၩဝ့ၫန့ဂ့ၩဂ့ၩဒံၭအ့ၬတၭ နဲၩ့ဎီၩ့ဆၧလၩ့အၪ့ယိၫနီၪ ကနံၪ့ဒဲကနံၪ့ ဂဲၫဆီၪ့ထၪ့နီၪလီၫႉ မီၪ့ဎီၩ့ဒၪပခးပယၩ့နီၪလီၫႉ အရ့ၩဒိၪထုၬနီၪ ပဒိၪဒဲ ခရၧၫ့ၥံၪလဖၪ ဘၪထွ့ၫလၧ ဆၧဖီၪ့ဂုးခၧၫ့ထၬနဲၩ့ဎီၩ့နီၪ မၩဝ့ၫထံၫထံၫဆၭဆၭအ့ၬဂီၩ့ ကျဲၩ့ဖီၪ့ထၪ့ဖံၭထၪ့ဝ့ၫအကၠီၩ့ ဘၪကဲၪထၪ့ဘဲၫယီၩၥိၭလီၫႉ

မွဲဆၧဘဲၫနီၪ အထီဘဲၫယီၩ ဂၪ့ခိၪနဲၩ့ဎီၩ့နီၪ အီၪယိထွ့ၫပဒၩ့ထၬဝ့ၫလၧ လံၩ ၦၡၩအဎိၩၥံၪလဖၪဒဲ ထံၫခးအဂး ၥၭဘၪ့ၥံၪလၧ ကဖီၪ့ထၪ့ဖံၭထၪ့ဂၪ့ခိၪနဲၩ့ဎီၩ့ ဂ့ၩဂ့ၩအဂး လိၫဝ့ၫတၡါလီၫႉ မွဲဆၧဘဲၫနီၪ ပကဲၪခးပယၩ့ၥၭဘၪ့ၥံၪလဖၪ ကျ့ၭပၥၭဆုးလီၩ့ ဂၪ့ခိၪနဲၩ့ဎီၩ့အဂဲးဒဲ ထံၫခးဒဲ ဆၨၩဆၬအဂး လၧပမၩန့အလးနီၪ ကျ့ၭပဖီၪ့ဂုးပဒၩ့ထၬ ပဂၪ့ခိၪနဲၩ့ဎီၩ့ကိၭဂၩဒ့ၭနီၪလီၫႉ