ပခးပယၩ့ယီၩ လၧပကိၪ့ၥ့ၪၥံၪအဆၧထယါအဖၧၩ့ ထံၫအထိၪအဎၩ့ ၉၁ယၩဒူၩနီၪ မွဲထံၫလၧဖံၭဖၫ့ခိၪဒဲ ၉ယၩဒူၩနီၪ မွဲထံၫလၧ ဖံၬဖၫ့လၬနီၪလီၫႉ ထံၫလဖၪၥံၪယီၩ ၥိၩ့ထၪ့ဝ့ၫအနိၪ့ၥံၪနီၪမွဲ ဆၧၥုၪ့ဆၧဖျါအဂး ၈၉ယၩဒူၩႇ ၦအီၪလၧဝံး ၁၀ယၩဒဲ စဲၭဒူၭဆၧမၩလဖၪၥံၪနီၪ မွဲဝ့ၫ ၁ ယၩဒူၩအကၠီၩ့ ပၥ့ၪယၫဘၪနီၪလီၫႉ ၦအီၪလၧဝံး အၪဒၪဆၧနီၪ ပဝဲထၪ့အမဲၥဲကထုၪ့ဎး ထံၫန့ဝ့ၫဒၪယီၫယီၫဆၧၫ့ထီယီၩ မွဲကဲၪထၪ့ပၥိၩ့ထၪ့ထံၫအ့ၬဂီၩ့ ကဲၪထၪ့ ပမၩလူၬပျီၩ့ဂီၩ့ထံၫနီၪလီၫႉ ပကဘၪၥိၩ့လၩ့ၡၩထၪ့ထံၫဒဲ ထံၫယီၩ အကၧၩ့ဒိၪဎွ့ပၥ့ၪလဲၪနီၪ ကျ့ၭပၥ့ၪယၫထၬနီၪလီၫႉ လၧခဲၫ့ကမံၩ့ ကိၭနံၪ့ဒ့ၭကဲၪဝ့ၫဒၪ ဆၧကၪဆၧဂဲၩကမံၩ့မွဲဝ့ၫ အ့ၪမွဲထီၩ့ဆၧခိခၫစွါဘဲၫ ၦလၧအီၪတဝၫ့ၦခမျၧးလနၩ့နၩ့ ဘၪဒၪဎီၩ့ဆၧၫ့ယၫ ထံၫၡၩဝ့ၫဒၪဆၧကၪဆၧဂဲၩနီၪလီၫႉ မွဲဆၧဘဲၫနီၪ ထံၫလၧပအီၩကအီၪအလၧၫ့အဎွ့ၩအဂး ၦလၧအမူၩဒၩအီၪလဖၪ ကြၨၭမၩထၪ့ဝ့ၫအကၠီၩ့ နဲၩ့ဎီၩ့ပကိၪ့ၥ့ၪလဂၩ လီၩထၬဝ့ၫနီၪလီၫႉ
ဆၧၥုၪ့အၪထၪ့ဆၧလၧဝံးဖၧၩ့ ႇ ဖိၬလိၬထၪ့စဲၭဒူၭဆၧမၩလးဒဲ ဖ့ၬခုထၪ့နဲၩ့ဎီၩ့ၥံၪ့ကျိၭလဖၪ အၪမၬနီၪ မွဲကဲၪထၪ့ ထံၫလၩ့ၡၩအခၪ့ထံၭခၪ့ဎၧၩ့အကၠီၩ့ ပၥ့ၪယၫဘၪနီၪလီၫႉ ခိဆၧၩ့ချံၪ့အၪ့လဲၩ့ထၪ့အၥၭအကၠီၩ့ ကဲၪထၪ့ ဆၧခိဆီၪ့ထၪ့ ႇ ဆၧဆၧၩ့အ့ၬႇ ဆၧဆၧၩ့ဖၭဒိၪ ႇ ထံၫဎိၩလၩ့ ႇ ဆၩ့လၩ့ ဒဲ ထံၫလိးခိၪလီၩ့လဖၪ အထံၫဖံလၫ့နီၪလီၫႉ ဆၧလဖၪၥံၪယီၩ ကဲၪထၪ့ဝ့ၫခိၪမၪခိၪမၪနီၪ ဆၧယိထွ့ၫထၬ နဲၩ့ဎီၩ့ထံၫအခၪ့ထံၭခၪ့ဎၧၩ့ဂဲၫလၩ့ၡၩဂီၩ့ ကဂဲၫကဲၪထၪ့ ထံၫလၩ့ၡၩ ဆၧကၪဆၧဂဲၩနီၪလီၫႉ
လၧစဲၭဒူၭအဖၧၩ့ ထူၭထၪ့ဆၧဘံၪၥိၭအစူၪအီၪလဖၪနီၪ ခွံၬၡိၬယံၫယါဝ့ၫလၧ ထံၫချိၬ ႇ ဘံၩ ႇ ပၫ့လဲၫမၫဆမံၭ ဖၧၩ့နီၪလီၫႉ မွဲဆၧဘဲၫနီၪ ဆၧလဖၪၥံၪယီၩ အ့ၪၦပဒၩ့ထၬလန့ဘၪစွါဘဲၫ အထီလၧယၫ ကကဲၪထၪ့ ထံၫလၩ့ၡၩဆၧကၪဆၧဂဲၩနီၪလီၫႉ လၧဆၧယီၩခၫအထီ ၦလၧဘၪဒၪဎီၩ့ဆၧၫ့ယၫ ထံၫၡၩအဆၧကၪဆၧဂဲၩလးကျဲၩ့ လဖၪနီၪ ဆၧဆၧၩ့ခၫအထီ ထီၩ့ထဲၩ့လၧထံၫဖၫ့လၬနီၪလီၫႉ ဆၧအဆၧၫ့အထီယီၩ ၦခမျၧးၥံၪ ဘၪဒၪဎီၩ့ဆၧၫ့ယၫ ကိၭနံၪ့ဒ့ၭနီၪလီၫႉ မွဲဆၧဘဲၫနီၪ ထံၫၡၩဆၧကၪဆၧဂဲၩဒဲ ထံၫလူၬဘံၬဆၧ ဆၧလၩ့အၪ့ယိၫလဖၪ ဘဲၫပဖီၩ့ဖျ့ၭအဂး လၧဆၧကိၪ့ၥ့ၪကိၪ့ဘၪအဖၧၩ့ ကဘၪဖီၪ့ထၪ့ဖံၭထၪ့ဝ့ၫလိၫအကၠီၩ့ နဲၩ့ဎီၩ့ပကိၪ့ၥ့ၪလဖၪ လီၩထၬဝ့ၫဒၪနီၪလီၫႉ