ဘၪထွ့ၫလၧ ခိဆၧၩ့ချံၪ့အၪ့လဲၩ့ထၪ့ၥၭ ဆၧကၪဆၧဂဲၩလဖၪ – ၂

ဂၪ့ခိၪချိၫ့ဂဲၫခိထၪ့အကၠီၩ့ ဂဲၫကဲၪထၪ့ဝ့ၫဒၪ ခိဆၧၩ့ချံၪ့အၪ့လဲၩ့ထၪ့အၥၭနီၪ ၡၩခမျၧးလဖၪဒဲ ဆၧဖိၪဆၧဎါအဂူၫဂၩလဖၪ လၧခဲၫ့ ဆၨၩၥၫ့ဘၪ့ၥံၪအဂး ကဂဲၫကဲၪထၪ့ ဆၧအၪ့လဲၩ့ထၪ့အၥၭ ဎိၩဒိၪနီၪလီၫႉ လါနၫ့ ပဂၪ့ခိၪချိၫ့ အၪ့လဲၩ့ထၪ့အၥၭအကၠီၩ့ ဆၧဖိၪဆၧဎါအဆၨၩၥံၪ ကလၩ့မါၥ့ၪနီၪ ပဒိၪလနၩ့နၩ့ဒဲ ခီၫ့ၡၩၦၥထ့ၫလဖၪ လထိးဆၧၫ့ဘၪအကၠီၩ့ နဲၪထၪ့ထၬဝ့ၫလၧ A New Climate for Theology လံၬစီၩ့ဖၧၩ့နီၪလီၫႉပခးပယၩ့နးဆ့ ခိဆၧၩ့ချံၪ့အၪ့လဲၩ့ထၪ့အၥၭအကၠီၩ့ ဂဲၫကဲၪထၪ့ ဆၧအအၧၩ့လဖၪဒဲ ဆုးကျိၭအၥၭ ဆၧဂၭဂီၩ့ဂၭစၪလဖၪ အီၪဝ့ၫအၪမၬယူၭနီၪလီၫႉ နံၪ့ ၂၀၁၉ အၪ့ဎၬထူၭထၪ့ဝ့ၫ Myanmar Climate Change Strategy လံၬဂဲးထုအဖၧၩ့ လၧအဖီၩ့ခွံၬ နံၪ့ ၂၀ (၁၉၉၅-၂၀၁၄) အဖၧၩ့ လံၩမုလဖုၬဖၭဒိၪ ကဲၪထၪ့ ၄၁ ဘျၩ့ဂီၩ့ ကိၭနံၪ့ဒ့ၭ ၦၡၩအၥၭဘၪၥံၫခွံၬ ဖိၭဘိၭအဂၩ ၇၁၄၆ဂၩနီၪလီၫႉ ဆၧကဲၪထၪ့ဝ့ၫဒၪ ဘဲၫယီၩၥိၭနီၪ ထံၫခးယီၩ ဂဲၫကဲၪထၪ့ ဘၪထံၭဆၫအနၭထုၬ ထံၫခး နံၫခးလခးနီၪလီၫႉ ဆၧၫ့ထီဘဲၫယီၩ ခးပယၩ့နီၪ ခိဆၧၩ့ချံၪ့အၪ့လဲၩ့ထၪ့အၥၭ နၬမၬအကၠီၩ့ ဆၧဆုးကဲၪထၪ့လဖၪနီၪ ဆၧဆီၪ့ဆၧချဲၫ့အနိၪ့ႇ ဆၧၥုၪ့ဆၧဖျါအနိၪ့ႇ တဝၫ့ဖၧၩ့ဆၧလုအၪ့လုအီၩ့ဒဲ ဆၧၥုၪ့ဆၧဒီၩ့အခၪ့ထံၭခၪ့ဎၧၩ့လဖၪ ဆၧကၪဆၧဂဲၩအီၪဝ့ၫဒိၪမၬနီၪလီၫႉ