ၦၡၩဘၧၩ့လၩ့ ဖာသာရ်ဂေးလ်ဘက်စိန်စလွယ်အဂဲး

ၥံၫဖီၩ့ခွံၬဒၪပၧၩ ၥၫ့ခၫဖာသာရ်ဂေးလ်ဘက်စိန်စလွယ်နီၪ ၦၡၩဘၧၩ့လၩ့ဝ့ၫဒၪလၧ လၩအီၭတိၫဘၧၫ၁၉ၥၫ့ လဂီၩ၁၀နၩရံၫနီၪလီၫႉ ၦအလ့ၩခိၪလ့ၩနါလုထၪ့ မံဆၩဆၧလုထၪ့နီၪ မွဲဝ့ၫဒၪလၧ ဒိၩ့ပၥံၫ့ဆၧအီၪကီၪ့ ၥၫ့ခိၪဒိၪ ဟင်နရီမၩ့အဲၪချံၫ့နီၪလီၫႉ

လၧမံဆၩဆၧလုထၪ့အဖၧၩ့ မွန်ဆီညှော်ပီအူးဝင်းသန်း လီၩလၩ့လၬလၩ့ဆၧၥၭထိၬပရၧၫ့နီၪလီၫႉ

“ဖာသာရ်ဂေးလ်ဘက်ယီၩ ဂဲၫထဲၩ့ဖ့ၪဆၧၫ့လၩ့ၥၭ လၧယွၩအဂး လၧမိဆၧအီၪကီၪ့အဂး ၂၉နံၪ့အကၠီၩ့ မိဆၧအီၪကီၪ့ယီၩ ပစံၭခိးစံၭတၩထၪ့ဘၪအဝ့ၫဒိၪဒိၪလ့ၬနီၪလီၫႉ ၥၫ့ခၫကဂၩအ့ၪၥံၫအခၫ ၦၡၩအုၩ့လၩ့ထဲၩ့အဝ့ၫၥံၪအဂဲးအဖးလဖၪနီၪလီၫႉ လၧအဝ့ၫမၧၫ့ဒံၭအခံၫ့ ဂဲၫထဲၩ့ဖီၪ့ထၪ့ဖံၭထၪ့ယွၩအဆၧဖံၭဆၧမၩႇ ဂဲၫထဲၩ့ဖ့ၪနဲၪအဆၧအဲၪဆၧကွံၩလၧ ၦဂူၫဂၩအဖၫ့ခိၪၥံၪနီၪ မွဲဆၧထိးၥၭလီၫႉ

အဝ့ၫနီၪအီၪအၪ့ၥ့ၪ ယိၩယိၩဖိၪ ချံၫ့ချံၫ့ဖိၪ ဒဲ အွံၪၥၭဆၧၩ့ဆၧၥ့ၪနီၪလီၫႉ ချဲၩ့ၥ့ၪလူၥ့ၪလီၫႉ လၧပထၪ့ကၠီးအခံၫ့ဒၪအိၩ ပကိၭအဝ့ၫလၧ ထိၪပူၩဖိၪကိၪ့ၥ့ၪနီၪလီၫႉ ၦၡၩအဲၪအဝ့ၫအကၠီၩ့ ၦၡၩလီၩ့ကိၭအဝ့ၫဘနီၪနီၪ အဝ့ၫယီၩထိးဆၧၫ့ဝ့ၫလီၫႉ အဝ့ၫနီၪ မွဲၦအကိၪ့ၥ့ၪကဂၩအကၠီၩ့ ၦၡၩလီၩ့ကိၭအဝ့ၫဘနီၪလီၫႉ ၦၡၩအဲၪအဝ့ၫအီၪအၪမၬလ့ၬလီၫႉ အ့ၪမွဲအဝ့ၫလ့ၩဘၠၩ့အၥၭလၧ အီတလီအခၫ ၦၡၩဘၠၩ့အ့ၪအဝ့ၫအပျီၩနီၪလီၫႉ အဝ့ၫယီၩ ဒိၭန့ထၪ့ဘၪ အီတလီထံၫခးဖိၪၥံၪအဆၧအဲၪဆၧကွံၩနီၪလီၫႉ တခၩအဝ့ၫမိလ့ၩနီၪ ၦၡၩအၪ့ဂၬထိးဆၧၫ့အဝ့ၫ ဂ့ၩဂ့ၩဘၪဘၪကိၭဘျၩ့နီၪလီၫႉ အဝ့ၫယီၩ အၪ့န့ထၬ ဆၧဆီၫ့မီၪ့ဆီၫ့မၬကိၪၥ့ၪအကၠီၩ့ အဝ့ၫအဆၧအီၪက့ၪၥုၪ့အီၪက့ၪၥၭနီၪ ဂ့ၩဝ့ၫဒိၪမၬလီၫႉ ဆၧနီၪအကၠီၩ့ ကဆါယ့ၫၡူၬဎြံၬနီၪ မွဲကလုၩ့လၩ့အ့ၪအဝ့ၫအဂး လၧဖါကဆါအအီၪနီၪလီၫႉ ၦၡၩအယီၩ အ့ၪမွဲအုၩ့လၩ့ယၧၩ လၧၡၩအၪဂၩအမ့ၬယၫစွါဘဲၫ ယၧၩဆ့ ယကအုၩ့လၩ့ထဲၩ့အ့ၪအဝ့ၫ လၧယဖါကဆါအအီၪနီၪလီၫအဂဲး ကဆါဎြံၬလီၩထၬပၧၩလီၫႉ ဆၧထိးထဲၩ့တၩ့ထဲၩ့အဂး ဘဲၫဖါကဆါဖျါလၩ့ယၧၩအၥိၭ ယၧၩဆ့ ယဖျါလၩ့ထဲၩ့နၥံၪနီၪလီၫႉ ပကဲၪၥၫ့မုၥၫ့ခၫလဖၪယီၩ မွဲကဆါယွၩဖျါလၩ့ထၬပၧၩ လၧကဆါဎြံၬအလးနီၪလီၫႉ အဝ့ၫယီၩ လၧယွၩအဂး လၧမိဆၧအီၪကီၪ့အဂး ဂဲၫထဲၩ့ဖ့ၪဆၧၫ့လၩ့ထၬအၥၭအဂဲးနီၪ ကဆါဎြံၬ မွဲကအုၩ့လၩ့အ့ၪလၧ ဖါကဆါယွၩအအီၪနီၪလီၫႉ လၧယွၩအအီၪအဝ့ၫန့ထၬဘၪလဖၪနီၪအဝ့ၫယီၩ ဆိၫ့ကၩထဲၩ့ဝ့ၫဂ့ၩဂ့ၩဘၪဘၪနီၪလီၫႉ ဆၧနီၪအကၠီၩ့ ဆၧမုၬဆၧၡူၪနီၪအဝ့ၫအဂး မွဲကအီၪယဲၩ့အ့ၬႉ အဝ့ၫအဆၧဂဲးဆံၭဘၭဆါလဖၪနီၪဆ့ မွဲကဆါဎြံၬ ကကွဲၪဖျါခွံၬအ့ၪဆ့နီၪလီၫႉ အဝ့ၫအနးၥၭအဂး မွဲပကဆုးထဲၩ့အၪ့ကံၩ့ဘၩဆိၪဖၪအ့ၪ ကိၭဂၩဒ့ၭလါဆံၭႉ”အဂဲး မွန်ဆီညှော်ပီအူးဝင်းသန်း လီၩလၩ့လၬလၩ့ ဆၧၥၭထိၬပရၧၫ့ ဘဲၫနီၪအၥိၭနီၪလီၫႉ

မံဆၩဆၧလုထၪ့နီၪ မၩဝ့ၫဒၪလၧ ဒိၩ့ပၥံၫ့ ပယၩ့ခၠီၩ့ ယ့ၫၡူၬအၥၭဆံၫ့ဎံၪၥရိၬဖၧၩ့ဂီၩ့ မံဆၩဆၧလုထၪ့ဂီၩ့ဝ့ၫကကၠၪ ၥၫ့ခၫအစွၫနီၪ ၦၡၩလ့ၩဘၧၩ့လၩ့စိၩလၧ မယၩ့ခၠီၩ့ကၠီးဝးဖၧၩ့ ဆၧၥွၫခိၪနီၪလီၫႉ

အဝ့ၫယီၩ အၥၭအီၪ ၅၈နံၪ့ ကဲၪထၪ့ၥၫ့ခၫထၪ့ဘၭ ၂၉နံၪ့အခံၫ့ ကဆါဎြံၬထဲၩ့ကိၭထဲၩ့နီၪလီၫႉ

#RVAPowKaren

#Fr.Girlbert