မံဆၩဆၧလုထၪ့အထးဖၧၩ့ နးခီၫ့ဆၧဂဲၩဝၭ အခီၫပယီၫလဖၪ
မုအီၪပွံၩနံၩ မံဆၩဆၧလုထၪ့အခံၫ့
မုအီၪပွံၩနံၩနီၪ ၥၭဘၪ့ခွၫကဂၩ လ့ၩထၪ့ဘၩယွၩနီၪလီၫႉ လၧမံဆၩဆၧလုထၪ့ဖၧၩ့ ပဘၪမၩဝ့ၫဒၪ လဖၪ လီၩ့မၩဝ့ၫဘဲၫၦၡၩၥိၭ ထီးလူၬလါနၫ့ ၥ့ၪယၫဝ့ၫအခီၫပယီၫနးမံၩ့အ့ၬႉ လၧအၥၭဖၧၩ့ႇ အခံၫ့ အယီၩ ပဘၪဆၧၫ့ထုၪ့နီၪဘၪလဲၪႉ အခံၫ့အယီၩခီၫ ပဘၪဆၧၫ့နၧၩ့ဂီၩ့ႇ အခံၫ့အနီၪဒီၭ ပဘၪထွံၩ လၩ့ခၪ့နီၪ ဘၪန့လဲၪႉ အဝ့ၫအၪ့ဎၬထၪ့ဆၧဘဲၫနီၪအၥိၭလီၫႉ
မံဆၩဆၧလုထၪ့ဂီၩ့ကကၠၪ ၦၡၩဂဲၫထဲၩ့စဲၪ့လၫ့ကၠၭလၧၥရိၬဖၧၩ့နီၪလီၫႉ အဝ့ၫဆ့ဂဲၫထဲၩ့စဲၪ့ထၪ့လၧ ၥရိၬဖၧၩ့ဂီၩ့ ဆၧၫ့ထုၪ့အီၪလၧ ၥရိၬမ့ၬယၫကဆိနီၪလီၫႉ အခံၫ့နီၪ အဝ့ၫၥ့ၪယၫဒၪမ့ၬ ၦမုၪကဂၩဂဲၫ လၧအဝ့ၫအအီၪဂီၩ့ ဂဲၫချဲၩ့ဒုၪ့အဝ့ၫနီၪလီၫႉ
ၥၭဘၪ့ – နးဧ့ ယဒၪနၧၩနီၪ ဘၪဆုးမ့ၬဒ့ၭ ယမိအၪ့စၪ့နၧၩဆၧအီၪနီၪႉ
ၦမုၪ – အၪ့စၪ့ဘီၩ နမိအၪ့စၪ့မန့လဲၪႉ
ၥၭဘၪ့ – ပထၪ့ဘၩကၠဲၭအခၫ ပဘၪဆၧၫ့ထုၪ့ႇ ဆၧၫ့နၩ့ႇ ပဘၪထွံၩလၩ့ခၪ့မွဲအ့ၬဧၪႉ အနီၪ ပဘၪ မၩနီၪဘၪန့လဲၪႉ ယမိၥ့ၪယၫအခီၫပယီၫဘိၭႉ အယီၩ ယမၩဘိၭမၩလီၫႉ ယၥ့ၪယၫအခီၫပယီၫနး မံၩ့အ့ၬႉ
ၦမုၪ – အီၩအနီၪၥံၪနီၪ မွဲပလီၩ့မၩဝံၩ့မၩဝၩ့အ့ၬႉ ကဲ ဘဲၫယီၩ အဆိၪထုၬ ယကစၭထၪ့လီၩအ့ၪနၧၩ လၧ ပဆ့ၭ လၧဖါ ဒဲ ဖိၪခွၫ ဒဲ ၥၭမုဆံၫ့ဎံၪ ထုၪ့စူၪယၫအဂဲး အခီၫပယီၫလဖၪအီႉ ပဘၪဆ့ၭ ထုၪ့စူၪယၫ အခီၫပယီၫနီၪ မွဲပအီၪနၪ့ထၪ့ထဲၩ့ လၧပဂး ကဆါယ့ၫၡူၬဎြံၬ ဘၪထိးၥံၫၥၭလၧ ထုၪ့ စူၪယၫလီၩ့အဂဲး ႇ ၂မံၩ့ကမံၩ့နီၪဘိၭ မွဲပဆူနဲၩ နၫ့ဆါ၃ဂၩယွၩလဂၩအဂဲးႇ ၃မံၩ့လမံၩ့နီၪ ပဝ့ၫၥံၪ ယီၩ ပမွဲကဆါယွၩအဆၧအဂဲးႇ ၄မံၩ့ကမံၩ့နီၪဘိၭ လၧဖါကဆါ ဖိၪကဆါဒဲ ၥၭမုဆံၫ့ဎံၪကဆါ အမံၩ့ဖၧၩ့ ပထိးဆၧၫ့ဒိၭန့ ယွၩအဆၧဆိၪဂ့ၩဆိၪဘွၩ ဒဲ ပကိၭဖံၭၥိၭယွၩ ဘဲၫကယိထွ့ၪလၩ့ပၧၩ အဂးဘီၪႉ
ၥၭဘၪ့ – မွဲဧၪအနီၪစွါဘဲၫ ပဘၪဆၧၫ့ထုၪ့ အခီၫပယီၫနီၪလၪအိၩႉ
ၦမုၪနီၪ ခ့ၬယိထဲၩ့ၥရိၬနီၪဂီၩ့
ၦမုၪ – လၧဖျိၩ့ဖျိၩ့အိၩ ၦဎြံၬဖိၪၥံၪဆီၫ့မီၪ့ထၬ ပဆၧၫ့ထုၪ့နီၪ မွဲလၧ ပဖ့ၪလၫ့ဆၧယူၭယၪ့ၡီၩ့လၩ့ စွါဘဲၫႉ ဂီၩ့နီၪ မီၪ့ဎီၩ့ဒၪ ပကကဲၪဎီးကဲၪၡၩ လၧကဆါယွၩအဂး ပအီၪတဲၩဝဲၩ့ထၬၥၭစွါဘဲၫႉ
ၥၭဘၪ့ – အနီၪဘိၭ ပဆၧၫ့နၩ့နီၪလဲၪအိၩ အခီၫပယီၫအီၪပၥ့ၪလဲၪႉ
ၦမုၪ – ပထၪ့ဘၩယွၩအခၫ ၦၡၩဖီလၩ့လံၬဆံၫ့ဎံၪအခံၫ့ႇ ၥၫ့ခၫၥံၪလီၩလၩ့ ဆၧၥၭထိၬပရၧၫ့အခံၫ့ ပဆၧၫ့နၩ့ခိၭနၪကၠၠၭမွဲအ့ၬဧၪႉ ပဆၧၫ့နၧၩ့အီၪနီၪ ပကခိၭနၪဆၧအဂး ပကအၪ့ဎၬဆီၫ့မီၪ့ဆၧအဂး အကြၨၭအဘၪထုၬ အထုၪ့အလး(အနေအထား)ကမံၩ့ဘီၪႉ ဂၠူၩဆၨၩဆၭဖိၪၥံၪဒဲ ဖျိၩ့ဖျိၩ့အိၩ ၦဎြံၬဖိၪၥံၪနီၪ အ့ၪမွဲခိၭနၪ ကဆါယွၩအဆၧလီၩလၩ့လၬလၩ့လဖၪအခၫ ဆၧၫ့နၩ့ခိၭနၪကၠၭဝ့ၫဒၪ အဂဲး လၧလံၬဆံၫ့ဎံၪဖၧၩ့ ကွ့ၭထၬဝ့ၫအီၪဘီၪႉ လၧစလုကၭ (10:39) ဖၧၩ့ နးမၫရံၫနီၪ ဆၧၫ့နၩ့ဝ့ၫ လၧကဆါယ့ၫၡူၬအခၪ့ထံၭဂီၩ့ ခိၭနၪကဆါယွၩအလူအဂဲး ဘၪဆၧကွ့ၭထၬဝ့ၫအီၪဘီၪႉ
ၥၭဘၪ့ခွၫနီၪ ဆၧၫ့နၩ့အၪ့ဎၬဆၧ ကဆိဂီၩ့
ၥၭဘၪ့ – အၨၫ အနီၪစွါဘဲၫ ပထွံၩလၩ့ခၪ့နီၪလဲၪအိၩႉ
ၦမုၪ – ပထွံၩလၩ့ခၪ့နီၪဘိၭ အခီၫပယီၫအီၪလၧ ပဘိၪ့ထၪ့ဘၩထၪ့ယွၩႇ ဆၧဆၫ့လၩ့ၥုၪ့ဆၫ့လၩ့ၥၭႇ ဆၧအၪ့ကံၩ့ဆၧယၫ့ၥၭ ဒဲ ဆၧအၪ့န့ထၪ့ဆၧနီၫ့ယါဘီၪႉ လၧစလုကၭ(၂၂:၄၁)ဖၧၩ့ ကဆါဎြံၬ လချူၭထိးဒံၭဘၪ ဆၧနိၫ့ဆၧနၭအခံၫ့ လ့ၩထၪ့လၧခိၪလီၩ့ဖၫ့ခိၪဂီၩ့ ထွံၩလၩ့အခၪ့ဘၩဆိၪဖၪဆၧ အဂဲး ဘၪဆၧကွ့ၭထၬမွဲအီၪဆ့ဘီၪႉ
ၥၭဘၪ့ – အီၩ ဘနီၪဧၪႉ ဂီၩ့နီၪ ပၡီၩ့လၩ့ပခိၪနီၪလဲၪအိၩ လီၩအ့ၪယၧၩ အခီၫပယီၫဒၪခလူၬႉ
ၦမုၪ – လၧယွၩအမ့ၬယၫ ပၡီၩ့လၩ့ခိၪနီၪ အခီၫပယီၫအီၪဝ့ၫဒၪ လၧဆၧဆၫ့လၩ့ၥုၪ့ဆၫ့လၩ့ၥၭဖၧၩ့ ပအၪ့ကံၩ့ထၪ့ယွၩအဆၧယၫ့ၥၭဒဲ ပဘိၪ့ထၪ့ဘၩထၪ့ယွၩဘီၪႉ
ၥၭဘၪ့ – မွဲယူၭ အနီၪဂီၩ့ ပထွံၩလၩ့ပခၪ့ကခီၫလီၫဂီၩ့ ပၡီၩ့လၩ့ခိၪနီၪလဲၪႉ
ၦမုၪ – အနီၪနီၪ အခီၫပယီၫအီၪဆ့လၧ ပဘိၪ့ထၪ့ဘၩထၪ့ၡီၩ့ယွၩဆ့ႉ ဂီၩ့နီၪ ကိၪဘိၪ့ဆံၫ့ဎံၪ စကရမဲၫ့တူၩအဂး အလၩ့ဆၫ့ထုၬဆၧနဲၪ့ကမံၩ့ဘီၪႉ ခၪ့အထွ့ၫကခီၫနီၪ ထွံၩလၩ့ဝ့ၫထီးအဘုၭ လၩ့ဂီၩ့ ၡီၩ့လၩ့ခိၪနီၪ လၧမံဆၩဆၧလုထၪ့အဖၧၩ့ ၥၫ့မုၥၫ့ခၫၥံၪ ဘၪမၩဝ့ၫဒၪ ၃ဘျၩ့ဘီၪႉ ယူၭထၪ့ ကိၪဘိၪ့ဆံၫ့ဎံၪစကရမဲၫ့တူၩဂီၩ့ကဘျၩ့ႇ ယူၭထၪ့လိၫ့ဂီၩ့ကဘျၩ့ႇ အဝ့ၫၥံၪလချူၭဒိၭန့အၪ့ဒံၭဘၪ ကိၪဘိၪ့ဆံၫ့ဎံၪနီၪကဘျၩ့ဘီၪႉ ဆၧအယီၩနီၪ မွဲလၧကိၪဘိၪ့ဆံၫ့ဎံၪအဂး အလၩ့ဆၫ့ထုၬဆၧဘိၪ့ ဘၩထၪ့လၥၨၩႉ
ၥၭဘၪ့ – အီၩဘနီၪဧၪနး အနီၪဂီၩ့ ပဆိၪဖၪ ယွၩအၥိၪဖိၪအခံၫ့ ပဒဲၩလၩ့ပၥၭနၫနီၪလဲၪအိၩအခီၫ ပယီၫအီၪပၥ့ၪလဲၪႉ
ၦမုၪ – လၧစလုကၭ(18:13)ဖၧၩ့ ကွ့ၭထၬဝ့ၫ ၦအၪ့ကံၩ့အခီၫ့လဂၩ အီၪဆၧၫ့ထုၪ့ဝ့ၫ ယဲၩ့ယိၬတၭ လယိထၪ့ဘၪလၧမူၭခိၪနီၪ ဒဲၩလၩ့အၥၭနၫၡါတၭ စံၭဝ့ၫႇ ယွၩဧ့ ယၫ့ၥုၪ့ယၫ့ၥၭ ၦဆၧဒဲၩဘၭဖိၪ ယၧၩယီၩဆံၭႉ ကွ့ၭထၬဝ့ၫဘဲၫနီၪအၥိၭဘီၪႉ မွဲဆၧဘနီၪ ပဒဲၩလၩ့ပၥၭနၫအခီၫပယီၫနီၪ ပဆၧဒဲၩ ဘၭအဂး မွဲပန့ထၪ့ထဲၩ့ဆၧနီၫ့ယါဆၧနဲၪ့ဘီၪႉ
ၥၭဘၪ့ – အီၩ အခီၫပယီၫအီၪဘနီၪဧၪႉ အိ ယၥ့ၪယၫဘိၩယီၩလီၫႉ အနီၪဂီၩ့ လခဲၫ့ထုၬ ယမိၥ့ၪ ယၫအီၪကမံၩ့ဒံၭနးဧ့ႉ ၥၫ့ခၫၥံၪ နၧၩ့ကၠၠၪလၩ့ မံဆၩဆၧလုထၪ့အဆၧလုလးနီၪ အခီၫပယီၫအီၪ ပ ၥ့ၪလဲၪႉ
ၦမုၪ – ဆၧလၧ ဆၧလုလးနီၪ မွဲလၧကဆါယ့ၫၡူၬဎြံၬ အဆၧနဲၪ့ဘီၪႉ လခဲၫ့ကမံၩ့နီၪ ပကၭၥလံၬ ဆၧအီၪကီၪ့ယီၩ မွဲလၧယွၩနၫ့ဆါဒၪအဝ့ၫ ၥုၪ့ထၪ့ထၬအ့ၪပၧၩမွဲအ့ၬဧၪႉ လၧဆၧလုလးဖၫ့ခိၪ ကဆါယ့ၫၡူၪနီၪအီၪဝ့ၫ မီၪ့ဎီၩ့ ဘဲၫလိးအမၧၫ့အၥိၭဘီၪႉ ဆၧနီၪအကၠီၩ့ ၥၫ့ခၫၥံၪနၧၫ့မၧၫ့ကၠၭ ဆၧလုလးယီၩလၥၨၩႉ အဝ့ၫၥံၪနၧၫ့မၧၫ့ဆၧလုလးယီၩနီၪ မီၪ့ဎီၩ့ဒၪအဝ့ၫၥံၪ နၧၫ့မၧၫ့လၩ့ကဆါယွၩ လီၫ လၥၨၩႉ
ၥၭဘၪ့ – အီၩဘနီၪဧၪႉ ယၥၭန့ၫယီၩယူၭ ဆၧအယီၩၥံၪယီၩ ယၥ့ၪယၫနးဆိၭအ့ၬႉ ပထၪ့မံၩဆၩအ ခၫ ပဘၪမၩဝ့ၫဒၪလဖၪနီၪ အခီၫပယီၫ အီၪယိၬယိၬလ့ၬနီၪ ယၥ့ၪယၫဒၪဘဲၫယီၩလီၫႉ ကယဲ ယမိၥ့ၪယၫလဖၪ နလီၩအ့ၪယၧၩ ဘယီၩနီၪ စံၭခိးစံၭတၩဖၭဒိၪနးဧ့ႉ
ၦမုၪ – န့ဘ့ၭ ဆၧအဂဲးလဖၪယီၩနီၪ ယဖီထၬဘၪလၧ Roman မစ္ဆားပူဇော်ခြင်း ဝိနည်း တော် ဉပဒေ စည်းမျဉ်းချုပ် လံၬစီၩ့ဖၧၩ့ဘီၪႉ လၧလံၬစီၩ့ဖၧၩ့နီၪဘိၭ ကွ့ၭထၬဝ့ၫလၧၫ့လၧၫ့ဎွ့ၩ ဎွ့ၩလၥၨၩႉ ယလီၩအ့ၪနၧၩလဖၪယီၩနီၪဘိၭ ယရွံလီၩအ့ၪနၧၩဒၪလၧ အကၧၩ့ဒိၪလဖၪလီၫဘီၪႉ
ၥၭဘၪ့ – မွဲနးဧ့ႉ တခၩကမွဲနးမံၩ့ စံၭခိးစံၭတၩအၪမၬလ့ၬႉ
ၦမုၪ – န့မနါႉ ကဲ အနီၪဘိၭ ပကထဲၩ့ကၠၭနဲၪႉ
ၥၭဘၪ့ – မွဲမွဲနးႉ
