ထံၫနွ့ၫၦမုၪ – ၂

လၧလံၬပရၧၫ့ဖၧၩ့နီၪ ကဘၪၥိၪ့အ့ၪ စဎွၩ အမၫၥၭဘီၩ့ ထံၫနွ့ၫၦမုၪ ဘဲၫယီၩနီၪလီၫႉ ကထံၪဎး ထံၫနွ့ၫၦမုၪနီၪ ၥၭမဲၪစဎွၩဒိၪ အကၠီၩ့ ခိၭအဝၩၥၭဘီၩ့ ထီးအဂဲၫထဲၩ့ထီၩ့ချုၬလၧၩ့အ့ၬဂီၩ့ လ့ၩလၧ စဎွၩ အီၪနီၪလီၫႉ

စဎွၩဒိၪနီၪ ဒၪထံၫနွ့ၫၦမုၪနီၪ ကထံၪဎး ဘၪအၥၭထံၫနွ့ၫၦမုၪနီၪလီၫႉ အနီၪတၭ စဎွၩနီၪ မွဲလဒုၭထဲၩ့လၧၩ့ဘၪ ထံၫနွ့ၫၦမုၪလၧ အဝၩၥၭဘီၩ့အီၪနီၪလီၫႉ ၥၭဘၪ့နီၪ အီၪခိယိလါအမၫလါနၫ့ မွဲအမၫၥၭဘီၩ့ ဂဲၫထဲၩ့ထီၩ့နးကၠၪလၧၩ့အ့ၬဘိၭ နၪ့ထၪ့အမၫ အီၪနၧၩ့လၧၩ့အ့ၬ လ့ၩလၧ စဎွၩဒိၪအီၪနီၪလီၫႉ ၥၭဘၪ့လဂၩ ဘဲၫကဒၪဘၪအမၫၥၭဘီၩ့အဂး အၪ့ကံၩ့ စဎွၩဒိၪအခွးလါနၫ့ စဎွၩဒိၪဝ့ၫ ၥၭထၪ့ ၥၭဘၪ့နီၪ ဒိၪဒိၪဒ့ၭလီၫႉ ၥၭဘၪ့နီၪ အဲၪအမၫ နၭဒ့ၭအကၠီၩ့ မွဲလၥၭမဲၪလၧၩ့ဘၪ စဎွၩဒိၪနီၪဒဲ စံၭဆၧၫ့ထဲၩ့ဝ့ၫ ၦမုၪနီၪ မအဲၪစဎွၩဧၪ မအဲၪယၧၩဧၪနီၪ အဝ့ၫခွံၬလၩ့ဒၪဝ့ၫအၥၭဆံၭ လီၩဝ့ၫဘဲၫယီၩၥိၭအခၫ စဎွၩဒိၪအၥၭဘၪလၩ့ဎိၭလီၫႉ ဘၪနီၫလဲၪ စွါဘဲၫ စဎွၩဒီၪနီၪ စီၪဘၪၦမုၪနီၪ ကရွံအဝ့ၫ အဝ့ၫနီၪ ကဲၪဒိၪဒဲ မွဲဒံၭလၧ စဎွၩဒိၪကဂၩဒံၭ ၥၭဘၪ့နီၪ ၡၪ့ယါဝ့ၫအကၠီၩ့ မွဲၦမုၪနီၪ ကရွံအ့ၬလၥၨၩႉ

လၧခဲၫ့ စဎွၩဒိၪနီၪ အၪ့မၧၫ့ၦၡၩဂဲၫကိၭန့ ထံၫနွ့ၫၦမုၪနီၪလၧခီၫဂီၩ့ စဎွၩဒိၪ အၪ့မၧၫ့ရွံၦမုၪနီၪ နကအဲၪ ၦမုၪမဲၪအဖိၪခွၫ ၦၡၪ့ဖိၪယါဖိၪဧၪ လမွဲဘၪ နကအဲၪ စဎွၩဒိၪ ဘဲၫၥိၭယၧၩယီၩဧၪ အ့ၪမွဲနအဲၪယၧၩနီၪ နကဎုၬယီၩ မွဲနကဘၪဒၪ ဆၧကၪဆၧဂဲၩ ဆၧၡၪ့ဆၧနၭ နးမံၩ့အ့ၬႉ ကထံၪဎး ထံၫနွ့ၫၦမုၪနီၪ စံၭဆၧၫ့ထဲၩ့စဎွၩ ယအဲၪဒၪ ယဝၩၥၭဘီၩ့လီၫတၭ ၡၪ့ယါဒၪဝ့ၫ ယကဆုး အီၪဒၪလၧ အဝ့ၫကၠၧၫ့ကၠၧၫ့လီၫႉ စဎွၩဒိၪလဂၩ နါဂၧၫ့ဘၪၦမုၪအဆၧချဲၩ့နီၪ ၡၧးဖျး ဎွ့မိၥၭနၪ့ဆၧလခီၫနီၪလီၫႉ လါနၫ့ ၦမုၪအဆၧခွံၬ လၩ့ၥၭအကၠီၩ့ မွဲစဎွၩဒိၪ လီၩဆၧၫ့ထဲၩ့လၥ့ၪလၧၩ့ဘၪနးမံၩ့ဒဲ ထံၫနွ့ၫၦမုၪနီၪ ဘၪဒုၭထဲၩ့ဖိၬထဲၩ့ အဝၩၥၭဘီၩ့ အခဲၫ့နီၪလီၫႉ

ၥၭဘၪ့နီၪ စံၭခိးစံၭတၩဘၪစဎွၩ လၧစဎွၩဖ့ၪလၫ့အ့ၪအဝ့ၫ အခွးအရ့ၩဒဲ လၧအဆံၭဆံၭဒၪအိၩ ဆၧဒုၭပျၧၩ့ ဆၧကၠူၭ ဆၧဂၩ့အကၠီၩ့ၥံၪနီၪလီၫႉ စဎွၩနီၪ အီၪက့ၪဒိၪ အထံၫဖိၪခးဆါ အခွးအရ့ၩဒဲ ၥၭဘၪ့အဆၧၥုၪ့ဒူၩၥၭဒူၩဒဲ အဆၧကိၪ့ၥ့ၪဂ့ၩဒိၪနီၪ ဘၪအၥၭဝ့ၫအၪမၬတၭ ကိၭထၬၥၭဘၪ့နီၪ လၧအဝ့ၫအနီးဖၧၩ့ဂီၩ့ ဖ့ၪလၫ့အ့ၪဝ့ၫမူၩဒၩလၧ ဆၧကိၪ့ၥ့ၪအနိၫ့နီၪလီၫႉ