ဒိၩ့ပၥံၫ့အဂဲး -၃

လၧဒိၩ့ပၥံၫ့ယီၩ ကဲၭၥလံၬဆၧဘိၪ့ဆၧဘၩ Roman Catholic ဂဲၫနုၬလၩ့ထီၩ့အခံၫ့နီၪ မွဲခိၪလၩဘွၩ ဂဲၫနုၬလၩ့ ပၧၩ့ၥၫ့ဆၧလၧ ခးပယၩ့ဖၧၩ့နီၪလီၫႉ အမ့ၫရံကၫ့ ဘၧၩ့ထံၫ ဆၧအီၪကီၪ့နီၪ ဆရၫ Thomas Simon ကၧၩ့ထၪ့ဝ့ၫနီၪလီၫႉ နံၪ့ ၁၈၃၅ လၩ အ့ၫပရၧၫ့နီၪ ကၧၩ့ထၪ့ထဲၩ့ဝ့ၫလၧ ဖျိၩ့ၡၩ့ဖၧၩ့နီၪလီၫႉ ကိၫၥၫဖၠူၫနီၪ လၧဖျိၩ့ဆၨၩၥံၪလဖၪအကျၩ ဂဲၫကဲၪထၪ့ ဘၧၩ့ထံၫဎရံၬဖိၪအဆိၪထုၬလဂၩနီၪလီၫႉ ၦလၧအကၧၩ့ထၪ့ ဖျိၩ့ၡိဖၧၩ့ ဘၧၩ့ထံၫဎရံၬ ဆၧအီၪကီၪ့ နီၪ မွဲဝ့ၫ ဆရၫ Von Meter နီၪလီၫႉ

ပအီၪလၧထံၫထၪကျိၩ့ ဖျိၩ့ဆၨၩၥံၪလဖၪ အၪ့လဲၩ့ထၪ့ထဲၩ့အၥၭလၧ ဒီၩ့ဝိၩ အကၧၩ့ဒိၪဝ့ၫဒၪ အဂဲးအဖး အီၪဝ့ၫနံၫမံၩ့နီၪလီၫႉ အဆိၪထုၬ အဂဲးအဖးကမံၩ့နီၪ လၧဂၪ့ခိၪချိၫ့ယီၩ ဆၧကဲၪထၪ့ယံၫယါ ဆၨၩဆၬလၧအဂဲးဆီၪ့ဂီၩ့ ၡၩအဆၧဝံဆၧနၬ အၪဝ့ၫဆၨၩဆၬဖၭဒိၪလဖၪနီၪ အၪ့ယု ခွံၬ ဆၨၩဆၬအဂဲးဆံၭဘၭဆံၭလဖၪနီၪလီၫႉ ဆၧနီၪအကၠီၩ့ ၦဖျိၩ့အီၪဝ့ၫၡၩခိၬအလးအကျဲၩ့ လနၩ့နၩ့ ဘၪဆုးကျိၭအၥၭလၧ ဒိၩ့ဝိၩ့ၥံၪ အခံၫ့ ယံၬထၪ့အခၫ အၥၭကဲၪထၪ့ဘဲၫဒိၩ့ဝိၩ့ဂီၩ့ ကဘၪဆုးဖီၪ့ဂုးထၬ အဆၧဆၧးဎံၫဆၧးလၩ မွဲလၥ့ၪယၫလၧၩ့ဘၪဝ့ၫဒဲ လၧခဲၫ့ထုၬ ကဲၪထၪ့ ဒီၩ့ဝိၩနီၪလီၫႉ နံၫထံၪကထံၪနီၪဘိၭ ဖျိၩ့ဘုၭဒၭလဖၪ ဘၪဘၩကၠဲၬမီၪ့ဎီၩ့ ခးပယၩ့ထၧၫ့ဘံၪ့ယၫ ဒီၩ့ဝိၩၥံၪအကၠီၩ့တၭ ဆၧဘိၪ့ ဆၧဘၩလမွဲဘၪ ဒီၩ့ဝိၩအလုၫလါၥံၪအကၠီၩ့ အဝ့ၫၥံၪ ကဲၪထၪ့ ဒီၩ့ဝိၩၥ့ၪဆ့နီၪလီၫႉ

ဘၪထွ့ၫလၧ ဆၧကိၪ့ဘၪကိၪ့ၥ့ၪအနိၪ့နီၪ နံၪ့ ၁၈၆၀ အမ့ၫရံၫကၫ့ ဘၧၫ့ထံၫဎရံၬဖိၪ ၦလၧဖီၪ့ထၪ့ဖံၭထၪ့ ဆၧအီၪကီၪ့နီၪ ဖျိၩ့နီၫမၫ့ ဆၧမၩလိၪလးနီၪ ဝဲထၪ့ဝ့ၫလၧ ဒိၩ့ပၥံၫ့ဂီၩ့ ၥီၪ့လိၪ စူၪၥ့ၪခၪ့မၩ ဆၧကိၪ့ၥ့ၪနီၪလီၫႉ ထီး ၁၈၆၁နံၪ့နီၪ ကဲၭၥလံၬၥၫ့ခၫဒိၪ ဝဲထၪ့ စိန်ပေါလူး ဆၧမၩလိၪလးနီၪလီၫႉ နံၪ့ ၁၈၉၀ ဒိၩ့ပၥံၫ့ယီၩ ကဲၭၥလံၬၥၫ့ခၫ Fr. D cruz (ဒီဂရစ်) ဝဲထၪ့ထဲၩ့ စဲၭစူၪဆၧမၩလိၪလး ကလးနီၪလီၫႉ လါနၫ့ ဆၧကၪဆၧဂဲၩ ဆၧမၩထီးထၬအီၪဝ့ၫအၪမၬအကၠီၩ့တၭ လၧခဲၫ့ ဘၪအီၪပထုၬထၬဝ့ၫဒၪနီၪလီၫႉ လၧဒိၩ့ပၥံၫ့ဝံးဖၧၩ့နီၪ ဘုၭဒၭ ဆၧဘိၪ့ဆၧဘၩ ၥၫ့ခၫကၠီး အီၪဝ့ၫအၪမၬနီၪလီၫႉ နံၪ့ ၁၈၉၁နံၪ့နီၪ ဒိၩ့ပၥံၫ့ဖၧၩ့ ဖျိၩ့ဆၧမၩလိၪလး အီၪဝ့ၫ (၇၆) ကၠီးနီၪလီၫႉ မွဲဆၧဘဲၫနီၪအကၠီၩ့ အထီအနီၪဒၪအိၩ ဖျိၩ့ၥံၪအီၪလၧ ဒိၩ့ပၥံၫ့နီၪ ဆၧကိၪ့ဘၪကိၪ့ၥ့ၪ အခွးအရ့ၩန့အၪန့ ဖျိၩ့ဆၨၩၥံၪလၧ အီၪအလး အဂူၫဂၩလဖၪနီၪလီၫႉ