ၦဆံၫ့ဎံၪ Pantaleon အဂဲး    

လၧဎြံၬဆၧအဲၪဆၧကွံၩဖၧၩ့ ထၧၫ့ဖုဝဲထံၩၥိၭထီးအလူၬၥံၪဧ့ႇ  မံၩ့ဎိၩၥၪဖျီၪ မုခွၫလၧအအီၪအနိၪ့ အဆၧရါလၩ့ဖၧၩ့  မုကနံၩယီၩ ယအဲၪဒိၭ ရၩလၩ့န့အ့ၪဘၪနၥံၪနီၪ မွဲဝ့ၫဒၪ ၦဆံၫ့ဎံၪ  Pantaleon အဂဲးအကၠီၩ့နီၪလီၫႉ  ၦဆံၫ့ဎံၪ  Pantaleon အဂံၪ့ဒီၪ့နီၪ ကဲၪအၪမၬဒ့ၭ လါနၫ့ အဝ့ၫအဖါဖါနီၪ  ကၭၥၭလ့ၬဆၧအီၪကီၪ့ လကၭဒ့ၭဘၪႇ ဘၪထွ့ၫလၧ ဘိၪ့ဘၩဂူၫဂၩနးဆ့ၭ ဆၧဆူၩနဲၩအီၪနးမံၩ့အ့ၬနီၪလီၫႉ လါနၫ့ ၦဆံၫ့ဎံၪ Pantaleon အမိမိနီၪ ၥီၪ့အ့ၪအဝ့ၫ ယွၩလူၬယွၩထၫနီၪလီၫႉ

ၦဆံၫ့ဎံၪ Pantaleon အမိမိၥံၫဖီၩ့ခွံၬဒၪ အဝ့ၫဂီၩ့ အဝ့ၫယီၩဘၪလ့ၩအီၪလၧ ၥံၫ့ဎွံၫဆရၫအီၪဂီၩ့ ၥီၪ့လိၪၥၭ ဘၪထွ့ၫလၧ ၥံၫ့ဎွံၫ ဆၧမၩလိၪနီၪလီၫႉ ၦဆံၫ့ဎံၪ Pantaleon ယီၩမၠၩ့ဆၧ အမံၩ့ဎိၩ့ထၪ့ကကၠၪ စဎွၩကိၭအဝ့ၫ ဘၪလ့ၩကဲၪၥံၫ့ဎွံၫဆၧရၫလၧ စဎွၩအီၪနီၪလီၫႉ  ၦဆံၫ့ဎံၪ Pantaleon  ဘၪဖီၫ့ၥံၫ့ဎွံၫအလး ၦၡၩၥံၪနီၪ ယူၭယၫ့ဆၧဘိၪ့ဘၩနးမံၩ့အ့ၬႇ ဆူၩနဲၩနးမံၩ့အ့ၬနီၪလီၫႉ လကၭဒ့ၭဘၪ အဝ့ၫၥံၪ မၩဂၬဂီၩ့ ၦဆံၫ့ဎံၪ Pantaleon နီၪလီၫႉ အခံၫ့ယံၬထၪ့ကကၠၪ ၦဆံၫ့ဎံၪ Pantaleon နးဆ့ၭ စဲၪထၪ့လၧ ကၭၥၭလ့ၬ ဆၧဆူၩနဲၩဖၧၩ့နီၪလီၫႉ 

လါနၫ့ ကၭၥလ့ၬ ၥၫ့ခၫ လဂၩ ဒၪအဝ့ၫဂီၩ့ ကြၨၭစၨကိၭထဲၩ့အဝ့ၫ အမံၩ့မံၩ့အကၠီၩ့နီၪ ၦဆံၫ့ဎံၪ Pantaleon ယီၩ ဂဲၫထဲၩ့ထီၩ့ထဲၩ့လၧ ကၭၥလ့ၬဆၧအီၪကီၪဖၧၩ့နီၪလီၫႉ လၧခဲၫ့နီၪ အဝ့ၫအဖါဖါနးဆ့ၭ နူၬလၩ့လၧ ကၭၥလ့ၬဆၧအီၪကီၪဖၧၩ့နီၪလီၫႉ ၦဆံၫ့ဎံၪ Pantaleon ယီၩၦလၧ အီၪမုၬအီၪဆီၪ့လအီၪဘၪၥံၪအဂး အဝ့ၫလ့ၩမၠၩ့အ့ၪ အပီၩကိၭကၠၫဒ့ၭနီၪလီၫႉ ၦဆံၫ့ဎံၪ Pantaleon ယီၩ ဆၧဆူၩနဲၩဎိၩအၪမၬဒ့ၭအကၠီၩ့နီၪ မၠၩ့ၦၡၩ အဆၧဆၫဘၠၪကိၭကၠၫဒ့ၭနီၪလီၫႉ  လါနၫ့ စဎွၩနီၪ နဲၩအဝ့ၫနးဆ့ၭအ့ၬ ႉ အဝ့ၫလီၩမၠၩ့လၧ ဆၧလဂ့ၩလဘၪပၧၫ ဖၧၩ့ၥၭ အကၠီၩ့နီၪ ၦၡၩအဆၧဆၫဘၠၪ စဎွၩလီၩအဝ့ၫအဆၧမၪဘဲၫယီၩၥိၭနီၪလီၫႉ ဆၧနီၪအကၠီၩ့ စဎွၩနီၪ မၩၥံၫခွံၬ ၦဆံၫ့ဎံၪ Pantaleonနီၪလီၫႉ