အဲၪဒိၭနဲၩ့ဎီၩ့ဂီၩ့ ဆုးပၧၩ့ထၬဝ့ၫ ဂၪ့ခိၪယီၩအဂ့ၩထုၬမွဲဝ့ၫ ခးSwitzerland အဂဲး – ၁
ဘဲၫထၧၫ့ဖုဝဲဖျိၩ့ဖိၪၥံၪ ၥ့ၪယၫထၬအၥိၭ ပဂၪ့ခိၪချိၫ့ယီၩ ကနံၪ့ဒဲ ကနံၪ့ ဂဲၫဂၭဂီၩ့ဂၭစၪထၪ့ယူၭနီၪလီၫႉ ၦၡၩၥံၪအကၠီၩ့ ပနဲၩ့ဎီၩ့ယီၩ ဂဲၫအၪ့လဲၩ့ထၪ့အၥၭ ဘဲၫယီၩၥိၭနီၪ ထံၫခးကနၩ့နၩ့ ဆုးဖီၪ့ဂုးခၧၫ့ထၬဝ့ၫ ဂ့ၩဂ့ၩနီၪလီၫႉ လၧဂၪ့ခိၪချိၫ့ယီၩ ထံၫခးလၧ အဆုးဖီၪ့ဂုးထၬ နဲၩ့ဎီၩ့ဂ့ၩဂ့ၩထံၫခးၡၩခိၬအဖၧၩ့ ခးဆွံဇလၫ့နီၪ မွဲပၫဝ့ၫလၧ ထံၫ ခးဖၧၩ့အဂ့ၩထုၬနီၪလီၫႉ
ခးဆွံဇလၫ့ယီၩ ဘဲၫအဝ့ၫၥံၪအခး ကဆုးအီၪဂုးခၧၫ့လၧ နဲၩ့ဎီၩ့အဆီၪ့အချဲၪ့အဂး ဖီၪ့ထၪ့ဖံၭထၪ့ ဆၧလဖၪအဖၧၩ့ အဆိၪထုၬ ကထံၪနီၪ မွဲဝ့ၫ (၁) ခွံၬၡိၬဆၧဘံၪၥိၭ ၥ့ၪၥ့ၪဘၪဘၪဒဲ ၥိၩ့ထၪ့ထဲၩ့ဝ့ၫဒၪ (Recycling ) နီၪလီၫႉ ခးဆွံဇလၫ့နီၪ ဆၧခွံၬၡိၬဆၧဘံၪၥိၭ ၥနိၫ့ဎိၩဒိၪဝ့ၫတၡါလီၫႉ အ့ၪခွံၬၡိၬ ဆၧဘံၪၥိၭ ဘၪဆီၪ့အခီၫ့ ၥနိၫ့ ၥိၩ့ထၪ့ထၬဝ့ၫအကၠီၩ့ ပဒိၪထုၬထၪ့ထၬ နုၬၥနိၪဆၧဘံၪၥိၭထိၪ့လဖၪ အ့ၪခွံၬၡိၬဝ့ၫမၬ ဆၧဘံၪၥိၭလဲၪ့ၥိၪ ဂဲၫအၪ့န့နီၪလီၫႉ မွဲဆၧဘဲၫနီၪ ၦခမျၧးၥံၪၥံၪလဖၪ ဘဲၫအဝ့ၫၥံၪအထီးကလူၬၡၩအကၠီၩ့ လလိၫ ဘၪ မၩကဲၪထၪ့ဆၧဘံၪၥိၭအ့ၬဂီၩ့ အီၪကၠၭဝ့ၫအၥိၭ ဆိၫ့ကၩထဲၩ့ဝ့ၫန့ မွဲဝ့ၫ ပလၫ့ႇ စၭခီၫ့ဒဲ ပလၭစတ့ၭလဖၪနီၪ အၪ့နၩ့ထၬဝ့ၫ ဂ့ၩဂ့ၩဂီၩ့ လ့ၩခွံၬၡိၬဝ့ၫလၧ အခီၫ့လအီၪဘၪ Recyclable စင်တာၥံၪနီၪလီၫႉ
နံၫထံၪကထံၪနီၪ ပၧၩ့ထၬၥံၪ့ကျိၭလဖၪဒဲ ယ့ၪချံၪ့ဝ့ၫဒၪလးကျဲၩ့လဖၪ နီၪလီၫႉ ခးဆွံဇလၫ့ၥနိၫအဖၧၩ့ ထံၫခးအဝၩ့ ၥံၪ့ကျိၭလးကျဲၩ့ ၥၧၫ့ပိၩ့ကပိၩ့နီၪ ဘဲၫလဂၭဂီၩ့ဘၪနးဆံၭအဂး ပဒၩ့ထၬဝ့ၫ ဂ့ၩဘၪစဲၪ့နီၪလီၫႉ အ့ၪမွဲဖ့ၬၥံၪ့ကထံၭ အလးထနီၪ လမွဲဘၪ အနဲၩ့အဎီၩ့နီၪ ကဘၪၥုၪ့လၩ့ထဲၩ့ အၥၫ့ကထံၭၥနိၫအီၪအကၠီၩ့ အဝ့ၫၥံၪအထံၫခး ယ့ၪချံၪ့ဝ့ၫဒၪ နဲၩ့ဎီၩ့အဎံၫအလၩနီၪ အီၪခီၫလၧ နံၪ့ဆံၫလၩယံၬအိၩ ဂၭဂီၩ့အ့ၬဂီၩ့ ဆုးအီၪဂုးခၧၫ့ဝ့ၫဘဲၫဒံၭနီၪလီၫႉ
