ဒိၩ့ပၥံၫ့အဂဲး -၁

အထီဘဲၫယီၩ ဒိၩ့ပၥံၫ့အီၪအလးနီၪ လၧဖျိၩ့ဖျိၩ့အိၩ မွဲဒၪ ကျိၩ့ကကျိၩ့နီၪလီၫႉ ကျိၩ့နီၪ ဖျိၩ့ဆၨၩၥံၪလဖၪ ဖိၬလိၬထၪ့ တဝၫ့ဂီၩ့ ကိၭဝ့ၫအမံၩ့လၧ ကီၭဆမံၩ (ကော့ဆမီး) နီၪလီၫႉ ဖျိၩ့ဆၨၩဖိၪလဖၪ အီၪထၬလၧ ကျိၩ့ယီၩ နံၪ့ဆံၫလၩယံၬတၭ အနံၪ့ဂဲၫယံၬထၪ့အခၫ ကျိၩ့နီၪ ဆုးကျိၭအၥၭလၧ ဆၧဒၩ့ခိၪတၭ ဂဲၫကဲၪထၪ့ ဖံၬဒၩလးနီၪလီၫႉ လၧခဲၫ့ ဆၧအလးနီၪ ဂဲၫကဲၪထၪ့ ဝံးပၫ့လဲၫ့ၥန့ၫလးဂီၩ့ ထံၫယဲၩ့ခးယဲၩ့ ဖနံၬထးကၩလဖၪ ဂဲၫဖနံၬထးကၩဆၧ အရ့ၩဒိၪဝ့ၫဒၪ ဝံးကဝံးနီၪလီၫႉ မွဲဒံၭလၧ ဎံၫလၩဝ့ၫဒၪ ဝံးကဝံးနီၪလီၫႉ ဝံးယီၩ ၥုၪ့ထၬဝ့ၫဒၪလၧ လးကျဲၩ့အမုၬတၭ ဆၧန့ဝ့ၫကိၭမံၩ့ ဝံးမွဲမွဲဆ့နီၪလီၫႉ ဝံးဖိၪလဖၪနီၪ အခံးအဂၩ့ထီၫ့ဂီၩ့ အၥုၪ့ၥၭ ဂ့ၩဘွၩကၠၭနီၪလီၫႉ ၦမုၪဖိၪၥံၪလဖၪနီၪ အယၪဘွၩဂီၩ့ အမ့ၬခွၩ့တၭ အမ့ၬအဲၪ့ဝ့ၫဒၪနီၪလီၫႉ ဂံၪ့လဖၪနီၪ မွဲၥုၪ့ထၬဝ့ၫ အခၪ့ထီၪ့ထီၪ့လီၫႉ ဘၪနီၪလဲၪ ဘၪၥုၪ့ဂံၪ့ အခၪ့ထီၪ့နီၪ မွဲဘၪၥၭမဲၪ ဘီၪလဖၪအကၠီၩ့နီၪလီၫႉ ဆၧအလးယီၩ ဘီၪၥံၪအီၪအၪမၬနီၪလီၫႉ

လၧခဲၫ့ ကီၭဆမံၩအမံၩ့နီၪ ဂဲၫလၩ့မါထၪ့ကဆံၭဆံၭဂီၩ့ ဆၧကိၭထၪ့ထဲၩ့အမံၩ့လၧ ပၥံၫ နီၪလီၫႉ ဖျိၩ့ၡိမိထံၭလဖၪနီၪ ကိၭကၠၭဝ့ၫလၧ ဒိၩ့ပၥံၩနီၪလီၫႉ အထီနီၪ ခိၪလၩဘွၩၥံၪလဖၪ ကွ့ၩကိၭဝ့ၫလၧ Dom Bassein နီၪလီၫႉ လၧမိၫဆၨၩလဖၪအဖးဖၧၩ့နီၪ ဝံးယီၩ မွဲဒိၩ့ပၥံၫ့ကဝံးလီၫ လကၭဘၪဒဲ ပၥံၫ့ခးဒီၪ့လးဝၩ့ဖၭဒိၪအဖၧၩ့ ဝံးအီၪဝ့ၫ အၪမၬနီၪလီၫႉ လၧမိၫဆၨၩၥံၪလဖၪ အဖးဖီၩ့ဖၧၩ့ AD 625 နီၪ အီၪလၧ ပခိၩ မိၫဆၨၩၥံၪအထံၫခး ဒိၩ့ပၥံၫ့ခးဒီၪ့အဖၧၩ့ ပၧၩ့ဝ့ၫဒၪ ဝံး ၃၂ဝံးအကၠီၩ့ နဲၪဖျီၪ့ထၪ့ထၬဝ့ၫဒၪနီၪလီၫႉ

ထီမုဆၫကနံၩယီၩ ဝံးပၥံၫ့ႇ ဝံးမၠီၩ့မၠၭႇ ဝံးဟ့ၩၥတၭႇ ဝံးမအူၪပ့ၫဒဲ ဖၠၫပိၫ့ခးရ့ၫအဖၧၩ့ ပကဒၪဘၪ ဖျိၩ့ဆၨၩဖိၪၥံၪအီၪဝ့ၫ ဎံၩ့လးနီၪလီၫႉ