ယ့ၫၡုၬကိၭန့အထံၩအဖျဲအဆိၫထုၬလဖၪ.

ဆၧမၩအၥၭလၧအဆၧၫ့ထုၪ့ လၧကွံၩဂန့ၭဇရ့ၭအနဲၩ့ထံၭနီၪ, ၦခမျၧးဂဲၫခိၭနၪယွၩအလူအထၫတၭ, အဝ့ၫၥံၪဘၪထံၭအဝ့ၫဒၪလီၫ. မွဲအဒၪဘၪချံၫနံၫဖျိၪ့ စိၭထၪ့အၥၭလၧကွံၩအနဲၩ့ထံၭတၭ, ၦမၩယၪလဖၪနီၪ စဲၪ့ထၪ့ခွံၬယူၭဝ့ၫလၧအဖၧၩ့တၭ, ၥူၫဝၭခွံၬအၡၬလီၫ.
အဝ့ၫဒၪလ့ၩနုၬဝ့ၫလၧချံၫလဖျိၪ့ လၧအမွဲစစဲမၧၫ့အဆၧတၭ, အၪ့ကံၩ့ဝ့ၫဘဲၫၥိၭ အမိဆ့ၭဎၪခွံၬလၧခီၫ့နီၪ နးဆံၭး ဆၧၫ့နၩ့ဝ့ၫလၧချံၫဖၧၩ့နီၪ, ၥီၪ့ထဲၩ့ၥၫ့ထဲၩ့ၦခမျၧးလီၫ. ထီးအလီၩလၩ့လၬလၩ့ဆၧဂီၩ့တၭ, စံၭစစဲမၧၫ့ၥုၭစိၩချံၫလၧထံၫယိၬတၭ, ဘဲၫၥိၭနၥံၪမိန့ဘယၪနီၪ, ခွံၬလၩ့နၥံၪအၡၬဘီၪ. စစဲမၧၫ့ချဲၩ့ဆၧၫ့ဆၧတၭစံၭဝ့ၫ, ကဆါဧ့, ၦမၩယူၭၥၫ့နၩချီၩ့တၭ, ပန့ဆၧ နးမံၩ့အ့ၬ. မွဲလါနၫ့ဘိၩ လၧနလူအကၠီၩ့တၭ, ပမိခွံၬလၩ့ၡၬလီၫ. မၩဝ့ၫဘဲၫနီၪတၭ, န့ယၪခမျၧးဖၭဒိၪနီၪ, အၡၬယၬၥၫ့ဝ့ၫတၭ, ဘဲၫၥိၭအထံၩအၥိၭအီၪ လၧချံၫဂူၫဂၩအဖၧၩ့နီၪ မိဂဲၫမၩဆၧၩ့ဝ့ၫတၭ, ဝါစိၩအစူၪလီၫ. အဝ့ၫၥံၪဂဲၫဝ့ၫတၭ, မၩဎွ့ၩချံၫနံၫဖျိၪ့ထီး အလၩ့ဘၧၩ့ၥၫ့ဝ့ၫဒၪလီၫ. စစဲမၧၫ့ပံတၧၫဒၪဘၪဝ့ၫနီၪ, ထွံၩလၩ့အၥၭ လၧယ့ၫၡုၬအခၪ့လုးခိၪထံၭတၭ, စံၭဝ့ၫ, ကဆါဧ့, စဲၪ့ထၪ့ခွံၬလၧယအီၪဆံၭ. အဂဲးဘဲၫယီၩ ယမွဲၦဆၧဒဲၩဘၭဖိၪလီၫ. အဂဲးဘဲၫယီၩအဝ့ၫဒၪ, ဒဲၦအီၪလၧအၥိၭကိၭဂၩဒ့ၭနီၪ, ထီၫမံၫထီၫမၪလၧယၪခမျၧးလၧအမၩန့ဝ့ၫအကၠီၩ့လီၫ.- စဇ့ၭဘဒံၫအဖိၪခွၫစယ့မံၭ, ဒဲစယီဟၫ့လၧအမွဲစစဲမၧၫ့အၥိၭနီၪ, မၩအၥၭဘဲၫနီၪၥိၭဆ့လီၫ. ယ့ၫၡုၬစံၭစစဲမၧၫ့, ထီးၥၭမဲၪဆၧလဂ့ၩ, ထီးယီၩစူၪယၫခိၬတၭ, နမိခွံၬၡၬန့ ဘၪၦၡၩလီၫ. ထီးအစိၭထၪ့ချံၫလၧခီၫ့တၭ, အဝ့ၫၥံၪ စဲၪ့ဒၪအဆၧထီးအလူၬတၭ, ဖိၬထၪ့အခဲၫ့လီၫ.