ၦမၩဆၧဖိၪလဖၪလၧစဘံၭလးဖၧၩ့.(စမၭၥုၫ (၂၀:၁-၂၀)

ၦမၩဆၧဖိၪလဖၪလၧစဘံၭလးဖၧၩ့.
အဂဲးဘဲၫယီၩ ဆၧလၧမူၭခိၪအဘၩ့အမုးနီၪ, မၩအၥၭဘဲၫဂံၪ့ကဆါအၥိၭလၧအစဲၪ့ထၪ့လၧဂီၩနၪခုၬ ဘဲၫအမိအၪ့မၧၫ့လံၩ့ ၦမၩစဘံၭအလးအၥိၭနီၪလီၫ. အဝ့ၫဒၪအုၩ့လၩ့ဝ့ၫလၧၦမၩဆၧလဖၪ လၧအဝ့ၫၥံၪမိန့ဒန့ရံၫလဂၩ လဘံၪ့လၧလနံၩအဂးတၭ, အၪ့မၧၫ့အလ့ၩလၧအစဘံၭအလးဖၧၩ့လီၫ.
ၥၧၫ့နၩရံၩဘၪကၪတၭ, အဝ့ၫဒၪစဲၪ့ထၪ့ဝ့ၫတၭ, ဒၪဘၪလၧၦဂူၫဂၩလဖၪ ဆၧၫ့ထုၪ့ပျီၩပျီၩလၧဖၠၫဖၧၩ့တၭ, စံၭအဝ့ၫၥံၪ,လ့ၩနၥံၪဝ့ၫလၧစဘံၭအလးဖၧၩ့ဆ့ဆံၭ. ထီးအတီၩအဘၪနီၪယမိဖ့ၪလၫ့နၥံၪလီၫ. အဝ့ၫၥံၪလ့ၩဝ့ၫလီၫ.
မၩဒီၭလဖၧၫ့, လၧဎူၫနၩရံၩဒဲခွံၫနၩရံၩဘၪကၪနီၪ, စဲၪ့ထၪ့ဝ့ၫတၭ, မၩဝ့ၫဘဲၫနီၪအၥိၭလီၫ. လၧလဆံၫလနၩရံၩဘၪကၪနီၪ စဲၪ့ထၪ့ဝ့ၫတၭ, ဒၪဘၪလၧၦဂူၫဂၩလဖၪ ဆၧၫ့ထုၪ့ပျီၩပျီၩတၭ, စံၭအဝ့ၫၥံၪ မွဲဘၪနီၫလၧနၥံၪဆၧၫ့ထုၪ့ပျီၩပျီၩၥံၫ့နံၩချီၩ့ထီးယီၩလဲၪ.
အဝ့ၫၥံၪစံၭ, အဂဲးဘဲၫယီၩ ၦအၪ့မၧၫ့လံၩ့ပၧၩနးဂၩအ့ၬ.အဝ့ၫဒၪစံၭအဝ့ၫၥံၪ, လ့ၩနၥံၪဝ့ၫလၧစဘံၭအလးဖၧၩ့ဆ့ဆံၭ. (တၭထီးအတီၩအဘၪနီၪနၥံၪမိန့ဘၪလီၫ.)
မုမ့ၬဂၪလၩ့နီၪ, စဘံၭလးအကဆါစံၭ, ၦလၧအခိၭယိဆၧလဂၩ, ကိၭထဲၩ့ၦမၩဆၧလဖၪဆံၭ. ၦလ့ၩမၩဆၧလၧခဲၫ့ထုၬလဖၪ ဖိးလၧၦမၩဆိၫဆၧလဖၪနီၪဖ့ၪလၫ့အလံၩ့အလဲၫဆံၭ.- ၦလၧအလ့ၩမၩဆၧ လဆံၫလနၩရံၩလဖၪဂဲၫဝ့ၫတၭ, န့ဘၪဒန့ရံၫဂၩဘံၪ့ဂၩဘံၪ့လီၫ.- ထီးၦလၧအလ့ၩမၩဆိၫဆၧလဖၪနီၪ ဂဲၫဝ့ၫတၭ, အဝ့ၫၥံၪဆီၫ့မီၪ့လၧအမိန့ဘၪဆၧအၪနဲၪ့အနီၪ ဒံၭလီၫ. မွဲလါနၫ့ဘိၩ န့ဘၪဝ့ၫဒန့ရံၫဂၩဘံၪ့ဂၩဘံၪ့ဆ့လီၫ. ထီးအန့ဘၪဝ့ၫနီၪ, ၥူၭဝံၥူၭလၩဂံၪ့ကဆါလီၫ. စံၭဝ့ၫဒၪ, ပဝ့ၫဒၪယီၩ ၦဘၪယိၭဆၧအဎၧၫ့ဒဲဘၪဆၧခိဆၧဝီၩအထီတၭ, နအီၪက့ၪၦလၧအမၩဆၧန့ၫလနၩရံၩလဖၪနီၪ,န့ၫၥိၭလၧပၧၩယီၩမၬကၨ.
အဝ့ၫဒၪချဲၩ့ဆၧၫ့ဆၧတၭ, စံၭၦလၧအဝ့ၫၥံၪအကျၩလဂၩ,တခွၫဧ့, ယမၩနၧၩလၧဆၧလတီၩဘၪနးမံၩ့အ့ၬ.နအုၩ့လၩ့လၧယၧၩ လၧဒန့ရံၫလဘံၪ့အဂးမွဲအ့ၬဧၪ.- မၩန့ထၪ့ထဲၩ့နဆၧတၭ, ထဲၩ့ထဲၩ့ဆံၭ. ၦအထုၬလဂၩယီၩယၥၭအီၪလၧယမိဖ့ၪလၫ့အဝ့ၫနီၪ ဘဲၫနဝ့ၫဒၪအၥိၭဆ့လီၫ. ယမၩယဆၧဒၪယဝ့ၫထီးဒၪယၥၭယီၩတီၩအ့ၬဧၪ. မွဲယဂ့ၩအကၠီၩ့နီၪနယိဆၫနမ့ၬ ဆ့ဧၪ.
ဘဲၫနီၪအၥိၭ ၦလၧခဲၫ့လဖၪနီၪ မိအီၪဘၪလၧယၫတၭ, ၦလၧယၫလဖၪ မိအီၪဘၪလၧခဲၫ့လီၫ. အဂဲးဘဲၫယီၩ, ၦလၧဆၧကိၭဝ့ၫလဖၪနီၪအီၪဝ့ၫအၪဂၩတၭ, အ့ၪမွဲၦလၧဆၧရွံန့ဝ့ၫလဖၪနီၪ အီၪၡၩခိၬဂၩလီၫ.

ယ့ၫရှူၬလီၩဖျီၪထၪ့ၥၧၫ့ဖၧၫ့လဖၧၫ့ ဘၪဆဲၫ့အဆၧၥံၫအဂဲး.

ယ့ၫရှူၬလ့ၩထၪ့ လၧယရုစလံၫ့တၭ, လၧဖၧၩ့ၥၭ နီၪ ကိၭန့အထံၩအဖျဲလဆံၫနံၫဂၩ လၧဆၧကဒုၩအလးလီၫ.- စံၭဝ့ၫဒၪ, ယိခွါ,ပလ့ၩထၪ့လၧယရုစလံၫ့တၭ,ၦၡၩအဖိၪခွၫယီၩ မိဘၪဆၧဖ့ၪလၫ့ခွံၬဝ့ၫလၧ ၦလုဆၧအဒိၪၥံၪ ဒဲလၧၦကွ့ၭလံၬၥံၪအစူၪဖၧၩ့လီၫ. ၦလဖၪနီၪ မိစ့ၩရၫ့ၥံၫဝ့ၫတၭ, မိဖ့ၪလၫ့ဝ့ၫလၧၦဆၨၩလဖၪအစူၪဖၧၩ့ ဘဲၫအမိဒုၪဒွ့ၪဝ့ၫ, ဒိၪဝ့ၫထးဝ့ၫ, ဒဲဖျၩထၪ့ဝ့ၫလၧထုၪ့စူၪယၫအလီၩ့အၥိၭလီၫ. ထီးအဘၪ ၥၧၫ့နံၩလနံၩနီၪ, မိဂဲထုၪ့ထဲၩ့ဝ့ၫဒၪလီၫ.
မိလဂၩအဆၧအၪ့ကံၩ့အၪ့ယၫ.
ထီးနီၪလဖၧၫ့စဇ့ၭဘဒံၫအဖိၪခွၫလဖၪအမိနီၪ ဂဲၫလၧအအီၪ လၧအဖိၪခွၫၥံၪအၥိၭတၭ, ဘၩထၪ့ဆၧတၭ,အၪ့ကံၩ့ဆၧလမံၩ့မံၩ့လီၫ.