ၡၩခမျၧးၥံၪ အီၪက့ၪထး အဆၧန့ၥၫ

ပအီၪၥၭမၧၫ့ ပဂၪ့ခိၪချိၫ့ယီၩ အထီဘဲၫယီၩ ဂၭဂီၩ့ဂၭစၪထၪ့ႇ ဆၧလၩ့အၪ့ယိၫအီၪဂီၩ့ ဆၧဂုးခၧၫ့အီၪလၧၩ့အ့ၬနီၪလီၫႉ ပဂၪ့ခိၪအမ့ၬပၫ အၪ့လဲၩ့ထၪ့အၥၭဂီၩ့ ပကဆုးဖီၪ့ဂုးခၧၫ့အဂး ဘၪကြၨၭစၨၭကျၭနီၪလီၫႉ ၥံၪ့ဎွံၪအစုၪအီၪလဖၪအကၠီၩ့ လံၩအထုၪ့ဒဲ ထံၫအထုၪ့ၥၭလိၪ ၥၭလံၬထၪ့ဂီၩ့ ဂၪ့ခိၪလံၩအထုၪ့နီၪ ဖၫ့လိၫ့အံၫ့စီၩ့အခူၪလဖၪ ဎွ့ၩလၩ့ဝ့ၫဒၪနီၪလီၫႉ မၫဆမံၭလဖၪ ဎွ့ၩလၩ့ဝ့ၫဒၪလၧ ပလၭစတ့ၭနီၪလီၫႉ ထံၫခိလီၫ့လဖၪ ဖံထၪ့ႇ ပၫ့လဲၫ့ထံၫအမ့ၬပၫ ဂဲၫထီၪ့ထၪ့ႇ ဆၧဆၧၩ့အ့ၬထံၫၡၩႇ ၡိၬကျၩမ့ၪလဖၪႇ ဟၫရံၫကံၩ့လံၩမုလဖုၬလဖၪဒဲ ထံၫဎိၩလၩ့ကဲၪထၪ့ဝ့ၫဒၪ ဆၧလၩ့အၪ့ယိၪလဖၪၥံၪယီၩ ဂဲၫဆီၪ့ထၪ့နီၪလီၫႉ ဆၧဖိၪဆၧဎါလၧ အီၪၥၭမၧၫ့ၡိၬကျၩလဖၪ ဂဲၫလၩ့မါထၪ့ယူၭနီၪလီၫႉ

            ဆၧဒုၭၥုၭလဖၪအကၠီၩ့ ဆၧဂၭဂီၩ့ဂၭစၪဒဲ ၦၡၩဘၪၥံၫဂီၩ့ၥံၫစၪ ဂဲၫနၭထၪ့ႇ ဆၧကၪဆၧဂဲၩ အဂဲးဆီၪ့ထၪ့ဒဲဆုးကဲၪထၪ့ဘဲၫဒံၭနီၪလီၫႉ ဆၧလဖၪၥံၪယီၩ ထီးအလူၬနီၪ ၦၡၪ့ဖိၪၥံၪလဖၪႇ ၦလၧဘၪထိးခွံၬၡိၬအၥၭလဖၪႇ ၦလၧဘၪထိးမၩနၧၩ့မၩစၪအၥၭလဖၪႇ ၦလၧ ဘၪဎဲၪ့ဆၧဒုၭၥုၭၥံၪလဖၪႇ ဖိၪၥၪဆံၭဖိၪၥံၪႇ ၦမုၪဖိၪၥံၪႇ ၥၭၡါၥံၪလဖၪဒဲ မသန်စွမ်းလဖၪၥံၪ မွဲဘဲၫၦအဂဲးဆံၭဘၭဆံၭလဖၪ ကဲၪထၪ့ ဆၧၥံၫဆၧဆၫဒဲ နိၪ့နၭဆီၪ့ထၪ့ဝ့ၫ ဆၧနိၪ့ဆၧနၭလဖၪနီၪလီၫႉ လၧဆၨၩခးဒီၪ့ဖိၪၥံၪအဖၫ့ခိၪ ဆၨၩဆၬဒဲ ဆၧဘိၪ့ဆၧဘၩ ၡၩခမၧးၡၩခိၬအဖၫ့ခိၪ ဆၧမၩနၧၩ့မၩစၪလဖၪ ဆုးကဲၪထၪ့ဘဲၫဒံၭနီၪလီၫႉ

            ပကဲၪၦၡၩၥံၪလဖၪ ပကဲၪထၪ့ထံၫဖိၪခးဆါႇ ဆၧဘိၪ့ဆၧဘၩႇ ဆၨၩဆၬႇ ဆၧးဎံၫဆၧးလၩႇ ဆၨၩဆၬဒဲ ဂံၪ့ဒီၪ့အဆၧဆုးကျိၭအၥၭႇဆၧဆီၪ့မီၪ့ဒဲ ထံၫခးအနိၪ့ၥံၪလဖၪ လမီၪ့ဎီၩ့ဘၪလါနၫ့ လၧအခၪ့ထံၭၥၫ့အိၩမွဲဂ့ၩႇ အထုၬမွဲဂ့ၩႇ ဂၪ့ခိၪကဖျိၪ့အဖၧၩ့ ပဂၭဖၬကၠၭကၠၧၫ့ကၠၧၫ့ႇ ပၥွံၭကၠၭလံၩမီၪ့ဎီၩ့ဂီၩ့ ပအီၩကၠၭထံၫမီၪ့ဎီၩ့နီၪလီၫႉ ဂၪ့ခိၪချိၫ့ယီၩ ပအီၪကၠၭကၠၧၫ့ကၠၧၫ့မီၪ့ဎီၩ့ကဂံၪ့လီၫဂီၩ့ ဂၪ့ခိၪချိၫ့ယီၩ မွဲၦထီးအလူၬအဂၪ့ခိၪချိၫ့ အီၪဝ့ၫကဒုၩလီၫ ဂံၪ့နီၪလီၫႉ