ထိၪၡၬလဖၪ ဖံၭၥိၭဘၪမၪလၧ ကျၭလဘံၪ့ – ၄

လယံၬလမီဘၪ စဎွၩဖိၪခွၫ ၡ့ၫမၡၩနီၪ ဂဲၫစိၩလၧ ၦအၪ့ဎၬဆၧဖိၪဆၧဎါအအီၪ ဒၪဘၪလၧ အဝ့ၫဂၪ့နီၪတၭ စံၭဝ့ၫ နမ့ၬထံၫလၩ့နီၪ ဘၪမနီၫလဲၪ ဝဲစီၩဧ့ႇ ၦအၪ့ဎၬဆၧဖိၪဆၧဎါနီၪ ယိထၪ့ ၡ့ၫမၡၩဂီၩ့ ကဆါထိၪၡၬဒိၪယီၩ နခၭၥံၫခွံၬဘ့ၭ အၪ့စၪ့ထဲၩ့ဝ့ၫအခၫ မွဲနဲၪဝဲစီၩ မနၬမၬလဲၪဖုဧ့ႇ နခၭၥံၫခွံၬ ကဆါထိၪၡၬဒိၪယီၩ မွဲဒၪ ယဆၧခိးတၩအီၪ ကဆါဒိၪလီၫႉ ယလ့ၩခၭ ဆၧဖိၪဆၧဎါ ယဖၧၩ့ၥၭဘၪမၪ ဆၧဂၭဖျိၭယၧၩ ယဒၪဘၪဆၧကၪဆၧဂဲၩဒဲ ယၥၭလၧမုၬဘၪအထီဖၧၩ့ ကဆါထိၪၡၬဒိၪယီၩ  ဂဲၫဒၪယၧၩဂီၩ့ ဎွံၩ့ထၪ့အလူ လ့ၩယူၩလၧ ယမ့ၬယၫ ကဆၫ့ကဆၫ့ နဲၪယၧၩဖၧၩ့ၥၭ အတီၩအလီၩ့ႇ ယလ့ၩဖိၬအခဲၫ့ႇ ယဒၪထဲၩ့ဖၧၩ့ၥၭႇ အဂ့ၩအတီၩတၭ ယဂဲၫထဲၩ့ထီၩ့လၧ ယဂံၪ့ယဎၫ့ ဂ့ၩဂ့ၩဘၪဘၪနီၪလီၫႉ ၦလၧဆၧခၭဆၧဖိၪဆၧဎါနီၪ လီၩဘၪ စဎွ့ၩဖိၪၡ့ၫမၡၩနီၪလီၫႉ

ဘဲၫၥိၭ ၡ့ၫမၡၩနီၪ ၥ့ၪယၫဝ့ၫတၭ အၥၭလမုၬဘၪဒဲ ဆၧဘၪမၪဎိၩဒိၪအကၠီၩ့စံၭဝ့ၫ ယကဘၪမၩ ပၥ့ၪလဲၪ ဝဲစီၩ ၦလၧဆၧခၭဆၧဖိၪဆၧဎါနီၪ စံၭဝ့ၫ ကဲၪထၪ့ဘၪမၪဂီၩ့နီၪ ပမၩၥ့ၪလၧၩ့အ့ၬႉ အီၪထးထိၪၡၬကဒီၪ့ယီၩ  ဆၧကၪဆၧဂဲၩ လအီၪဘၪအဂး ၦဂူၫဂၩမၩနၧၩ့မၩဆၪ လန့ဘၪအဂး နဘၪခိၭယိ ဖ့ၪဂဲးဖ့ၪဘၪလီၫႉ စံၭဝ့ၫ ဘဲၫနီၪဂီၩ့ စၭထၪ့လၧ မုကနံၩနီၪ စဎွၩဖိၪ ဒဲ အထံၫအဖျဲလဖၪနီၪ ခိၭယိ ထိၪၡၬၥံၪထီးအလူၬနီၪလီၫႉ ထိၪၡၬလဖၪဆ့ အီၪဘၪဝ့ၫ ၥုၪ့ဎွံၫၥၭမုၬ ကိၭဘံၪ့နီၪလီၫႉ

ၡါဖိၪကယွ့ယီၩ အ့ၪပအၪ့ဎူၫအၪ့ဎၬ ထံၪထံၪဆၭဆၭနီၪ ပကန့ဘၪ ဆၧၥ့ၪယၫနၪၥ့ၪ ဆၧလ့ၩထၪ့လ့ၩထီၫ လၧယၫခီၫအဂး ဆၧကိၪ့ဘၪကိၪ့ၥ့ၪအဂး ကျ့ၭစၨၭအၪ့ဎၬ နၪၥ့ၪထဲၩ့ကိၭဂၩလီၫႉ ဆၧနီၪအကၠီၩ့ ၦဖျိၩ့ဆၨၩကိၭဂၩ ပမၩထံၩမၩၥိၭလၧ ၦဂူၫဂၩနီၪ ဘၪယိထံၫယိဆၭ အဝ့ၫၥံၪမၩ အၥၭပၥ့ၪလဲၪနီၪ ဘၪယိထ့ၫဂ့ၩဘၪလီၫႉ ကနၩ့နၩ့ မၩလၩ့ဘူၭၥၭႇ မၩလၩ့အဲၪၥၭႇ မၩလၩ့ဒိၩ့ၥၭဂီၩ့ အနၫ့ဆါၥံၪနီၪ ပနဲၩထီးလူၬတၭ လၧခဲၫ့နီၪ အၪ့လီၫပၧၩၥ့ၪဝ့ၫလီၫႉ နၥံၪဒဲ ပၧၩထီးလူၬ ဘၪပၭထံၭပၭယၬၥၭဂီၩ့ ၦၡၩကဂၩ အဆၧကိၪ့ဘၪကိၪ့ၥ့ၪ အခၪ့ထံၭခၪ့ဎၧၩ့ဒဲ အၪ့အီၩလ့ၩထဲၩ့နီၪ အၪ့ဂူၫအၪ့ဎၬဂီၩ့မၬ ပမၩထံၩမၩၥိၭနီၪ ကန့ဝ့ၫဒၪလီၫႉ

ၦဖျိၩ့ဆၨၩဖိၪ ထီးအလူၬၥံၪဧ့ႇ ဘဲၫၥိၭ ထိၪၡၬလဖၪယီၩ မၩထံၩမၩၥိၭ ဘၪမၪလၧကျၭလဘံၪ့အကၠီၩ့ ဘဲၫနၥံၪ ကိၭဂၩ လကဲၪထၪ့ဘၪၥိၭလီၫႉ မၩထံၩမၩၥိၭ ဘၪမၪလဂ့ၩလီၫႉ