ထိၪၡၬလဖၪ ဖံၭၥိၭဘၪမၪလၧ ကျၭလဘံၪ့ – ၃

စဎွၩအဖိၪခွၫ ၡ့ၫမၡၩနီၪ ထီၩ့လၧမံၩ့လၬတိၩ့ဖၧၩ့ အဝ့ၫဘၪမၪ ဖၧၩ့ၥၭယူၭနီၪ ၥ့ၪယၫဝ့ၫ ကဂဲၫထဲၩ့စဲၪထၪ့အဂး လီၩ့ယိဎွါ ဖၧၩ့ၥၭအမွဲဂီၩ့ လ့ၩဂၭဖၭကဆၫ့ကဆၫ့ ထီၩ့စိၩလၧ ထိၪၡၬလဖၪ အဝးဖၧၩ့နီၪလီၫႉ အဝ့ၫနီၪ ဘၪဂၭဖၭ ပွံၭၥုၪ့ပွံၭၥၭဒဲ စူၪလၩ့ဘျဲၩ့ ခၪ့လၩ့ဘျဲၩ့ႇ အဂဲးအဘၭလၩ့ဆါအကၠီၩ့ အီၪပွံၭလၧ ၥံၪ့ဖၭဒိၪခၪ့ထံၭဂီၩ့ မံၫမၪဝ့ၫဒၪယူၭလီၫႉ အဝ့ၫနီၪ မံၫမၪယံၬနၭလ့ၬတၭ မုမ့ၬဆ့ၭၡါလၩ့ဒိၭ အဝ့ၫလီၫႉ အဝ့ၫမံၫမၪအခၫ လၧထိၪၡၬဖၧၩ့ ထိၪၡၬအခိၪနါဒိၪကဘံၪ့နီၪ ဒၪစိၩအဝ့ၫ ၥၭလမုၬဘၪ ယၪ့ၥုၪ့ ယၪ့ၥၭဝ့ၫအကၠီၩ့ ပၠၪလၩ့အဒံၭနံၫခီၫဂီၩ့ ဒီၪ့ဒုၩထၬ ၡ့ၫမၡၩနီၪလီၫႉ

လယံၬလမီဘၪ ကျၭကဘံၪ့နီၪ ဂဲၫဒၪဘၪ ၡ့ၫမၡၩမံၫမၪလၧ ၥံၪ့ခၪ့ထံၭ ဝဲလၫ့ထၬအနိၭနီၪ ဆၧမိနံအၥၭဒဲ ဒၪဝ့ၫ လအိၭဘၪအကၠီၩ့ အ့ၪလၩ့ဒိၭခွံၬ ၡ့ၫမၡၩအနိၭဖၧၩ့လၧ အအ့ၪနီၪလီၫႉ ကျၭကဘံၪ့နီၪ အ့ၪလၩ့ဒိၭခွံၬလၧ ၡ့ၫမၡၩအနိၭဖၧၩ့ဂီၩ့ ထဲၩ့ယူၭစဲၪ့ထၪ့ခွံၬဒၪလၧ ယဲၩ့ယိၬယူၭ အလးကစီၪ့လီၫႉ ၡ့ၪမၡၩနီၪ နၪ့ဖျးထၪ့အၥၭ ဂဲထုၪ့ဖျဲၪဖျဲၪ အၥၭထၪ့ဎိၩဒိၪဂီၩ့ လီၩ့ယိဎွါ ထိၪလၧ အအ့ၪလၩ့ဒိၭ အဝ့ၫလီၫႉ ထီးမွဲအဒၪစိၩဘၪလၧ ထိၪၡၬလၧအမၩဒုၩထၬအ့ၪအဝ့ၫနီၪတၭ ၦလၧအ့ၪလၩ့ဒိၭ ယၧၩနီၪ ကမွဲဒၪ နၧၩလီၫႉ နမၩလၩ့အဲၪၥၭဒဲ နမၩဒုၩထၬယၧၩလီၫႉ ယကခၭၥံၫခွံၬနၧၩလီၫႉ

ထိၪၡၬဒိၪနီၪ နၪလၥ့ၪဘၪ ၦၡၩအဆၧချဲၩ့အကၠီၩ့ လီၩဘၪၡ့ၫမၡၩ လၧဆၧချဲၩ့ လန့ဘၪနးမံၩ့လီၫႉ ၡ့ၫလၡၩနီၪ လဆီၫ့မီၪ့အၪ့ဎၬ လၩ့ထံၭဘၪဆၧ နးမံၩ့ ခၭၥံၫခွံၬ ကဆါထိၪၡၬဒိၪနီၪလီၫႉ ဂီၩ့ အီၪလဆိ ထိၬၡၬအထံၩၥိၭၥံၪနီၪ ဂဲၫလၧ ကဆါထိၪၡၬဒိၪအီၪအခၫ လဒၪဘၪအကဆါ လီၩ့ယိထၪ့ဝ့ၫနီၪ ဒၪဘၪ အကဆါထိၪၡၬ လၩ့ထ့ၭၥံၫ အၥၭလအီၪလၧၩ့ဘၪ လၧၥံၪ့ဖၭဒိၪအခၪ့ထံၭတၭ အဝ့ၫၥံၪအၥၭ လမုၬဘၪ အၥၭဘၪထံၭဘၪနဲၪ့ နၭမၬလ့ၬလီၫႉ အဝ့ၫၥံၪ မၩဂ့ၩမၩဘၪ အထိၪၡါ ကဆါဒိၪဂီၩ့ ဎူလၩ့ဝ့ၫ ဂ့ၩဂ့ၩဘၪဘၪလီၫႉ

ထိၪၡၬၥံၪနီၪ လီၩ့ယိထၪ့ဝ့ၫလၧအဝ့ၫၥံၪ အထံၩၥိၭဖၧၩ့နီၪ လဒၪလၧၩ့ဘၪကျၭလဘံၪ့နီၪလီၫႉ ကျၭလဘံၪ့နီၪ ဖျ့ၭထၪ့ခွံၬယူၭလီၫႉ အကၠီၩ့နီၪတၭ ထိၪၡၬဒိၪကဘံၪ့နီၪ စံၭဝ့ၫ ထံၭၥိၭၥံၪဧ့ႇ ဆၧမၩယီၩ မွဲဒၪ ပဆၧမၩလီၫႉ မွဲၦၡၩဂူၫဂၩ အဆၧမၩအ့ၬႉ အယီၩ ကျၭလဘံၪ့ ပဒၪလၧၩ့အ့ၬႉ မနၬမၬလဲၪ ကဆါဒိၪဧ့ႇ ပလဂ့ၩဘၪအကၠီၩ့ နဘၪလၩ့အုၭဒၪလၧ ထံၫဖၨၪခိၪအဖၧၩ့နဲၪႉ စံၭဝ့ၫဘဲၫနီၪ ၥိၭဂီၩ့ ထိၪၡၬလဖၪနီၪ ကိၭၡၭထၪ့အလူ ဆီၪ့ဆီၪ့တၭ တုၩ့လၫ့ ဎးလၫ့ယဲၩ့ယိၬလီၫႉ အဝ့ၫၥံၪအလူနီၪ ဎံၩ့လၩ့လၧ မံၩ့လၬဖၧၩ့ ယဲၩ့ယဲၩ့အကၠီၩ့ ၦအၪ့ဎၬဆၧဖိၪဆၧဎါကဂၩနီၪ နါဂၧၫ့ဘၪဒဲ ဂဲၫစိၩလၧ ထိၪၡၬၥံၪအအီၪ ၥ့ၪယၫဝ့ၫလၧ ကဆါထိၪၡၬဒိၪလဘံၪ့အၥၭ လအီၪလၧၩ့ဘၪတၭ အၥၭလမုၬဘၪ အမ့ၬထံၫလၩ့နီၪလီၫႉ