အ့ၪၥၭနၪ့ခွံၬ ဆၧအီၪမၧၫ့ ဖးဖီၩ့ကကၪလီၫ – ၃
ဆၨၩကဆၨၩ ဆုးအီၪဂုးခၧၫ့ကန့အဂး လၨဆၧချဲၩ့နီၪ အရ့ၩဒိၪထုၬနီၪ ပကဘၪထုၪ့ပၥၭလီၫႉ မွဲဆၧဘဲၫနီၪ ၦဖျိၩ့ဆၨၩကိၭဂၩ ပကဘၪကျ့ၭစၨၭချဲၩ့ထဲၩ့ ၦဖျိၩ့ဆၧချဲၩ့နီၪ ထီအၥၫ့ဆၨၩၥၫ့ဘၪ့လဖၪ မိဘိၭဘၪၥ့ၪယၫနီၪလီၫႉ ဘဲၫ ပယၩ့အဆၧချဲၩ့ဒီၩ့အီၪဝ့ၫ သမုဒ္ဒရာ ဝမ်းတစ်ထွာ အၥိၭ ဆၧၫ့ထီဘဲၫယီၩ ဖျိၩ့ၥၭဘၪ့ၥံၪလဖၪ လမိအီၪက့ၪထးဘၪနးဆ့ ဘၪအီၪက့ၪထး အထံၫခးႇ လၧမိယဲၩ့ဘၪနးဆ့ ဘၪအီၪယဲၩ့ဝ့ၫဒၪနီၪလီၫႉ လနၩ့နၩ့နီၪ ကဲၪဖျိၩ့လါနၫ့ လၧၦဂူၫဂၩအမ့ၬယၫ လီၩ့လၩ့အၥၭလၧ ဖျိၩ့ဘၧၫ့အ့ၬဂီၩ့ မ့ၬမဲဘနီၫမွဲအီၪဆ့လီၫႉ ထီးနီၪ ကဲၪဖျိၩ့လါနၫ့ ဖျိၩ့အၥုၪ့အၥၭလအီၪဘၪဒဲ အီၪမွဲအမံၩ့လီၫ ဖျိၩ့ၥံၪလဖၪ မွဲပရွံဎီၩ့ကလူၬအ့ၬလီၫႉ ဆၧလၧပကဲၪဖျိၩ့နီၪ ပချဲၩ့ပဆၧချဲၩ့ဘၪဂီၩ့ ပကဘၪချဲၩ့လၧ ပဂူၫဂၩအမ့ၬယၫ ထီးအဘၧၫ့ႇ အ့ၪပမၩလိၪထၬ ပလံၬလဲ ဘၪယူၭစွါဘဲၫ ပကဘၪအၪ့နၩ့ဖ့ၪနဲၪထဲၩ့ ၦဂူၫဂၩႇ ပကဘၪအၪ့ဎၬထီးန့ ပဆၧဆၧးဎံၫဆၧးလၩလဖၪဒဲ ပဆၧအုၩ့လၩ့ ကဘၪဂုးခၧၫ့လၧ ၦဆၨၩအဖၫ့ခိၪလီၫႉ
ဆၨၩဆၬအဂး လံၬလဲဒဲ ဆၧချဲၩ့နီၪ ကြၨၭပၥွံၪလချံၪ့ဘၪလီၫႉ လံၬလဲဒဲ ဆၧချဲၩ့ အ့ၪပၥွံၪချံၪ့ဂီၩ့ ပၥၭဆုးလီၩ့လအီၪဘၪနီၪ အထီလၧယၫ ဆၨၩၥၫ့ဘၪၥံၪအဂး ကဂဲၫကဲၪထၪ့နီၪ မွဲပအၪ့ဎၬလဘၧၫ့ဘၪလီၫႉ ဆၧၫ့ထီအလ့ၩထၪ့ထီၫ့လၧ ထီးလုၭဘံၭ ပဆၧချဲၩ့လန့ဘၪအဂး ပကဘၪအီၪလၧ ဆၧထုၪ့ၥုၪ့ထုၪ့ၥၭနီၪလီၫႉ မွဲဆၧဘဲၫနီၪ လၧပၥၭခံဖၧၩ့ ပကဘၪအီၪက့ၪထၬ ဖျိၩ့လံၬလဲဆၧချဲၩ့နီၪ လၧဂၪ့ခိၪဖိၪၥံၪ ထီးအလူၬအဂး လမွဲဘၪလါနၫ့ ၦဖျိၩ့ဆၨၩဖိၪၥံၪအဂးနီၪ မွဲလၧ အလူအဎွ့ၩဎိၩဒိၪဝ့ၫ ဆၧန့ၥၫအဂ့ၩနီၪလီၫႉ
ပဂၪ့ခိၪချိၫ့ယီၩ လ့ၩထၪ့လ့ၩထီၪ့ဒၪဝ့ၫလါနၫ့ ထီးၥၭနၪ့ ပဆၧအီၪမၧၫ့လဂ့ၩအဂး အရ့ၩဒိၪဝ့ၫ တၡါလီၫႉ အ့ၪနၥၭနၪ့ နဆၧအီၪမၧၫ့နီၪ နဖးဖီၩ့လဂ့ၩဘၪ ကအီၪထး တၡါလီၫႉ
