ခးပယၩ့ထၧၫ့ဘံၪ့ယၫ ဘၪထွ့ၫလၧ လံၬဆံၫ့ဎံၪဆၧဖံၭဆၧမၩ ဒဲ ၁ဖၠး

၂၀၂၆နံၪ့ လၩယူၫ ၂၃ၥၫ့ ထီၩ့စိၩလၧ ၂၈ၥၫ့အထီနီၪ ဆၧမၩလၩ့ဎိၭ ခးပယၩ့ထၧၫ့ဘံၪ့ယၫ ဘၪထွ့ၫလၧ လံၬဆံၫ့ဎံၪ ဆၧဖံၭဆၧမၩလဖၪဒဲ ၥဖၠးအီၪဝ့ၫဒၪလၧ ဒိၩ့ပၥံၫ့ဆၧအီၪကီၪ့ဖၭဒိၪႇ မ့ၫရံၫလၩ့ဆၧအီၪကီၪ့အဖၧၩ့နီၪလီၫႉ
၂၃ၥၫ့အဂၫလၩ့ ၇နၩရံၫအခံၫ့နီၪ စၭထၪ့ဝ့ၫဒၪ ၁ဖၠးယီၩလၧ ခးပယၩ့ထၧၫ့ဘံၪ့ယၫ ဆၧအီၪကီၪ့လဖၪအဖၧၩ့ ၦအဂဲၫထၪ့ဝ့ၫဒၪလဖၪ လီၩၥ့ၪယၫလၩ့အၥၭနီၪလီၫႉ ၂၄ၥၫ့လဂီၩ၆နၩရံၫခီၫအခံၫ့နီၪ ခးပယၩ့ထၧၫ့ဘံၪ့ယၫ လံၬဆံၫ့ဎံၪခရၧၫ့ၦမူၩဒၩအီၪလဂၩမွဲဝ့ၫ Fr.George Shwe Htun နီၪ လ့ၩခိၪလ့ၩနါဂီၩ့ ဆၧဆီၪ့မီၪ့ဂုးၥၭႇ လဂီၩ၇နၩရံၫအခံၫ့နီၪ စၭထၪ့မံဆၩဆၧလုထၪ့ဆံၫ့ဎံၪနီၪလီၫႉ ၦလၧအလ့ၩခိၪလ့ၩနါမံဆၩဆၧလုထၪ့ဆံၫ့ဎံၪနီၪ မွဲဝ့ၫဒၪလၧ တီၫ့ဂၠံၩဆၧအီၪကီၪ့ ၥၫ့ခိၪဒိၪ Basilio အားသိုက် နီၪလီၫႉ
“ကနံၩယီၩ ယမိလီၩဘၪ အဂဲၫဒဲအထဲၩ့ အဂဲးနီၪလီၫႉ ဖိၪကနၩ့နၩ့အဆၧဂဲၫထီၩ့စိၩလၧ ဂၪ့ခိၪယီၩမုနံၩနီၪ ကဲၪထၪ့ မိကနၩ့နၩ့အဆၧၥံၫမုနံၩနီၪလီၫႉ ပဂဲၫကဲၪထၪ့ၦၡၩဂီၩ့ ဘဲၫပဂဲၫအခံၫ့ဂ့ၩအၥိၭ ပထဲၩ့ထဲၩ့အခံၫ့ကဘၪဂ့ၩအဂးဆ့လိၪဝ့ၫလီၫႉ ကဆါဎြံၬနီၪ ဂဲၫအခံၫ့ဂ့ၩဝ့ၫဒၪလူၬ ထဲၩ့ထဲၩ့အခံၫ့နီၪ ဂ့ၩအ့ၬႉ ဘၪထိးမၩနၧၩ့မၩစၪ ဘၪထိးၥံၫအၥၭလီၫႉ လါနၫ့အဝ့ၫအဆၧထိးၥံၫၥၭနီၪ မွဲလၧဂၪ့ခိၪဖိၪၥံၪအဂးအကၠီၩ့တၭ အဝ့ၫအဆၧၥံၫနီၪ မွဲအဂ့ၩဒိၪထုၬနီၪလီၫႉ ဘဲၫနီၪၥိၭ စယီဟၫ့နးဆ့ ဂဲၫအခံၫ့ဂ့ၩဝ့ၫလါနၫ့ ၥံၫအခံၫ့နီၪ အနးခီၫ့မိၡါလဖၪနီၪ အီၪကဂၩကစီၪ့နီၪလီၫႉ လါနၫ့အဝ့ၫအဆၧၥံၫယီၩန့ဆ့ မွဲဆၧၥံၫအဂ့ၩဒိၪထုၬဆ့ႉ ပဝ့ၫၥံၪနးဆ့ ဘဲၫပဂဲၫအခံၫ့ဂ့ၩဝ့ၫအၥိၭ ပၥံၫအခံၫ့အ့ၪလဂ့ၩဘၪလါနၫ့ ပဆၧၥံံၫနီၪ ကကဲၪထၪ့ ဆၧၥံၫအဂ့ၩဒိၪထုၬအဂး မွဲပကဘၪကျ့ၭစၨၭနီၪလီၫႉ ပဂဲၫအခံၫ့အိၩ ပဂဲၫလၧပစူၪအပျီၩလါနၫ့ ပထဲၩ့ထဲၩ့အခံၫ့ ထီးပထဲၩ့ထဲၩ့ဘၪလၧ ပစူၪအပျီၩလဂ့ၩအဂး ပကဘၪထုၪ့ပၥၭလီၫႉ ပဂဲၫအခံၫ့နီၪဂ့ၩဝ့ၫယူၭႉ ပထဲၩ့ထဲၩ့ခံၫ့ကိ မွဲကဲၪထၪ့ကၠၭဒၪဝ့ၫလၧ ဆၧထဲၩ့ထဲၩ့အဂ့ၩဒိၪထုၬလဖၪလါဆံၭႉ” အဂဲး ၥၫ့ခိၪဒိၪ အားသိုက် လီၩလၩ့လၬလၩ့ ဆၧၥၭထိၬပရၧၫ့ ဘဲၫနီၪအၥိၭလီၫႉ
လဂီၩ ၉နၩရံၫအခံၫ့နီၪ ဘၪဆၧထံၭလၫ့ လံၬဆံၫ့ဎံၪဆၧထံၪလၩ့ဒီၪလၩ့အီၪဝ့ၫဂီၩ့ ကထံၪဎး စၭထၪ့ၥဖၠးနီၪလၧ ၥၫ့ခိၪဒိၪ Bp.Basilio အားသိုက် အဆၧၥီၪ့ဆၧၥၫ့ ဘၪထွ့ၫလၧ လံၬဆံၫ့ဎံၪဖၧၩ့ ဆၧအဂဲးလဖၪနီၪလီၫႉ
အဝ့ၫဒၪစံၭဝ့ၫ,မွဲမၬ, ၦလၧ အနါဂၧၫ့ယွၩအလူ, ဒဲထီးန့ဖံၭထၬဝ့ၫလဖၪနီၪ,အီၪမုၬ ဝ့ၫဒၪmအၪနဲၪ့အနီၪဒံၭလီၫ. (လုကၫ ၁၁.:၂၈)