ယၥ့ၪယၫနၥံၪနးဆိၭအ့ၬ. (စမၭၥူၫ(၇:၂၁-၂၉)
ယၥ့ၪယၫနၥံၪနးဆိၭအ့ၬ.
ၦလၧအစံၭယၧၩ, ကဆါဧ့, ကဆါဧ့နီၪ, မွဲအမိလ့ၩနုၬဘၪလၧ မူၭခိၪအဘၩ့အမုးအဖၧၩ့ ကိၭဂၩဒ့ၭအ့ၬ. မွဲၦလၧအမၩဝ့ၫထီးဒၪယဖါအီၪလၧမူၭခိၪအၥၭနီၪလီၫ.-လၧမုလနံၩနီၪၦအၪဂၩမိစံၭယၧၩ, ကဆါဧ့, ကဆါဧ့, ပချဲၩ့ဆၧလၧမီၪအချိၬလၧနမံၩ့,ဒဲပနၫ့ထၪ့ခွံၬဆၧနၪလၧနမံၩ့, ဒဲပမၩဆၧလၩ့လၭအၪမံၩ့ လၧနမံၩ့မွဲအ့ၬဧၪ.- ထီးနီၪလဖၧၫ့ ယမိလီၩဘၪဆၧတီၩတီၩ, ယၥ့ၪယၫနၥံၪနးဆိၭအ့ၬ. ၦလၧအကိၪ့မၩဆၧအၧၩ့ဆၧၥၫ့ၥံၪဧ့, စဲၪ့ဖၭလၧယၧၩဆံၭ.
ၦၥုၪ့ထၪ့ဂံၪ့နံၫဂၩ—
မၩအၥၭဘဲၫနီၪတၭ, ၦလၧအနါဂၧၫ့ယလူယီၩ ဒဲ ထီးန့ဝ့ၫကိၭဂၩဒ့ၭနီၪ, ယမိဒီၩ့လၩ့အဝ့ၫၥံၪဘဲၫၦကိၪ့ဆၧၥ့ၪလၧအမၩဂံၪ့ လၧလိးခိၪလဂၩ အၥိၭနီၪလီၫ.- ဆၧဂဲၫဆၧၩ့လၩ့တၭ, ထံၫဆ့ၭဆီၪ့, လံၩအူၪဝ့ၫနီၪ, ဒဲလၩ့ဘၪဝ့ၫလၧဂံၪ့လဖျိၪ့နီၪ, လလၩ့ဎီးဘၪတၭ, မွဲအခၪ့ထံၭအီၪဝ့ၫလၧလိးခိၪအဂဲးလီၫ. ၦလၧအနါဂၧၫ့ ယလူယထၫယီၩတၭ, လထီးန့ဘၪဝ့ၫကိၭဂၩဒ့ၭနီၪ,ယမိဒီၩ့လၩ့အဝ့ၫၥံၪဘဲၫၦအဂီၩ့လၧအမၩဂံၪ့လၧမ့ၭခိၪလဂၩအၥိၭနီၪလီၫ.ဆၧဂဲၫဆၧၩ့လၩ့တၭ, ထံၫဆ့ၭဆီၪ့, လံၩအူၪဝ့ၫနီၪ, ဒဲဘၪဂံၪ့လဖျိၪ့နီၪတၭ, လၩ့ဎီးဝ့ၫလီၫ. အဆၧလၩ့ဎီးနီၪနၭမၬလီၫ.
ယ့ၫရှူၬအီၪလၧအစီၩ့အမၩ့.
ဆၧမၩအၥၭထီး ယ့ၫရှူၬလီၩလၩ့လၬလၩ့ဆၧနီၪဂီၩ့တၭ, ၦခမျၧးထီၫမံၫထီၫမၪဝ့ၫလၧအဆၧၥီၪ့ဆၧၥၫ့အဂဲးလီၫ. အဂဲးဘဲၫယီၩမွဲအၥီၪ့ထဲၩ့ၥၫ့ထဲၩ့ဆၧ ဘဲၫၦကွ့ၭလံၬအၥိၭအ့ၬ. မွဲဘဲၫၦအီၪလၧအစီၩ့အမၩ့ လဂၩအၥိၭနီၪလီၫ.
