စမၭၥူၫ(၆:၇-၁၅)

ထီးနအ့ၪဘၩဆိၪဖၪဆၧနီၪ, ထီးစံၭဂီၩ့စံၭထဲၩ့, စံၭဂီၩ့စံၭထဲၩ့ပျီၩပျီၩ, ဘဲၫၦဆၨၩလဖၪအၥိၭနီၪလဂ့ၩ. အဂဲးဘဲၫယီၩ အဝ့ၫၥံၪဆီၫ့မီၪ့ လၧအချဲၩ့ဆၧအၪအကၠီၩ့တၭ, ဆၧမိခိၭနၪဝ့ၫလီၫ. အခိးမွဲဘဲၫနီၪတၭ, ထီးမၩဒီၩ့အဝ့ၫၥံၪလဂ့ၩ အဂဲးဘဲၫယီၩ ဆၧလၧနၥံၪ န့ဘၪဝ့ၫအလးအီၪလဖၪနီၪ, နၥံၪအဖါၥ့ၪယၫဝ့ၫ လၧနၥံၪလချႃၭအၪ့ကံၩ့ဒံၭဘၪလီၫ. မၩအၥၭဘဲၫနီၪတၭ, ဘၩဆိၪဖၪဘဲၫယီၩ အီၪလၧမူၭခိၪပဖါဧ့, မွဲနမံၩ့အီၪဆံၫ့ဎံၪဒၪဝ့ၫဆံၭ. နဘၩ့နမုးနီၪ, မွဲအထီၩ့ထဲၩ့ဒၪဝ့ၫဆံၭ. မွဲနၥၭလၧၫ့ထၪ့ ဎွ့ၩထၪ့ထဲၩ့ဒၪဝ့ၫထီးဂၪ့ခိၪချိၫ့ယီၩ ဘဲၫလၧမူၭခိၪအၥိၭနီၪဆံၭ. ဆၧအၪ့လၧလနံၩအဂး လနံၩအဂးနီၪ ဖ့ၪလၫ့လါပၧၩလနံၩယီၩဆံၭ. ကွဲၪဖျါခွံၬလါပဒ့ၪပမါဘဲၫပကွဲၪဖျါခွံၬယူၭ ၦၡၩအဒ့ၪအမါလၧအအီၪလၧပၧၩအၥိၭနီၪဆံၭ. ထီးဒုၭလ့ၩနုၬပၧၩ လၧဆၧကျဲၩ့ဖစီၩ့အဖၧၩ့နီၪလဂ့ၩထုၭထၪ့ခွံၬလါပၧၩလၧ ဆၧအၧၩ့ဆၧၥၫ့အဖၧၩ့နီၪဆံၭ. အဂဲးဘဲၫယီၩ ဘၩ့ၥံၪမုးၥံၪ, ဒဲဆၧစီၩ့ဆၧမၩ့, ဒဲဆၧအလၩအဖၩ့နီၪ မွဲနဝ့ၫအဆိၩဆိၩအကၠၪကၠၪလီၫ. အၩမံၩ့. အဂဲးဘဲၫယီၩ နၥံၪအ့ၪကွဲၪဖျါခွံၬၦၡၩအဆၧၥူၭ ဆၧမၪတၭ, နၥံၪအဖါအီၪလၧမူၭခိၪနီၪ မိကွဲၪဖျါခွံၬနၥံၪအဆၧၥူၭဆၧမၪဆ့လီၫ. အ့ၪမွဲနၥံၪအ့ၪလကွဲၪဖျါခွံၬဘၪၦၡၩအဆၧၥူၭဆၧမၪတၭ, နၥံၪအဖါကွဲၪဖျါခွံၬနၥံၪအဆၧၥူၭဆၧမၪဆ့အ့ၬ. #rvapwokaren #DailyReflection