ဆၧဘိၪ့ဆံၭၡၩ ပထၧၫ့မၫဝၩ (၃)
စဎွၩဖိၪယီၩ လ့ၩစဲၪ့လၫ့လၧ အဂံၪ့ဂီၩ့အခၫ အမိနးဎွၩမုၪနီၪ မၩနၧၩ့မၩစၪအဝ့ၫအမၫ အၪမၬနီၪလီၫႉ ၦမုၪနၩ့ဖိၪနီၪ အမံၩ့ၡါမုၪ အၪ့မၧၫ့ကိၭမံၩ့ အၥၭၡၪ့နၭမၬအကၠီၩ့ နၪ့ထၪ့ခိၬယိလါအဝၩၥၭဘီၩ့နီၪလီၫႉ လၧခဲၫ့ အဝ့ၫအမံၩ့ၡါမုၪနီၪ အၪ့မၧၫ့ အကဆၫ့ ဆ့ၭၥံၫခွံၬ အဝ့ၫလၧ အမဲၪတၭ ၦမုၪနၩ့ဖိၪယီၩ ဘၪၥံၫခွံၬဝ့ၫဒၪလၧ အဂိးဖိၪ့ကဖျိၪ့နီၪလီၫႉ အဝ့ၫၥံၫဂီၩ့ လယံၬလမီဘၪအဖၧၩ့ အဝၩၥၭဘီၩ့ ဂဲၫထဲၩ့ ထီၩ့နီၪလီၫႉ
အမိမိ နးဎွၩမုၪနီၪ မၩထၬအ့ၪအဖိၪခွၫ ဆၧအၪ့ဆၧအီၩဂ့ၩဂ့ၩဘၪဘၪနီၪလီၫႉ စဎွၩဖိၪယီၩ အၪ့မ့ၩအထီ အဲၪ့လၩ့ဘၪ အစူၪတၭ အၪ့စၪ့အမိ ယမၫအီၪခလဲၪနီၪလီၫႉ လၧခဲၫ့ အမိစံၭဆၧၫ့ထဲၩ့ နမၫအီၪလၧ ဒူၭဖၧၩ့အိၩ အၪ့မ့ၩဂီၩ့ ထဲၩ့နုၬလၩ့ လၧဒူၭဖၧၩ့ယူၭနီၪလီၫႉ အထီနီၪ မွဲအဝ့ၫအမၫ အၥၭလအီၪလၧၩ့ဘၪနီၪလီၫႉ စဎွၩဖိၪယီၩ ဘိၬဂၭထုၪ့လၫ့အမၫအခၫ ဎွ့ၩလၩ့ဝ့ၫဒၪလၧ အၥွံၪၥံၪလီၫႉ ကထံၪဎး အဝ့ၫၥ့ၪ ယၫလၧ အမၫဘၪထိးမၩၥံၫအၥၭလၧ ကဆၫ့အမဲၪနီၪလီၫႉ
လၧခဲၫ့ကနံၩ ဆၧဂဲၫဖၩ့လၫ့အခၫ လ့ၩဘၧၩ့လၩ့အမၫဂီၩ့ မွဲလဂဲၫထဲၩ့လၧၩ့ဘၪလၧနီးဖၧၩ့ဂီၩ့ မုနၩမုဆၫ အီၪဒၪလၧ အမၫအနဲၩ့ ထံၭနီၪလီၫႉ လၧခဲၫ့ စဎွၩဖိၪယီၩ မွဲၥံၫဆ့နီၪလီၫႉ အီၪလၧနီးဖၧၩ့ စဎွၩဖိၪအဖါဖါလဂၩ နါဂၧၫ့အဖိၪၥံၪၥံၫနီၪ မွဲအၥုၪ့အၥၭ လမုၬဘၪဒဲ နၪ့ထၪ့ဝ့ၫအၪမၬအကၠီၩ့ အၪ့မၧၫ့အဖျဲၥံၪလ့ၩၥိၫ့လၧ အဖိၪဒဲအဒဲၪအီၪအလးနီၪလီၫႉ လၧခဲၫ့ စဎွၩအမၫ နးဎွၩမုၪနးဆ့ နၪ့ထၪ့အဝၩဒဲ အဖိၪခွၫအၪမၬအကၠီၩ့ ဂဲၫလီၩ့ဝ့ၫလၧအလးခဲၫ့ ဂဲၫလၧဖၧၩ့ၥၭအထီ ဘီၪမံၩ့အဲၪ့ၥံၫခွံၬနီၪလီၫႉ
