ဆၧဘိၪ့ဆံၭၡၩ ပထၧၫ့မၫဝၩ (၂)

လၧခဲၫ့ကနံၩအခၫ စဎွၩအဖိၪခွၫနီၪ လ့ၩလီၩ့ယိဂူၪၦမုၪနၩ့ဖိၪနီၪ စွါဘဲၫႉ ကထံၪဎး ၦမုၪနၩ့ဖိၪနီၪ ဂဲၫစဲၪ့လၫ့ၡၧးလၧ အဝ့ၫအမ့ၬ ယၫတၭ စံၭဝ့ၫ ၦမုၪနၩ့ဎံၫလၩဧ့ ဘၪနီၪလဲၪနဘၪလီၩ့စဲၪလၧ ဆၩ့ထံၫကျၩနီၪ ၦမုၪနၩ့ဖိၪစံၭဆၧၫ့ထဲၩ့ အမိမိအၪ့မၧၫ့ယၧၩ ယိအ့ၪထိၪ ဘဲၫ လဂဲၫဘၪ လၧခိၬဖၧၩ့အဂးဒဲ ယဘၪယိထွ့ၫထၬအ့ၪနီၪလီၫႉ စဎွၩအဖိၪခွၫယီၩ နါဂၧၫ့ဘၪၦမုၪနၩ့ဎံၫလၩဖိၪယီၩ အဆၧချဲၩ့ကထံၪဎး မွဲအၥၭလမုၬဘၪဒဲ ယၪ့ၥၭၦမုၪနၩ့ဖိၪနီၪလီၫႉ လၧခဲၫ့ စဎွၩဖိၪယီၩ ဂဲၫန့အ့ၪၦမုၪနၩ့ဖိၪနီၪ ဆၧကီၩ့ဆၧၥိၭၥံၪဒဲ အၪ့ကံၩ့အဲၪဝ့ၫဒၪနီၪလီၫႉ လါနၫ့ ၦမုၪနၩ့ဖိၪဎံၫလၩနီၪ ၥ့ၪယၪဒၪအဝ့ၫအဂဲးအကၠီၩ့ စံၭဆၧၫ့ထဲၩ့ စဎွၩအဖိၪခွၫ ကဆါဧ့ႇ ယၧၩဝ့ၫမွဲ ၦဖိၪဎွ့ၪဖိၪလဂၩလီၫႉ

 နမိနီၪ ဒုၭအၪ့ယၧၩမွဲ မ့ၪခိဘၩ့လီၫဂီၩ့ အၪ့မၧၫ့ယၧၩမံၫလၧ ၦၡၩကွဲၪလၩ့ထၬခၪ့ဖံၭအလးနီၪလီၫႉ မွဲဆၧဘဲၫနီၪ ဂဲၫအဲၪယၧၩလဂ့ၩႉ အ့ၪမွဲနမိၥ့ၪယၫ ကအၪ့မၧၫ့ဎီးယၧၩနၭန့အယီၩဒံၭႉ စဎွၩအဖိၪခွၫနီၪ ယၪ့ၥၭ ၦမုၪနၩ့ဖိၪနီၪတၭ စံၭဝ့ၫ ၥၭမဲၪဆၧနးမံၩ့လဂ့ၩ ယအဲၪနၧၩ လၧခဲၫ့ အခံၫ့ယံၬထၪ့ အခၫ ၦမုၪနၩ့ဖိၪဎံၫလၩယီၩ အဲၪဆၧၫ့ထဲၩ့ စဎွၩဖိၪနီၪလီၫႉ စဎွၩအဖိၪခွၫယီၩ ထၪ့အီၪဎုၬလၧ ၦမုၪနၩ့ဖိၪနီၪဂီၩ့ ထဲၩ့ကိၭန့အမၫၥၭဘီၩ့ လၧ နီးဖၧၩ့အ့ၬနီၪလီၫႉ လါနၫ့ အခံၫ့ယံၬထၪ့အခၫ အမိမိ နးဎွၩမုၪၥ့ၪယၫနီၪလီၫႉ အဝ့ၫအဖိၪခွၫ ထၪ့အီၪဎုၬလၧ အဝ့ၫအဎီးဖိၪနီၪ ၥ့ၪယၫဝ့ၫ တၭ အၪ့မၧၫ့အဖိၪခွၫ ဂဲၫထဲၩ့ကိၭန့အမၫလၧ နီးဖၧၩ့နီၪလီၫႉ

            စဎွၩအဖိၪယီၩ အမိကိၭထဲၩ့လၧနီးဖၧၩ့အခၫ အီၪဝ့ၫန့လၧၩ့အ့ၬ ဂဲၫထဲၩ့ထဲၩ့လၧနီးဖၧၩ့ ကၠၧၫ့ကၠၧၫ့လၧအမၫၥၭဘီၩ့နီၪလီၫႉ  အမိမိ နးဎွၩမုၪစံၭအဝ့ၫ ဆၧလၧ စဎွၩအဖိၪခွၫ အ့ၪမွဲတၩ့ဂံၪ့တၩ့ဎၫ့ဂီၩ့အခၫ အမိအဂး ကဘၪမၩ ခီၫ့ၡၩဖနံၬထးကၩနီၪလီၫႉ အထီနီၪ စဎွၩဖိၪ အမၫၥၭဘီၩ့ဆ့ အီၪလၧ အဒံၪအဒၧၩ့ယူၭနီၪလီၫႉ လါနၫ့ စဎွၩအဖိၪခွၫနီၪ ခိၭနၪအမိအဆၧချဲၩ့အကၠီၩ့ မၩဝ့ၫဘဲၫ အမိမိအၪ့မၧၫ့အၥိၭ နီၪလီၫႉ စဎွၩဖိၪယီၩ အီၪက့ၪထးအမၫလၧ နီးဖၧၩ့ဂီၩ့ အၪ့မၧၫ့အမိမိယိထွ့ၫအမၫၥၭဘီၩ့နီၪလီၫႉ ထီးနီၪ စဎွၩဖိၪအမိနီၪ ကဘၩ့နွ့ၫဖျိၪ့ဒဲ ဆၧအၪ့ဆၧအီၩ ၦၡၩၥံၪအလၧၫ့အဎွ့ၩ ထံၭလၩ့စိၩအ့ၪအဖိၪခွၫနီၪလီၫႉ စဎွၩဖိၪယီၩ လၧလ့ၩဒံၭဘၪဆၧနီၪ မၫလူၬထးအမၫၥၭဘီၩ့ ထီးစီၪခိ အဝ့ၫအဂး နးမံၩ့လဂ့ၩနီၪလီၫႉ အထီနီၪ အမိဝ့ၫစံၭအဖိၪခွၫ လ့ၩဂ့ၩဂ့ၩ စီၪခိနလးခဲၫ့ နးမံၩ့လဂ့ၩ ယကယိထွ့ၫယဒဲၪမုၪ ဂ့ၩဂ့ၩဘၪဘၪ နီၪလီၫႉ