ဖျိၩ့ဆၨၩလဖၪအဆၧအီၪပြံၩပြၩ (၅)

ထၧၫ့ဖုဝဲမုၪခွၫၥံၪဧ့ႇ ခိၪလၩဘွၩၥံၪ ထဲၩ့စဲၪ့လၫ့ဂီၩ့ ခီၫလၧ ၁၉၄၈နံၪ့နီၪ လၧခးပယၩ့ထံၫခးဖၧၩ့ ကဲၪထၪ့ဝ့ၫဒၪ ဆၧဖီၪ့ထၪ့စူၪဝဲၩ ဆၧဒူၭဆၧယၩၥံၪနီၪ ထီးထီၩ့မုဆၫကနံၩယီၩ လဂီၩ့ဒံၭဘၪလီၫႉ  ကဲၪထၪ့ဝ့ၫဒၪ နံၪ့ဆံၫလၩယံၬ ဆၧဒုၭၥုၭလဖၪယီၩ ၦဖျိၩ့ဆၨၩဖိၪၥံၪလဖၪ ဘၪထိးအဆၫထုၬနီၪလီၫႉ ၦဖျိၩ့ဆၨၩဖိၪၥံၪနီၪ မွဲဒၪဎီၩ့အနိၪ့ဆၧနါဘဲၫ ခိၪလၩဘွၩၥံၪထဲၩ့အခံၫ့လီၫ လမွဲဘၪဒဲ ဘၪထိးမၩနၧၩ့မၩစၪထၬ ခီၫလၧ ခိၪလၩဘွၩၥံၪ ဂဲၫလထီၩ့ဒံၭဘၪအိၩယူၭနီၪလီၫႉ မွဲဆၧဘဲၫနီၪ ၦဖျိၩ့ဆၨၩခိၪနါ ဒီၭတၫ စၫ့စံၫဖိၩ ဖ့ၪအ့ၪ ဖျိၩ့ဆၨၩဖိၪၥံၪ ဆၧထုၪ့ၥုၪ့ထုၪ့ၥၭဆၧချဲၩ့နီၪ မနီၫလဲၪစွါဘဲၫ ခီၫလၧ စဎွၩအဆၧပၧၩ့ဆၧအထီ ဖံၫဖူၫၥံၪလၧဖျိၩ့ဖျိၩ့အိၩ ဘၪဂဲၫထဲၩ့ထိးမၩနၧၩ့မၩစၪ အၪမၬနီၪလီၫႉ ဘဲၫယီၩ ထီၩ့ထဲၩ့လၧ ပဒိၪအဆၧပၧၩ့လါနၫ့ ပဘၪဆုးထိးဘဲၫဒံၭနီၪလီၫႉ ဖျိၩ့ၥံၪနီၪ ဘၪထိးမၩနၧၩ့မၩစၪ ထီးထီၩ့မုဆၫကနံၩယီၩနီၪလီၫႉ လါနၫ့ ဖျိၩ့ဆၨၩၥံၪနီၪ အဆၧအၪ့ဎူၫအၪ့ဎၬ ၡၩဒံၭနီၪလီၫႉ ဖးဖီၩ့လၧအဖီၩ့ခွံၬလဖၪ ယဘၪအၪ့ဎၬထၪ့ထဲၩ့ ယၥၭအီၪအ့ၬႉ လါနၫ့ ကကၠၪကၠၪ ပဘၪအၪ့ဎၬထၪ့ထဲၩ့ လိၫဝ့ၫနီၪလီၫႉ

            ၦဖျိၩ့ဆၨၩဖိၪၥံၪ လၧအအီၪဖံၬဒၩလးလဖၪ  ဘၪအီၪလဲၩ့မွံၩဎုၬအၥၭလၧ ဒီၩ့ဂိၩၥံၪအကၠီၩ့ လၧၥုၭအပဒိၪအဆၫ့ဆၫ့အဆၧပၧၩ့မွဲဂ့ၩႇ ဒံၫမီၩဂရ့ၫစံၫ ကကုၭကကျၩ့အထီမွဲဂ့ၩ ဆၨၩဆၬအနိၪ့ႇ ထံၫခးအနိၪ့ ၦဖျိၩ့ဆၨၩဖိၪၥံၪအဂး အခွးအရ့ၩလန့မီၪ့ဎီၩ့ဘၪလၧ ၦဂူၫဂၩ ဆၧဘၪလိၬဎွ့ၪဎီၩ့လအီၪဘၪအၥိၭ ဖးဖီၩ့လုၫလါထူၫရူၪလဖၪႇ ဆၧဆၧးဎံၫဆၧးလၩလဖၪဒဲ ဆၧကိၪ့ဘၪကိၪ့ၥ့ၪလဖၪ ဘၪထိး မၩလၩ့မၬထၪ့နီၪလီၫႉ ဘၪထွ့ၫလၧ လၨဆၧချဲၩ့ႇ ဆၧကိၪ့ဘၪကိၪ့ၥ့ၪဒဲ လံၬလဲၥံၪနီၪ နံၪ့ ၁၉၆၂နံၪ့ အလးခဲၫ့ ဒိၩ့ဂိၩၥုၭၥံၪ ထၪ့အၪ့ဂူၪလိၬ စီၩ့မၩ့ဂီၩ့အခၫ ဖျိၩ့ဆၨၩဒဲ ဂဲးဘၭဆံၭဝ့ၫ ဆၨၩဂူၫဂၩၥံၪလဖၪ ၥီၪ့ဘၪအလၨဆၧချဲၩ့လၧၩ့အ့ၬနီၪလီၫႉ အနီၪတၭ ၦဖျိၩ့လံၬလဲဒဲ လၨဆၧချဲၩ့နီၪ ပၥီၪ့ဘၪဒၪလၧ ၥရိၬၥံၪႇ ၥၫ့ခၫကၠီးၥံၪနီၪလီၫႉ

            ဆၧၥီၪ့လိၪလံၬဖျိၩ့နီၪ စၭထၪ့လၧ ခိၪလၩဘွၩအထီ ဆၧပျီၩ့ဖျ့ၭန့ဂီၩ့ အလးခဲၫ့ ထီးထီၩ့ ဆၧလၧထၪ့ဂူၫလိၬဒံၭဘၪစီၩ့မၩ့အထီနီၪ လၧပဒိၪဆၧမၩလိၪလးလဖၪနီၪ တၩ့ကျၩႇ တၩ့ထီၫ့ ဆၧမၩလိၪလဖၪ ပၥီၪ့လိၪဘၪၦဖျိၩ့လံၬဂ့ၩဂ့ၩဘၪဘၪလါနၫ့ဂ့ၩ နံၪ့ ၁၉၆၀ အလးခဲၫ့ ဘၪထိးဖၭဘံၭထီးအလူၬဂီၩ့ ၦဖျိၩ့ဆၧမၩလိၪလးလဖၪႇ ဆၧအီၪကီၪ့ကၠီးလဖၪနးဆ့ ပဒိၪထၪ့အၪ့န့ခွံၬ ထီးအလူၬနီၪလီၫႉ ဖျိၩ့ဆၨၩၥံၪလဖၪ အဂး လံၬလဲႇ လၨဆၧချဲၩ့ဒဲ ဆၧကိၪ့ၥ့ၪလဖၪ မွဲဆၧဖီၩ့ဖျ့ၭလအီၪဘၪနးမံၩ့ဒဲ ဘၪထိးမၩလၩ့ဘၧၩ့ထၬအၥၭ ဆၧနဲၪ့လဖၪ နီၪလီၫႉ