မုကိၭနံၩဆၧၥၭထိၬပရၧၫ့ (စယီဟၫ့(၁၇:၁၁-၁၉) )

ယဝ့ၫဒၪယီၩ ယအီၪလၧၩ့လၧဂၪ့ခိၪချိၫ့ယီၩအ့ၬ. အ့ၪမွဲအဝ့ၫၥံၪယီၩ, မိအီၪဒံၭလၧဂၪ့ခိၪချိၫ့, အ့ၪမွဲယဝ့ၫဒၪယီၩ ယမိထဲၩ့ထၪ့လၧနအီၪလီၫ. ဖါဆံၫ့ဎံၪဧ့, ၦလၧနဖ့ၪလၫ့ယၧၩလဖၪနီၪ, ဘဲၫၥိၭအမိကဲၪဆၧလမံၩ့ဎး, ဘဲၫနၧၩဒဲယၧၩအၥိၭတၭ, ယိထဲၩ့ခွါထဲၩ့အဝ့ၫၥံၪ လၧနမံၩ့အဖၧၩ့ဆံၭ. လၧယအီၪလၧဂၪ့ခိၪချိၫ့ လၧအၥိၭအဘိၩ့ဘၭနီၪ, ယယိထဲၩ့ခွါထဲၩ့အဝ့ၫၥံၪ လၧနမံၩ့အဖၧၩ့လီၫ. ၦလၧနဖ့ၪလၫ့ယၧၩလဖၪနီၪ ယအီၪခိၭထၬယူၭအဝ့ၫၥံၪယူၭတၭ, အ့ၪလမွဲဘၪ ၦဂၭဂီၩ့ဖိၪလဂၩ ဘဲၫၥိၭလံၬအီၪကွ့ၭအၥၭ မိလၧၫ့ထၪ့ဎွ့ၩထၪ့ဝ့ၫနီၪ, လၩ့မါဘၪဝ့ၫနးဂၩအ့ၬ. ဘိၩ့နဲၪ့ယီၩ ယထဲၩ့ထၪ့လၧနအီၪတၭ, ဘဲၫၥိၭအဝ့ၫၥံၪ မိအီၪလၧယဆၧၥၭထိၬလၧၫ့ထၪ့ဎွ့ၩထၪ့ဝ့ၫလၧအဖၧၩ့နီၪ, ယလီၩဘၪဆၧလဖၪယီၩ လၧဂၪ့ခိၪချိၫ့ယီၩလီၫ. ယဖ့ၪလၫ့ယူၭအဝ့ၫၥံၪလၧ နလူနထၫယူၭ ၦဂၪ့ခိၪဖိၪမ့ၬလဲၩအဝ့ၫၥံၪနီၪ, အဂဲးဘဲၫယီၩ အဝ့ၫၥံၪလဘၪဆဲၫ့ဘၪလၧဂၪ့ခိၪ ဘဲၫယဝ့ၫဒၪယီၩ ယလဘၪဆဲၫ့ဘၪလၧဂၪ့ခိၪအၥိၭနီၪဆ့လီၫ. ဘဲၫၥိၭနမိအၪ့မၩန့ခွံၬအဝ့ၫၥံၪ လၧဂၪ့ခိၪယီၩတၭ, မွဲယလအၪ့ကံၩ့ဘၪ မွဲလၧနမိယိထဲၩ့ခွါထဲၩ့ဝ့ၫ ဘဲၫၥိၭဆၧအၧၩ့ဆၧၥၫ့ထီးဘၪအဝ့ၫၥံၪလဂ့ၩလီၫ. အဝ့ၫၥံၪလဘၪဆဲၫ့ဘၪလၧဂၪ့ခိၪ, ဘဲၫယဝ့ၫဒၪယီၩ လဘၪဆဲၫ့ဘၪလၧဂၪ့ခိၪအၥိၭနီၪဆ့လီၫ. မၩဆံၫ့ဎံၪအဝ့ၫၥံၪ လၧနဆၧမွဲဆၧတီၩအဖၧၩ့ဆံၭ. နလူနထၫနီၪ မွဲဆၧမွဲဆၧတီၩလီၫ.- ဘဲၫနအၪ့မၧၫ့လၩ့န့ယၧၩ လၧဂၪ့ခိၪအၥိၭနီၪ, ယအၪ့မၧၫ့လၩ့အဝ့ၫၥံၪလၧ ဂၪ့ခိၪဆ့လီၫ. ဘဲၫၥိၭ အဝ့ၫၥံၪမိဆံၫ့ဎံၪထၪ့လၧ ဆၧမွဲဆၧတီၩအဖၧၩ့တၭ, ယမၩဆံၫ့ဎံၪထၪ့ယၥၭလၧအဂးလီၫ.