RVA ဖျိၩ့ၡိအဖုၫအဂီ မၩလၩမၩဖၩ့ RVA Day လၧ ဝံးမၠီၩ့မၠၭအဂဲး

2026နံၪ့ လၧၩမ့ၫ ၁၇ၥၫ့ လဂီၩ7:30အခံၫ့နီၪ ၦၡၩမၩလၩမၩဖၩ့ RVA Day မံဆၩဆၧလုထၪ့အီၪဝ့ၫဒၪလၧ အ့ၫယၫဝတံၫခးဒီၪ့ ဝံးမၠီၩ့မၠၭ ယ့ၫၡူၪအၥၭဆံၫ့ဎံၪ ၥရိၬလးဝၩ့ဖၧၩ့နီၪလီၫႉ ၦအလ့ၩခိၪလ့ၩနါမံဆၩဆၧလုထၪ့နီၪ မွဲဝ့ၫဒၪလၧ ဒိၩ့ပၥံၫ့ဆၧအီၪကီၪ့ၥၫ့ခိၪဒိၪ Bp.Henryမၩ့အဲၪချံၫ့နီၪလီၫႉ မံဆၩဆၧလုထၪ့ဂီၩဝ့ၫကကၠၪ ပဆုးထဲၩ့မၩလၩမၩဖၩ့ RVA အမုနံၩ ဆၧထံၪလၩ့ဒီၪလၩ့လဖၪနီၪလီၫႉ လၧဆၧထံၪလၩ့ဒီၪလၩ့နီၪအဖၧၩ့ ၥၫ့ခိၪဒိၪ လီၩဝ့ၫဒၪ “ဖျိၩ့ဖံၫဖူၫမိဖါၥံၪ ချဲၩ့ဒုၪ့ဂၧၩ့ နၥံၪအဖိၪအလံၩလဖၪ လၧဖျိၩ့ခီၫလါဆံၭႉ ဘၪန့လဲၪနီၪ ပဒၪဘၪ ၥၭဘၪ့ၥံၪကနၩ့နၩ့နီၪ အမိဖါမွဲဖျိၩ့လါနၫ့ ချဲၩ့ဂၧၩ့အဝ့ၫၥံၪလၧ ဖျိၩ့လၧၩ့အ့ၬအကၠီၩ့ အဝ့ၫၥံၪယီၩ ချဲၩ့ဖျိၩ့ဘၪလၧၩ့အ့ၬဘနီၪ အီၪအၪလ့ၬအကၠီၩ့လီၫႉ ဂီၩ့နီၪ ဖ့ၪဂဲးဖ့ၪဘၭဘၪ RVA အဆၧရၩလၩ့လဖၪနီၪလါဆံၭ” အဂဲးဆ့ ၥၫ့ခိၪဒိၪယီၩ ဆၫ့ထွ့ၫဘၪ ၦဖျိၩ့ဖိၪၥံၪ ဘဲၫနီၪအၥိၭလီၫႉ ဆၧထံၪလၩ့ဒီၪလၩ့ဂီၩ့ခွံၬဝ့ၫလၧ လဂီၩ၁၁နၩရံၫခီၫအခံၫ့နီၪတၭ ပဘုၪ့အၪ့ဘုၪ့အီၩၦၡၩလၧ မုဆၫဆၧအၪ့နီၪဂီၩ့ ပအီၪပထုၬခွံၬ ပဆၧထံၪလၩ့ဒီၪလၩ့လဖၪနီၪလီၫႉ ဆၧထံၪလၩ့ဒီၪလၩ့ယီၩ ဘဲၫကကဲၪထၪ့ ဂ့ၩဂ့ၩဘၪဘၪအဂး ၦၡၩဝၩ့မၩဆၧၩ့ပၧၩထီးလူၬလဖၪနီၪ ပအဲၪဒိၭစံၭဘၪ စံၭခိးစံၭတၩအၪမၬနီၪလီၫႉ မွဲကဆါယွၩ ကဆိၪဂ့ၩဆိၪဘွၩဘၪနၥံၪ ကိၭဆၧၫ့ထီဒ့ၭလါဆံၭႉ