ဖျိၩ့ဆၨၩလဖၪအဆၧအီၪပြံၩပြၩ (၄)

လၧခးပယၩ့လၬကကဲၩ့ခီၫ ထံၫထၪကျိၩ့လးကျဲၩ့ လကၭဘၪ ၦဖျိၩ့ဆၨၩဖိၪၥံၪ အီၪအလး လၧခဲၫ့ကလးနီၪ မွဲခိၪလီၩ့လးကျဲၩ့နီၪလီၫႉ ဖျိၩ့ၥံၪနီၪ န့ထၬဘၪ ဒီၩ့ဂိၩဒဲ ၥဲၫ့အကျၩ ခိၪလီၩ့လဖၪနီၪလီၫႉ အဝ့ၫၥံၪ အီၪပြံၩပြၩလၩ့လၧ ခိၪလီၩ့ဒၩ့ခိၪနီၪလီၫႉ ဖျိၩ့ဆၨၩၥံၪနီၪ မၩအၪ့ ဎုၬအဆၧမၩ ဆၧၥုၪ့ဆၧဖျါနီၪလီၫႉ ဖျိၩ့ၥံၪလၧအအီၪခိၪလီၩ့ခိၪလဖၪ အီၪယဲၩ့ဝ့ၫဒၪလၧ ဒီၩ့ဂိၩၥံၪလါနၫ့ ဘၪထိးဒီၩ့ဂိၩၥံၪ အဆၧမၩနၧၩ့မၩစၪနီၪလီၫႉ

            လၧခိၪလၩဘွၩ လဂဲၫပၧၩ့ဒံၭဘၪဆၧအထီ ၦဖျိၩ့ဖိၪၥံၪနီၪ အီၪလၧ ထံၫထၪကျိၩ့ဒဲ လၧမုထၪ့ကကဲၩ့ခီၫ ခိၪလီၩ့လးကျဲၩ့နီၪလီၫႉ ထံၫထၪကျိၩ့လးဝၩ့ႇ တန့ၩၥၫရံၫလးကျဲၩ့ဒဲ ၥၫ့လွ့ၫခးရ့ၫၥံၪနီၪ မွဲမိၫဆၨၩဒဲ ဖျိၩ့ဆၨၩၥံၪအီၪအလးဂီၩ့ အအၪထုၬနီၪ မွဲ ဖျိၩ့ဆၨၩၥံၪနီၪလီၫႉ ခိၪလၩဘွၩအဆၧပၧၩ့ထီ ဂဲၫထီၩ့အခၫ ဖျိၩ့ဆၨၩၥံၪအီၪအလးအကျဲၩ့နီၪ ၦဂူၫဂၩၥံၪ ဂဲၫၥုၭအီၪထၪ့အၥၭအၪမၬနီၪလီၫႉ ၦဖျိၩ့ဆၨၩဖိၪၥံၪလဖၪ အီၪအလးနီၪ ၦဂူၫဂၩၥံၪ ဂဲၫထီၩ့အၪအကၠီၩ့ ဖျိၩ့ဆၨၩဖိၪၥံၪလဖၪ ဘၪၥုၭအီၪထဲၩ့အၥၭလၧ လးကျဲၩ့အဂူၫဂၩနီၪလီၫႉ ဆၧပၧၩ့ဆၧအၥၫ့ႇ ၦလၧအပၧၩ့ဆၧအၥၫ့ႇ ၦၡၩအၥၫ့လဖၪ အဆၧအၪ့ယုခွံၬအကၠီၩ့ ၦဖျိၩ့ဆၨၩဖိၪၥံၪလဖၪ ဘၪစဲၪ့ထၪ့အီၪ ထံၫခးဖၧၩ့ လးကျဲၩ့ထီၩ့အဎံၩ့နီၪလီၫႉ

            ၦဖျိၩ့ဆၨၩဖိၪၥံၪ ဘၪနီၫလဲၪ ဘၪအီၪပြံၩပြၩ့လၩ့ဝ့ၫဒၪ အဂဲးအဖးလၧခဲၫ့ကမံၩ့နီၪ မွဲဝ့ၫ ထံၫခးဖၧၩ့ ဆၧဒုၭဆၧယၩဒဲ ဒီၩ့ဂိၩခိၪနါလဖၪ မၩထၪ့ ဆၧလ့ၩထၪ့ထီၪ့ဆၧကိၪ့ဆၧတဲၩ့လဖၪအကၠီၩ့လီၫႉ အၪဒၪဆၧ ထံၫခးဖၧၩ့ ဆၧဒုၭဆၧယၩနီၪ ဖျိၩ့ဆၨၩဖိၪၥံၪ ဘၪထိးအနၭထုၬလီၫႉ ထံၫခးဖၧၩ့ဆၧဒုၭၥုၭအကၠီၩ့ ဘၪစဲၪ့ဝ့ၫဒၪခိၪမၪခိၪမၪအကၠီၩ့ ဖျိၩ့ဆၨၩဖိၪၥံၪလဖၪ မွဲဂဲၫထဲၩ့အီၪလၧ အလးကျဲၩ့ လယီၫလၧၩ့ဘၪအကၠီၩ့ အီၪက့ၪထးခွံၬအလးကျဲၩ့ဂီၩ့ ဘၪလ့ၩအီၪလၧအယဲၩ့ အဆၧၥၭမၧၫ့အဆၧၩ့ထီၫ့အဂး ဘၪရွံထၪ့ဝ့ၫဒၪနီၪလီၫႉ