ကဆါယွၩအခိးအတၩနီၪ ပကဘၪလၩ့ဎွါလၧ ပၥၭခံဖၧၩ့အဂဲး
လၧဎြံၬဆၧအဲၪဆၧကွံၩဖၧၩ့ အဲၪကွံၩဘၪထၧၫ့ဖုဝဲထံၩၥိၭထီးအလူၬၥံၪဧ့ႇ မုကနံၩယီၩ ယအဲၪဒိၭရၩလၩ့န့အ့ၪဘၪနၥံၪ ၥၫ့ဎွၩလ့ၫအိၫ ၁၄ ဂၩလဂၩ အဆၧၥီၪ့ဆၧၥၫ့နီၪ မွဲဝ့ၫဒၪ ကဆါယွၩအခိးအတၩနီၪ ပကဘၪလၩ့ဎွါလၧ ပၥၭခံဖၧၩ့အဂဲး အကၠီၩ့နီၪလီၫႉ ၦလၧဘၪထိးကိၭဖံၭၥိၭၥၭနီၪ မွဲဝ့ၫကဆါယွၩအလၬဆီၪ့နီၪလီၫႉ ၦကိၭဂၩနီၪ လမံၩ့လမွဲဘၪလမံၩ့ ဘၪထိးကိၭဖံၭၥိၭၥၭကိးဂၩနီၪလီၫႉ ဆၧလၧဆၧကိၭဖံၭၥိၭဆၧနီၪ မွဲဝ့ၫ ကဆါယွၩ အဆၧအဲၪဆၧကွံၩနီၪလီၫႉ
ပအီၪၥၭမၧၫ့ ကိၭနံၩဖၧၩ့ လိၪမနီၪလဲၫနီၪ ကဆါယွၩၥ့ၪယၫပၧၩကိၭကၠၪနီၪလီၫႉ ဆၧနီၪအကၠီၩ့ ပၧၩဝ့ၫနးဆ့ၭ ပကဘၪမၩထၪ့ ဆၧဘၩဆိၪဖၪႇ ပကဘၪခိနၫယွၩလူၬယွၩထၫ နီၪလီၫႉ လၩ့ဆၫ့ဒၩဆၧ ၥၭဘၪ့ဖိၪၥံၪလဖၪယီၩ ကဘၪခိၭနၫကဆါယွၩႇ လကၭဒ့ၭဘၪ ကဆါယွၩ ကိၭဖံၭၥိၭထၬနၥံၪလၧ ဖၧၩ့ၥၭအမံၩ့မံၩ့နီၪ နၥံၪကဘၪအီၪၥၭမၧၫ့ ဂ့ၩဂ့ၩဘၪဘၪအကၠီၩ့ ၥၫ့ဎွၩလ့ၫအိၫ ၁၄ ဂၩလဂၩ ပဂၧၫ့ထၪ့ထၬဆၧနီၪလီၫႉ
လၧခဲၫ့ထုၬ ၥၫ့ဎွၩလ့ၫအိၫ ၁၄ ဂၩလဂၩ ဖ့ၪထၬဆၧချဲၩ့လၬဆီၪ့ (၃) မံၩ့နီၪမွဲဝ့ၫဒၪ
-ကဆါယွၩ အဆၧအဲၪဆၫကွံၩနီၪ ဖ့ၪအ့ၪပၧၩဆၧပျၩ့အဂဲး
-ဆၧကၪဆၧဂဲၩဖၧၩ့ပကဘၪ ဒိၭနဲၩကဆါယွၩအဂဲး
-ၥၭမၧၫ့ကိၭနံၩဖၧၩ့ ပကဘၪ အီၪလၧကဆါယွၩအဂဲးအကၠီၩ့နီၪလီၫႉ
ဆၧအယီၩနီၪ မွဲဝ့ၫ ၥၫ့ဎွၩလ့ၫအိၫ ၁၄ ဂၩလဂၩ အဆၧၥီၪ့ဆၧၥၫ့နီၪလီၫႉ အဲၪကွံၩဘၪထၧၫ့ဖုဝဲထံၩၥိၭ ထီးအလူၬ မွဲနၥံၪလၧၫ့ဎွ့ၩဝ့ၫ ဒၪလၧကဆါဎြံၬ အဆၧအဲၪဆၧကွံၩ လါဆံၭႉ
